ଆପଣ ଫିଲ୍ମରେ ସ୍ପର୍ମ ଡୋନରଙ୍କ ବିଷୟରେ ଦେଖିଥିବେ, ଜାଣିଥିବେ ବି। ଆୟୁଷ୍ମାନ ଖୁରାନା ଏକ ଫିଲ୍ମରେ ସ୍ପର୍ମ ଡୋନର ଭୂମିକାରେ ଅଭିନୟ କରିଥିଲେ। ଏବେ କିନ୍ତୁ ବାସ୍ତବରେ ଜଣେ ବ୍ୟକ୍ତି ସ୍ପର୍ମ ଦାନ କରି ୧୨୯ ପିଲାଙ୍କର ପିତା ହୋଇପାରିଛନ୍ତି।
ଏହି ବ୍ୟକ୍ତି ବ୍ରିଟେନର ଜଣେ ଅବସରପ୍ରାପ୍ତ ଶିକ୍ଷକ। ଯାହାଙ୍କ ବୟସ ୬୬ ବର୍ଷ। ସେ କୁହନ୍ତି, ମୁଁ ବର୍ତ୍ତମାନ ସୁଦ୍ଧା ସ୍ପର୍ମ ଦାନ କରି ୧୨୯ ପିଲାଙ୍କର ପିତା ହୋଇପାରିଛି। ଚଳିତବର୍ଷ ଆଉ ୯ ପିଲାଙ୍କର ବି ପିତା ହେବାକୁ ଯାଉଛି। ତାଙ୍କ ନାମ କ୍ଲାଇଭ୍ସ ଜୋନ୍ସ। ସେ ବ୍ରିଟେନର ଚ୍ୟାଡେସଡେନର ଡର୍ବିରେ ରୁହନ୍ତି। ତାଙ୍କୁ ଯେତେବେଳେ ୫୮ ବର୍ଷ ହୋଇଥିଲା ସେତେବେଳେ ସେ ସ୍ପର୍ମ ଦାନ କରିବା ଆରମ୍ଭ କରିଥିଲେ। ତାହା ପୁଣି ମାଗଣାରେ ଦାନ କରିଥାନ୍ତି।
ଏକ ରିପୋର୍ଟ ଅନୁଯାୟୀ, ଜୋନ୍ସଙ୍କୁ ସ୍ବାସ୍ଥ୍ୟ ବିଶେଷଜ୍ଞମାନେ ଚେତାବନୀ ଦେଇଛନ୍ତି। କାରଣ ଜୋନ୍ସ କୌଣସି କ୍ଲିନିକ୍କୁ ଯାଇ ଏପରି କରୁନାହାନ୍ତି। ସେ ନିଜର ଫେସବୁକ୍ ମାଧ୍ୟମରେ ଏପରି କରୁଛନ୍ତି। ଏହାଦ୍ୱାରା କିଛି ପରିବାରରେ ଖୁସି ମିଳୁଛି।
ସେ ଦାବି କରନ୍ତି, ମୁଁ ଦୁନିଆର ସବୁଠୁ ଅଧିକ ସନ୍ତାନର ପିତା ଅଟେ। ମୁଁ ଆଗାମୀ କିଛି ବର୍ଷ ପାଇଁ ଏମିତି କରିବି। ଯେତେବେଳେ ୧୫୦ ସନ୍ତାନ ଜନ୍ମ ହେବେ ସେତେବେଳେ ଏପରି କାର୍ଯ୍ୟ ବନ୍ଦ କରିଦେବି। ସେ କୁହନ୍ତି,ମୁଁ ଜାଣିଛି ସ୍ପର୍ମ ବିକ୍ରି ହୁଏ, କିନ୍ତୁ ଦାନ କରାଯାଏନାହିଁ। ମୋତେ କିଛି ମା’ ଏବଂ ସନ୍ତାନଙ୍କ ଫଟୋ ମିଳିଛି। ସେମାନେ ମୋତେ ମେସେଜ୍ କଲେ ମୁଁ ବହୁତ ଖୁସି ହୁଏ। ୨୦ ପିଲା ନିଜର। ଆଉ ସବୁ ପିଲା ଡର୍ବି, ବର୍ମିଘାମ, ଷ୍ଟୋକ୍ ଏବଂ ନାଣ୍ଟିଘମରେ ଜନ୍ମ ହୋଇଛନ୍ତି।
ସେ କୁହନ୍ତି, ମୋତେ ଜଣେ ପିଲାର ଜେଜେମା ମେସେଜ କରି କହିଥିଲେ କି, ମୋତେ ତୁମେ ଜେଜେମା କରି ଦେଇଛ। ତୁମକୁ ବହୁତ ବହୁତ ଧନ୍ୟବାଦ। ଜୋନ୍ସଙ୍କ ମତରେ ଯେଉଁମାନଙ୍କର ସନ୍ତାନ ନାହାନ୍ତି ସେମାନଙ୍କୁ ମୁଁ ସ୍ପର୍ମ ଦାନ କରି ପରିବାରରେ ଖୁସି ଦେଉଥିବାରୁ ନିଜକୁ ଗର୍ବିତ ମନେ କରୁଛି।
ଜୋନ୍ସଙ୍କ ୧୯୭୮ରେ ବିବାହ ହୋଇଥିଲା। ମାତ୍ର ଏବେ ତାଙ୍କ ସ୍ତ୍ରୀଙ୍କଠାରୁ ଅଲଗା ରହୁଛନ୍ତି। କାରଣ ତାଙ୍କ ସ୍ତ୍ରୀ ସ୍ପର୍ମ ଦାନ କାର୍ଯ୍ୟରେ ଖୁସି ନ ଥିଲେ। ୨୦୧୮ରେ ଏକ ଡକ୍ୟୁମେଣ୍ଟାରୀ ଫିଲ୍ମ ‘ ୪ ମ୍ୟାନ୍ ୧୭୫ ବେବିଜ୍’ରେ ନଜର ଆସିଥିଲେ। ଏବେ ଜୋନ୍ସଙ୍କ ଏହି କାର୍ଯ୍ୟକୁ ନେଇ ସାରା ବିଶ୍ୱରେ ଚର୍ଚ୍ଚା ହେଉଛି।
