ହାଟଡିହୀ,୧୨l୩(ଶୁଭକାନ୍ତ ନାୟକ):କେନ୍ଦୁଝର ଜିଲା ଆନନ୍ଦପୁର ବିଧାନସଭା ନିର୍ବାଚନମଣ୍ଡଳୀରେ ୨୦୦୯ଠାରୁ ବିଜୁ ଜନତା ଦଳ(ବିଜେଡି) ପ୍ରାର୍ଥୀ ବିଜୟୀ ହୋଇ ଆସିଛନ୍ତି। ୨୦୦୪ରେ କଂଗ୍ରେସର ଜୟଦେବ ଯେନା ବିଧାୟକ ହୋଇଥିଲେ। ପରବର୍ତ୍ତୀ ସମୟରେ ତାଙ୍କୁ ପରାଜୟ ବରଣ କରିବାକୁ ପଡ଼ିଛି। ୨୦୨୪ ନିର୍ବାଚନ ଥିବାରୁ ଜୟଦେବ କଂଗ୍ରେସର ଘର ସଜାଡ଼ିବାରେ ଲାଗିଛନ୍ତି। ଆନନ୍ଦପୁର ଏବଂ ହାଟଡିହୀ ବ୍ଲକର ବିଭିନ୍ନ ଅଞ୍ଚଳରେ ସଭା, ସମିତି ଆରମ୍ଭ କଲେଣି। ସେ କର୍ମୀମାନଙ୍କୁ ଏକଜୁଟ କରି ରାଜ୍ୟ ଏବଂ କେନ୍ଦ୍ର ସରକାରଙ୍କୁ ଭର୍ସନା କରିବା କାର୍ଯ୍ୟ ଆରମ୍ଭ କରିଛନ୍ତି। ବିରୋଧୀଙ୍କ ଆଗରେ ନିଜ ଥାଟ ଦେଖାଇବା ପାଇଁ ୫୦୦ ଟଙ୍କା ଭଡ଼ା ଦେଇ ଲୋକଙ୍କୁ ସଭାସ୍ଥଳକୁ ବୁହାଇ ଆଣୁଥିବା ଆଲୋଚନା ହେଉଛି। ୨୦୧୯ ନିର୍ବାଚନ ପରେ ନିର୍ବାଚନମଣ୍ଡଳୀରେ ଦେଖାଦେଇ ନ ଥିବା ଜୟଦେବ ଓ ତାଙ୍କ ସମର୍ଥକମାନେ ଏବେ ସକ୍ରିୟ ହେବା ବିଷୟକୁ କାହାରିକୁ ବୁଝାଇବା ଦରକାର ନାହିଁ ବୋଲି ରାଜନୈତିକ ସମୀକ୍ଷକମାନେ ମତ ରଖୁଛନ୍ତି।
ଏଥର ଜୟଦେବ ନା ତାଙ୍କ ପୁଅ ମନୋଜ କିଏ ପ୍ରାର୍ଥୀ ହେଉଛନ୍ତି, ତାହାକୁ ଦଳୀୟ କର୍ମୀ ଅନାଇ ରହିଛନ୍ତି। କାରଣ କଂଗ୍ରେସ ତରଫରୁ ଆୟୋଜିତ ସଭାସମିତିରେ ଲାଗୁଥିବା ବ୍ୟାନରର ଗୋଟିଏ ପଟେ ଜୟଦେବଙ୍କ ଫଟୋ ଥିବା ବେଳେ ଅନ୍ୟ ପଟେ ତାଙ୍କ ପୁଅଙ୍କ ଫଟୋ ଦେଖିବାକୁ ମିଳୁଛି l ଏପରି ସ୍ଥଳେ ଜୟଦେବ ନିଜ ପାଇଁ ନା ତାଙ୍କ ପୁଅ ପାଇଁ ଏଥର ରାଜନୀତି ମଇଦାନକୁ ଓହ୍ଲାଇଛନ୍ତି ତାହା ବୁଝାପଡୁନି l ଜୟଦେବ ରାଜନୀତିରୁ ସନ୍ନ୍ୟାସ ନେଇ ତାଙ୍କ ସ୍ଥାନରେ ତାଙ୍କ ପୁଅଙ୍କୁ ସୁଯୋଗ ଦେବେ ବୋଲି କେହି କେହି କହୁଥିବା ବେଳେ ଆସନ୍ତା ନିର୍ବାଚନର ସ୍ଥିତିକୁ ଲକ୍ଷ୍ୟରେ ରଖି ଜୟଦେବ ଆବଶ୍ୟକ ପଡ଼ିଲେ ପ୍ରାର୍ଥୀ ହୋଇ ପାରନ୍ତି ବୋଲି ଆଉ କେହି କହୁଛନ୍ତିନ୍। କିନ୍ତୁ ଜୟଦେବ ଏବଂ ତାଙ୍କ ପୁଅଙ୍କୁ ଛାଡି ଦେଲେ କଂଗ୍ରେସରେ ଅନ୍ୟ କୌଣସି ଆଶାୟୀ ପ୍ରାର୍ଥୀ ଥିବା ନେଇ ଅଦ୍ୟାବଧି ଜଣାପଡ଼ିନି l
ଗତ ୨୦୦୯, ୨୦୧୪, ୨୦୧୯ ନିର୍ବାଚନରେ କଂଗ୍ରେସ ଦ୍ୱିତୀୟ ସ୍ଥାନରେ ରହି ଲଗାତର ଭାବେ ବିଜେଡିଠାରୁ ପରାଜିତ ହେଉଛି l ୨୦୦୯ ରେ କଂଗ୍ରେସ ୪୮,୯୬୦ ଖଣ୍ଡ, ୨୦୧୪ରେ ୬୦,୨୯୬ ଖଣ୍ଡ ଏବଂ ୨୦୧୯ରେ ୪୫,୬୫୭ ଖଣ୍ଡ ଭୋଟ ପାଇଥିଲା l ଶେଷ ଦୁଇଟି ନିର୍ବାଚନକୁ ଦେଖିଲେ କଂଗ୍ରେସର ଭୋଟ କମୁଥିବା ଲକ୍ଷ୍ୟ କରାଯାଉଛି l ପୁଣି ଯଦି ବିଜେଡି-ଭାଜପା ମେଣ୍ଟ ହୁଏ, ତେବେ କଂଗ୍ରେସ କିଭଳି ସ୍ଥିତିରେ ରହିବ ତାହା ବଡ଼ କଥା। କର୍ମୀ ଏବଂ ଭୋଟରମାନେ ମଧ୍ୟ ଏ ନେଇ ଭିତିରି ଆଲୋଚନା ଏବଂ ଅସନ୍ତୋଷ ବ୍ୟକ୍ତ କରୁଛନ୍ତିି। ଏଭଳି ସ୍ଥଳେ କଂଗ୍ରେସ ଭୋଟର ‘ଦିନେ ନାହିଁ, କାଳେ ନାହିଁ, ଗହ୍ମା ପୁନେଇଁରେ ମାଇଁ ମାଇଁ’ ଭଳି ନିର୍ବାଚନ ସମୟରେ ଜୟଦେବଙ୍କୁ ଦେଖି ନାନା ପ୍ରଶ୍ନ ପଚାରୁଥିବା ଦେଖିବାକୁ ମିଳୁଛି।