ରାଉରକେଲା ଅଫିସ, ୭।୧୦: ସମୁଦ୍ର ଭିତରେ କ୍ରୁଜ ଜାହାଜରେ ଚାଲିଥିବା ଡ୍ରଗ୍ସ ପାର୍ଟି ମାମଲାରେ ରାଉରକେଲାର ୨ଯୁବକଙ୍କୁ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍ସିବି) ଗିରଫ କରିଛି। ସେମାନେ ହେଲେ ସିଭିଲଟାଉନଶିପ କ୍ୱାର୍ଟର୍ସ ନଂ. ପି ୨୧ରେ ବାସ କରୁଥିବା ଅଭିନ ସାହୁ(୩୦) ଏବଂ ଆର-୨୬ ଘରେ ବାସ କରୁଥିବା ମନିଷ ରାଜଗରିଆ (୨୬)। ମନିଷଙ୍କ କୁଆଁରମୁଣ୍ଡା ଅଞ୍ଚଳରେ ଏକ ସ୍ପଞ୍ଜ ଆଇରନ କାରଖାନା, ଅଭିନଙ୍କ ରାଉରକେଲା ରିଙ୍ଗରୋଡ଼ ଟ୍ୟାକ୍ସିଷ୍ଟାଣ୍ଡରେ ସୁନା ଅଳଙ୍କାର ଦୋକାନ ରହିଛି। ତେବେ ଅଭିନ ନିର୍ଦ୍ଦୋଷ ବୋଲି ତାଙ୍କ ବାପା ଦୀନା ସାହୁ କହିଛନ୍ତି।
ସେ କହିଛନ୍ତି, ପାର୍ବଣର ମାସ ଆସୁଥିବାରୁ ଅଭିନ ବିଭିନ୍ନ ଗହଣା କିଣିବା ପାଇଁ ୨ ସପ୍ତାହ ପୂର୍ବେ ମୁମ୍ବାଇ ଯାଇଥିଲେ। ଅନେକ ସମୟରେ ଅଭିନ ସୁନା ଅଳଙ୍କାର କିଣିବା ପାଇଁ ଦୁବାଇ, ବମ୍ବେ, ଅମୃତସର ଭଳି ବିଭିନ୍ନ ସ୍ଥାନକୁ ଯାଆନ୍ତି। ପୂର୍ବରୁ ଅଭିିନ କୌଣସି ନିଶା ଓ ଡ୍ରଗ୍ସ ନେଉ ନ ଥିବା ତାଙ୍କ ପରିବାର ଲୋକେ କହିଛନ୍ତି। ଅଭିନ ଏହି ଗହଣା ସାମଗ୍ରୀ କିଣିବା ପାଇଁ ମୁମ୍ବାଇ ଯାଇଥିବାବେଳେ ତାଙ୍କର କିଛି ବନ୍ଧୁଙ୍କ ସହ ଏକ ବ୍ୟାଚେଲର ପାର୍ଟିରେ ଯୋଗଦେବା ପାଇଁ ସେ କ୍ରୁଜ ଜାହାଜରେ ଥିଲେ। ସେ ଅନ୍ୟ ଏକ ପାର୍ଟିରେ ଥିଲେ। କିନ୍ତୁ ସେହି ସମୟରେ ମନିଷଙ୍କ ସମେତ ରାଉରକେଲାରୁ ଆଉ ୮ଜଣ ସାଙ୍ଗଙ୍କ ସହ ଭେଟ ହୋଇଥିଲା। ଏହି ପାର୍ଟିରେ ଶାହରୁଖ୍ ଖାନ୍ଙ୍କ ପୁଅ ଆର୍ୟନ ଆସିଥିବା କଥାଜାଣି ସେମାନେ ତାଙ୍କ ସହ ସେଲ୍ଫି ଫଟୋ ଉଠାଇବା ପାଇଁ ଅପେକ୍ଷା କରିଥିବାବେଳେ ହଠାତ ଏନ୍ସିବି ଚଢ଼ାଉ କରିଥିଲା। ଏଥିରେ ଅଭିନ ଧରାପଡ଼ିଯାଇଥିଲେ। ନିର୍ଦ୍ଦୋଷରେ ଅଭିନଙ୍କୁ ଗିରଫ କରାଯାଇଥିବାରୁ ତାଙ୍କୁ ଆଇନର ସାହାରା ନେଇ ରାଉରକେଲା ଆଣିବେ ବୋଲି ତାଙ୍କ ବାପା କହିଥିଲେ।