ବେଙ୍ଗାଲୁରୁ,୨୮।୧୧: ରୁଣ ବୋଝ ସାଙ୍ଗକୁ ଚାକିରି ହରାଇବା ଭୟ ଏବଂ କାଳେ ଝିଅକୁ ଦି’ଅଳି ଖାଇବାକୁ ଦେଇପାରିବେ ନାହିଁ ବୋଲି ଭାବି ଭାଙ୍ଗିପଡ଼ିଥିଲେ ବାପା। ଯାହାର କରୁଣ ପରିଣତି ଏବେ ସମସ୍ତଙ୍କ ସାମ୍ନାରେ। ନିଜ ୨ ବର୍ଷର ଝିଅଙ୍କୁ ସାଙ୍ଗରେ ଧରି ଆତ୍ମହତ୍ୟା ଉଦ୍ୟମ କରିଛନ୍ତି ଉକ୍ତ ବ୍ୟକ୍ତି ଜଣକ। ଏଭଳି ଏକ ଅଭାବାନୀୟ ଘଟଣା ଘଟିଛି କର୍ନାଟକର କୋଲାର ତାଲୁକା ଅଧୀନ କେନଦାତି ଗ୍ରାମରେ। ଗାଁର ଏକ ହ୍ରଦରୁ ୨ ବର୍ଷୀୟ ଝିଅର ମୃତଦେହ ଉଦ୍ଧାର କରିଛି ପୋଲିସ। ଏପରିକି ପୋଲିସ ହ୍ରଦ ନିକଟରୁ ଏକ କାର୍ ମଧ୍ୟ ଜବତ କରିଛି। ପ୍ରଥମେ ଗାଁ ଲୋକ ଉକ୍ତ କାରକୁ ଦେଖି ପୋଲିସ ଷ୍ଟେସନରେ ଖବର ଦେଇଥିଲେ। ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ଝିଅକୁ ହତ୍ୟା କରିବା ଅଭିଯୋଗରେ ପୋଲିସ ବାପା ରାହୁଲ ପାରମରଙ୍କୁ ଗିରଫ କରିଛି। ରାହୁଲଙ୍କ ଘର ଗୁଜରାଟରେ ହୋଇଥିବା ବେଳେ ସେ ବେଙ୍ଗାଲୁରୁରେ ନିଜ ସ୍ତ୍ରୀ ଓ ଝିଅଙ୍କ ସହ ରହୁଥିଲେ।
ସୂଚନା ମୁତାବକ, ରାହୁଲଙ୍କ ଋଣ ଭାର ଦିନକୁ ଦିନ ବଢ଼ି ଚାଲିଥିଲା। ଋଣ ପରିଶୋଧ କରି ପାରୁ ନ ଥିବାରୁ ଋଣଦାତା ବିଭିନ୍ନ ସମୟରେ ଟଙ୍କା ମାଗିବା ସହ ବିଭିନ୍ନ ପ୍ରକାର ଧମକ ଦେଉଥିଲେ। ଏପରିକି ସେ ପରିବାର ଚଳାଇବାକୁ ମଧ୍ୟ ସକ୍ଷମ ନ ଥିଲେ। ଏନେଇ ସେ ସବୁବେଳେ ମାନସିକ ଚାପରେ ରହୁଥିଲେ। ଏଥିରେ ସେ ମାନିସିକ ଭାରସାମ୍ୟ ହରାଇ ୨ବର୍ଷର ଝିଅଙ୍କୁ ହତ୍ୟା କରି ନିଜେ ଆତ୍ମହତ୍ୟା କରିବାକୁ ସ୍ଥିର କରିଥିଲେ। ଏନେଇ ରାହୁଲ ଝିଅଙ୍କୁ ଧରି କାରରେ ଘରୁ ବାହାରିଯାଇଥିଲେ। ପରେ ସେ କର୍ନାଟକର କୋଲାର ତାଲୁକା ଅଧୀନ କେନଦାତି ଗାଁ ନିକଟରେ ଥିବା ଏକ ହ୍ରଦରେ ପହଞ୍ଚିଥିଲେ। ସେ ଝିଅକୁ ଧରି ବେଶ କିଛି ସମୟ ବିତାଇବା ସହ ଖେଳିଥିଲେ ଏବଂ ପରେ ବହୁ କାନ୍ଦିଥିଲେ। ଶେଷରେ ଝିଅକୁ ଧରି ସେ ହ୍ରଦକୁ ଡେଇଁ ପଡିଥିଲେ। ଝିଅ ପାଣିରେ ବୁଡି ପ୍ରାଣ ହରାଇଥିବା ବେଳେ ରାହୁଲ ଅଳ୍ପକେ ବର୍ତ୍ତି ଯାଇଥିଲେ। ଅନ୍ୟପକ୍ଷେ ନଭେମ୍ବର ୧୫ରେ ରାହୁଲ ଓ ତାଙ୍କ ଝିଅ ନିଖୋଜ ଥିବା ନେଇ ସ୍ତ୍ରୀ ସ୍ଥାନୀୟ ଥାନାରେ ଅଭିଯୋଗ କରିଥିଲେ ବୋଲି ପୋଲିସ କହିଛି।
