ଫୁଲବାଣୀ,୨୭।୩(ରାକେଶ କୁମାର ରାଉତ): ଫୁଲବାଣୀ ଟାଉନ ଥାନା ଅନ୍ତର୍ଗତ କେନ୍ଦୁପଦର ସାହିରେ ଜଣେ ନାବାଳକଙ୍କ ମୃତଦେହ ଝୁଲନ୍ତା ଅବସ୍ଥାରେ ଜବତ ହୋଇଛି। ସେ ହେଲେ ଅଭିଜିତ୍ ବଗର୍ତ୍ତୀ(୧୫)। ଅଭିଜିତ୍ଙ୍କ ମୃତ୍ୟୁ ପଛରେ ତାଙ୍କ ବାପାଙ୍କ ହାତ ରହିଥିବା ମା’ ଏବଂ ସମ୍ପର୍କୀୟ ଅଭିଯୋଗ କରିଛନ୍ତି। ପୋଲିସ ଅଭିଜିତ୍ଙ୍କ ବାପା ପ୍ରମୋଦ ବଗର୍ତ୍ତୀଙ୍କୁ ଅଟକ ତଦନ୍ତ ଆରମ୍ଭ କରିଛି।
ଚଳିତବର୍ଷ ଅଭିଜିତ୍ ମାଟ୍ରିକ୍ ପରୀକ୍ଷା ଦେଇଥିଲେ। ବୁଧବାର ମା’ ଜୟନ୍ତୀ ଓ ପୁଅ ଖାଇପିଇ ଘରେ ଥିଲେ। କିଛି ସମୟ ପରେ ଜୟନ୍ତୀ ଅନ୍ୟ ଘରେ କାମ କରିବାକୁ ବାହାରି ଯାଇଥିଲେ। ସେଠାରୁ ଫେରିବା ବେଳକୁ ଘର କବାଟ ଭିତରପଟୁ ବନ୍ଦ ଥିଲା। କବାଟ ବାଡ଼େଇବାରୁ ଅଭିଜିତ କୌଣସି ଉତ୍ତର ଦେଇ ନ ଥିଲେ ା ପଡ଼ୋଶୀ ଏବଂ ପରିବାର ଲୋକେ ଘର ଖୋଲି ଭିତରକୁ ଯିବାରୁ ଅଭିଜିତ୍ ଫ୍ୟାନରେ ଝୁଲୁଥିବା ଦେଖିଥିଲେ। ତୁରନ୍ତ ପୋଲିସକୁ ଘଟଣା ସମ୍ପର୍କରେ ଖବର ଦିଆଯାଇଥିଲା।
ପୋଲିସ ପହଞ୍ଚି ମୃତଦେହ ଜବତ କରିବା ସହ ଜିଲା ମୁଖ୍ୟ ଚିକିତ୍ସାଳୟରେ ବ୍ୟବଚ୍ଛେଦ କରାଇଛି। ଏନେଇ ଜୟନ୍ତୀ ଥାନାରେ ଏତଲା ଦେଇଛନ୍ତି। ପୋଲିସ ଏତଲା ଆଧାରରେ ବାପା ପ୍ରମୋଦଙ୍କୁ ଅଟକ ରଖି ପଚରାଉଚରା କରୁଛି। ସ୍ବାମୀ ଓ ପୁଅ ମଧ୍ୟରେ ପାଟିତୁଣ୍ଡ ହେଉଥିଲା। ପୁଅର ଚୁଟିକୁ ନେଇ ସ୍ବାମୀ ପାଟିତୁଣ୍ଡ କରନ୍ତି। ଅନେକ ସମୟରେ ସେ ନିଶାସକ୍ତ ଅବସ୍ଥାରେ ଆସି ପୁଅକୁ ଗାଳିଗୁଲଜ କରୁଥିଲେ। ଏଥିଯୋଗୁ ପୁଅ ଆତ୍ମହତ୍ୟା କରିଥାଇପାରେ ବୋଲି ଜୟନ୍ତୀ କହିଛନ୍ତି। ଏ ନେଇ ଥାନା ଅଧିକାରୀ ପି.ସ୍ବରୂପ କିଷାନଙ୍କୁ ପଚାରିବାରୁ ଆମେ ସବୁ ଦିଗକୁ ନେଇ ତଦନ୍ତ କରୁଛୁ। ବ୍ୟବଚ୍ଛେଦ ରିପୋର୍ଟ ଆସିବା ପରେ ତଦନ୍ତ ଆଗକୁ ବଢ଼ିବ ବୋଲି ସେ ପ୍ରକାଶ କରିଛନ୍ତି।
