ଶେରଗଡ଼,୨୮ା୨(ସୂର୍ଯ୍ୟ ନାରାୟଣ ଦାଶ): ଗଞ୍ଜାମ ଜିଲା ଶେରଗଡ଼ ବ୍ଲକରେ ଗୁରୁବାର ରାତି ୧୦ଟାରେ ଏକ ହତ୍ୟାକାଣ୍ଡ ଘଟିଛି। ପୁଅର ଟାଙ୍ଗିଆ ଚୋଟରେ ବାପାଙ୍କ ମୃତ୍ୟୁ ହୋଇଛି। ଖବର ପାଇ ଶେରଗଡ଼ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚତ୍ ଘଟଣାର ତଦନ୍ତ କରିଛି। ଅଭିଯୁକ୍ତ ପୁଅ ଯୁଗଳ ଶିଅଳଙ୍କୁ ଗିରଫ କରାଯାଇଛି।
ଖବରରୁ ଜଣାପଡିଛି, ବ୍ଲକର ତାକରଡା ଗ୍ରାମର ପନ୍ଦରା ସାହିରେ ତାରିଣୀ ମଳିକଙ୍କ ପରିବାର ବସବାସ କରନ୍ତି। ତାରିଣୀଙ୍କ ସ୍ତ୍ରୀଙ୍କ ଦୀର୍ଘଦିନ ହେଲା ମୃତ୍ୟୁ ଘଟିସାରିଛି। ପୁଅ ଯୁଗଳ ଓ ବୋହୁଙ୍କ ସହ ସେ ଚଳନ୍ତି। ମାତ୍ର ସେ ଅନେକ ଦିନ ହେଲା ଅସୁସ୍ଥ ହୋଇପଡିଥିଲେ। କିଛି ଦିନ ହେଲା ଯୁଗଳଙ୍କ ସ୍ତ୍ରୀ ବାପଘରକୁ ଯାଇଥିଲେ। ଏପରି ଅବସ୍ଥାରେ ଯୁଗଳ ବାପାଙ୍କ ସେବା କରି ଆସୁଥିଲେ। ଗୁରୁବାର ଯୁଗଳ ବାପାଙ୍କୁ ନେଇ ବ୍ରହ୍ମପୁର ବଡ ଡାକ୍ତରଖାନାରେ ଚିକିତ୍ସା କରି ଆଣିଥିଲେ। ରାତି ୧୦ଟାରେ ତାରିଣୀଙ୍କ ଗୋଡରେ ଭୀଷଣ ଯନ୍ତ୍ରଣା ଅନୁଭୂତ ହୋଇଥିଲା। ସେ କିଛି ବ୍ୟବସ୍ଥା କରିବାକୁ କହିଥିଲେ। ବାପାଙ୍କ ସେବାଶ୍ରୁଷସା କରି ଥକି ପଡିଥିବା ଯୁଗଳ ବାପାଙ୍କ ଉପରେ ବିରକ୍ତ ହୋଇଥିଲେ। ଫଳରେ ବାପା ପୁଅଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ଯୁଗଳ ଏକ ଟାଙ୍ଗିଆ ଆଣି ତାରିଣୀଙ୍କ ବେକକୁ ହାଣି ଦେଇଥିଲେ। ଫଳରେ ତାଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିଲା। ଖବର ପାଇ ପୋଲିସ ପହଞ୍ଚତ୍ ମୃତଦେହ ଡାକ୍ତରଖାନା ପଠାଇବା ସହ ଯୁଗଳଙ୍କୁ ଧରି ନେଇ ଥାନାରେ ଅଟକ ରଖିଥିଲା। ଶୁକ୍ରବାର ତାଙ୍କୁ ଗିରଫ କରଯାଇଛି। ଅନ୍ୟପକ୍ଷରେ ତାରିଣୀଙ୍କ ମୃତଦେହ ବ୍ୟବଚ୍ଛେଦ ଲାଗି ବ୍ରହ୍ମପୁର ପଠାଯାଇଛି। ଯୁଗଳଙ୍କ ଦାଦା ନାରାୟଣ ନାୟକଙ୍କ ଏତାଲାକୁ ଭିତ୍ତିକରି ପୋଲିସ ନଂ. ୧୨୧/୨୫ରେ ମାମଲା ରୁଜୁ କରିଛି। ଥାନା ଅଧିକାରୀ ବିରେନ୍ଦ୍ର ସିଆଳଙ୍କ ନେତୃତ୍ୱରେ ଏସ୍ଆଇ ସତ୍ୟଜିତ ବେଣିଆ ଓ ଏଏସ୍ଆଇ କୃଷ୍ଣଚନ୍ଦ୍ର ଦାଶ, ଛତ୍ରପୁରରୁ ସାଇଣ୍ଟିଫିକ ଟିମ୍ ଗ୍ରାମରେ ପହଞ୍ଚତ୍ ତଦନ୍ତ ଜାରି ରଖିଛନ୍ତି।
