ଓ୍ବାଶିଂଟନ୍, ୨୪ା୧:କ୍ରିପ୍ଟୋ କୁଇନ୍ ଭାବେ ଦେଶ ବିଦେଶରେ ଜଣାଯାଉଥିବା ରୁଜା ଇଗ୍ନାଟୋଭାଙ୍କୁ ଧରିବା ଲାଗି ଆମେରିକୀୟ ତଦନ୍ତକାରୀ ସଂସ୍ଥା ଏଫ୍ବିଆଇ (ଫେଡେରାଲ୍ ବ୍ୟୁରୋ ଅଫ୍ ଇନ୍ଭେଷ୍ଟିଗେଶନ୍) ଆପ୍ରାଣଚେଷ୍ଟା ଚଳାଇଛି। ଏଫ୍ବିଆଇର ଟପ୍ ୧୦ ମୋଷ୍ଟ ଓ୍ବାଣ୍ଟେଡ୍ ଲିଷ୍ଟରେ ଥିବା ୪୨ ବର୍ଷୀୟା ରୁଜା ‘ଓ୍ବାନ୍କଏନ୍’ କ୍ରିପ୍ଟୋକରେନ୍ସି ଜରିଆରେ ବହୁ ନିବେଶକଙ୍କଠାରୁ ୪ ବିଲିୟନ୍ ଡଲାର (୩୨,୫୮୦ କୋଟି ଟଙ୍କା) ଠକି ନେଇଥିବା ଅଭିଯୋଗ ତାଙ୍କ ନାଁରେ ରହିଛି। ଦୁବାଇଠାରୁ ଆରମ୍ଭ କରି ଲଣ୍ଡନ୍ ପ୍ରତ୍ୟେକ ଧନୀ ରାଷ୍ଟ୍ରର ଇନ୍ଭେଷ୍ଟର କ୍ରିପ୍ଟୋ କୁଇନ୍ଙ୍କ ଜାଲରେ ପଡ଼ି ଠକାମିର ଶିକାର ହୋଇଛନ୍ତି। ‘ବିଟ୍କଏନ୍’ର ସଫଳତାରେ ଅନୁପ୍ରାଣିତ ହୋଇ ରୁଜା ‘ଓ୍ବାନ୍କଏନ୍’ ନାମରେ ଏକ କ୍ରିପ୍ଟୋକରେନ୍ସି ୨୦୧୬ରେ ଆରମ୍ଭ କରିଥିଲେ। ତାଙ୍କର ଲକ୍ଷ୍ୟ ଥିଲା ‘ବିଟ୍କଏନ୍’କୁ ପଛରେ ପକାଇବା। ଇନ୍ଭେଷ୍ଟର୍ସଙ୍କ ବିଶ୍ୱାସଭାଜନ ହେବା ଲାଗି ରୁଜା ବିଦେଶରେ ବହୁ ସେମିନାରର ଆୟୋଜନ କରୁଥିଲେ। ତାଙ୍କ କଥାରେ ଥିବା ଯାଦୁକରି ପାଇଁ ଲୋକେ ସହଜରେ ‘ଓ୍ବାନ୍କଏନ୍’ ଉପରେ ବିଶ୍ୱାସ କରୁଥିଲେ।
‘ଓ୍ବାନ୍କଏନ୍’ ଲଞ୍ଚ୍ କରିବାର ୧୬ ମାସ ପରେ ପାଖାପାଖି ୪ ବିଲିୟନ୍ ଡଲାର ନେଇ ରୁଜା ବୁଲଗେରିଆର ସୋଫିଆରୁ ଫ୍ଲାଇଟ୍ ଯୋଗେ ଗ୍ରୀସ୍ ଯାଇଥିବା ସନ୍ଦେହ କରାଯାଉଛି। ହେଲେ ଏହାପରଠାରୁ ରୁଜା କୌଣସି ଆଡ଼େ ଅନ୍ତର୍ଦ୍ଧାନ ହୋଇଯାଇଥିବାବେଳେ ତାଙ୍କ ଠିକଣା ଏଫ୍ବିଆଇ ଖୋଜି ବାହାର କରିପାରୁ ନାହିଁ। ରୁଜାଙ୍କୁ ଧରିବା ପାଇଁ ୟୁଏସ୍ ଅଥରିଟି ପକ୍ଷରୁ ଜୋରସୋର ଉଦ୍ୟମ ଜାରି ରହିଛି। ଏଫ୍ବିଆଇର ପଳାତକ ସୂଚୀରେ ମୋଟ ୫୨୯ଜଣଙ୍କ ନାମ ଥିବାବେଳେ ସେଥିମଧ୍ୟରୁ ୧୧ ମହିଳା ଅଛନ୍ତି। ସେହି ମହିଳାଙ୍କ ମଧ୍ୟରେ ଥିବା ରୁଜା କେବଳ ଟପ୍ ୧୦ରେ ଅଛନ୍ତି। ଏହାଛଡ଼ା ୟୁରୋପ ସରକାର ରୁଜାଙ୍କୁ ପଳାତକ ତାଲିକାଭୁକ୍ତ କରିଛି। ଧରା ନ ପଡ଼ିବା ଲାଗି ରୁଜା ପ୍ଲାଷ୍ଟିକ୍ ସର୍ଜରି କରିଥାଇ ପାରନ୍ତି ବୋଲି ଆମେରିକୀୟ ତଦନ୍ତକାରୀ ସଂସ୍ଥା ସନ୍ଦେହ କରୁଛି। ‘ବିଟ୍କଏନ୍’ ପରି ‘ଓ୍ବାନ୍କଏନ୍’ରେ ବ୍ଲକ୍ଚେନ୍ ଟେକ୍ନୋଲୋଜି ନ ଥିବାରୁ ନିବେଶକମାନଙ୍କୁ ତାଙ୍କ ଟଙ୍କା ଫେରି ପାଇବାର କୌଣସି ସୁଯୋଗ ନ ଥିବା କୁହାଯାଉଛି। ଅନ୍ୟପକ୍ଷେ ଯେଉଁବ୍ୟକ୍ତି ରୁଜାଙ୍କ ବାବଦରେ ତଦନ୍ତକାରୀ ସଂସ୍ଥାକୁ ତଥ୍ୟ ଦେବେ ତାଙ୍କୁ ୧,୦୦,୦୦୦ ଡଲାର ପୁରସ୍କାର ରାଶି ପ୍ରଦାନ କରାଯିବ ବୋଲି ଏଫ୍ବିଆଇ କହିଛି।
ଜର୍ମାନ ନାଗରିକ ରୁଜାଙ୍କ ଜନ୍ମ ବୁଲ୍ଗେରିଆରେ। ତାଙ୍କ ମା’ ପେସାରେ ଜଣେ ଶିକ୍ଷୟିତ୍ରୀ ହୋଇଥିବାବେଳେ ବାପା ଇଞ୍ଜିନିୟର୍ । ଅକ୍ସଫୋର୍ଡ ୟୁନିଭର୍ସିଟିରେ ଶିକ୍ଷା ଗ୍ରହଣ କରିଥିବା ରୁଜା ସୋଫିଆର ଏମ୍ସିକିନ୍ସେ ଆଣ୍ଡ୍ କମ୍ପାନୀ, ଇଣ୍ଟର ନ୍ୟାଶନାଲ ମ୍ୟାନେଜ୍ମେଣ୍ଟ କନ୍ସଲ୍ଟିଙ୍ଗ ଫାର୍ମରେ କନ୍ସଲ୍ଟାଣ୍ଟ ଭାବେ ନିଜ ଚାକିରି ଜୀବନ ଆରମ୍ଭ କରିଥିଲେ। କ୍ରିପ୍ଟୋ କୁଇନ୍ ରୁଜା ପିଲାଟିବେଳୁ ଧନୀ ହେବାର ସ୍ବପ୍ନ ଦେଖୁଥିଲେ।