ନାଉଗାଁ,୧୦ା୩(ସ୍ବ.ପ୍ର):କେନ୍ଦ୍ର ସରକାରଙ୍କର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) କାର୍ଯ୍ୟକାରୀ ହେଉଛି। ଦାରିଦ୍ର୍ୟ ଦୂରିକରଣ କରିବା ସହ ସମସ୍ତ ଶ୍ରମିକଙ୍କୁ ଶ୍ରମ ପ୍ରଦାନ କରିବା । ଏଥିସହ ରାଜ୍ୟ ତଥା ବାହାରକୁ ଦାଦନ ଖଟିବାକୁ ଯାଉଥିବା ଶ୍ରମିକଙ୍କୁ ନିଜ ଅଞ୍ଚଳରେ କାମ ଦେବା ଏହାର ମୂଳ ଲକ୍ଷ୍ୟ। ଏହି ଯୋଜନାରେ କାର୍ଯ୍ୟ କରିବାକୁ ହେଲେ ଶ୍ରମିକମାନେ ନିଜ ପଞ୍ଚାୟତରେ ଜବକାର୍ଡ ମାଧ୍ୟମରେ କାର୍ଯ୍ୟ କରି ପାରିବେ। ଏହି ଯୋଜନା ମାଧ୍ୟମରେ ବ୍ଲକ ପ୍ରଶାସନ ପକ୍ଷରୁ ପଞ୍ଚାୟତଗୁଡ଼ିକରେ ବିଭିନ୍ନ ପ୍ରକଳ୍ପ କାର୍ଯ୍ୟ କରାଯାଉଛି। କିନ୍ତୁ ଅଧିକାଂଶ କାର୍ଯ୍ୟ ଠିକାଦାର ମେଶିନ ଦ୍ୱାରା କରୁଥିବା ବେଳେ କାଗଜକଲମରେ ଜବକାର୍ଡଧାରୀଙ୍କ ନାମ ରଖା ଯାଉଥିବା ଅଭିଯୋଗ ହେଉଛି। ଏହାକୁ ସଫଳ ରୂପାୟନ ଓ ତଦାରଖ ଦାୟିତ୍ୱ ବିଭାଗୀୟ ଯନ୍ତ୍ରୀ ରହିଥିବା ବେଳେ ଏମ୍ଜିଏନ୍ଆର୍ଇଜିଏସ୍ର ଅତିରିକ୍ତ କାର୍ଯ୍ୟକ୍ରମ ଅଧିକାରୀ ରହିଛନ୍ତି।
ଜଗତ୍ସିଂହପୁର ଜିଲା ନାଉଗଁା ବ୍ଲ୍ଳକରେ ଏମ୍ଜିଏନ୍ଆର୍ଇଜିଏସ୍ରେ କି କି ପ୍ରକଳ୍ପ କାର୍ଯ୍ୟ କରାଯାଇଛି ଜାଣିବାକୁ ଜଣେ ସାମାଜିକ କର୍ମୀ ୧୨ ଡିସେମ୍ବର ୨୦୨୨ ଜନ ସୂଚନା ଅଧୀକାର ଆଇନ ବଳରେ ତଥ୍ୟ ବ୍ଲକ ଜନସୂଚନା ଅଧିକାରୀଙ୍କୁ ମାଗିଥିଲେ। ଧାର୍ଯ୍ୟ ସମୟ ମଧ୍ୟରେ ଉକ୍ତ ତଥ୍ୟ ନ ମିଳିବାରୁ ପୁନର୍ବାର ପ୍ରଥମ ଅପିଲ କର୍ତ୍ତୃପକ୍ଷଙ୍କୁ ସାମାଜିକ କର୍ମୀ ଜଣକ ୧୩ ଜାନୁୟାରୀ ୨୦୨୩ରେ ଆବେଦନ କରିଥିଲେ। ପୁନର୍ବାର ଆବେଦନ ପରେ ବ୍ଲକ ପ୍ରଶାସନ ଚିଠି ନଂ. ୪୧୩/ ୨୦୨୩ ଫେବୃୟାରୀ ୧୩ରେ ମଗାଯାଇଥିବା ତଥ୍ୟ ଉପରେ ଶୁଣାଣି ପାଇଁ ଫେବୃୟାରୀ ୧୭ ରେ ବ୍ଲକ କାର୍ଯ୍ୟାଳୟରେ ପହଞ୍ଚତ୍ବା ପାଇଁ ଉଲ୍ଲେଖ ରହିଥିଲା। ଉକ୍ତ ତଥ୍ୟ ଉପରେ ଶୁଣାଣି ପରେ ଏମ୍ଜିଏନ୍ଆର୍ଇଜିଏସ୍ର ଅତିରିକ୍ତ କାର୍ଯ୍ୟକ୍ରମ ଅଧିକାରୀଙ୍କ ତଥ୍ୟ ଆଧାରରେ ଚିଠି ନଂ. ୫୮୨/ଫେବୃୟାରୀ ୨୭ ରେ ତଥ୍ୟ ପ୍ରଦାନ କରାଯାଇଥିଲା। ମଗାଯାଇଥିବା ତଥ୍ୟ ଅନ୍ଲାଇନରେ ଉପଲବ୍ଧ ବୋଲି ଲେଖା ଯାଇଛି। ଯାହାକି ସାଧାରଣରେ ଚର୍ଚ୍ଚାର ବିଷୟ ପାଲଟିଛି।
ସୂଚନାଯୋଗ୍ୟ, ଅନ୍ଲାଇନ ତଥ୍ୟ ବିଷୟରେ ଓ ତଥ୍ୟ ବାହାର କରିବା ସମସ୍ତଙ୍କ ପକ୍ଷେ ସମ୍ଭବ ନୁହେଁ। ତେବେ ଜନ ସୂଚନା ଅଧିକାର ଆଇନରେ ଏମ୍ଜିଏନ୍ଆର୍ଇଜିଏସ୍ ତଥ୍ୟ ପ୍ରଦାନ ନ କରିବା, ତଥ୍ୟ ଦେଲେ ବ୍ଲକ ପ୍ରଶାସନ ଅଡୁଆରେ ପଡ଼ି ପାରେ ବୋଲି ସାଧାରଣରେ ଚର୍ଚ୍ଚା ହେଉଛି। ସେହିପରି ମଗାଯାଇଥିବା ତଥ୍ୟ ମଧ୍ୟରୁ ଯେଉଁ ଅଳ୍ପ କେତେକ ପ୍ରଦାନ କରାଯାଇଛି, ସେଥିରେ ବ୍ଲକରେ ରହିଥିବା ୧୬ଟି ପଞ୍ଚାୟତ ମଧ୍ୟରୁ ଅଧିକାଂଶ ପଞ୍ଚାୟତରେ ଗୋଟିଏ ପ୍ରକଳ୍ପରେ କାର୍ଯ୍ୟ ବିଭିନ୍ନ ସମୟରେ ନାମ ପରିବର୍ତ୍ତନ କରାଯାଇ ଫଲସ୍ ବିଲ୍ ହୋଇଥିବା ଜଣାଯାଇଛି। ଏପରି କି ଏମ୍ଜିଏନ୍ଆର୍ଇଜିଏସ୍ ପାଇଁ କରାଯାଇଥିବା ଆଇନ୍ ଠିକ୍ ଭାବେ ପାଳନ କରାଯାଇ ନାହିଁ। ଏ ସମ୍ପର୍କରେ ଏବିଡିଓ ଦେବେନ୍ଦ୍ର ପ୍ରଧାନଙ୍କୁ ପଚାରିବାରେ ଏମ୍ଜିଏନ୍ଆର୍ଇଜିଏସ୍ ସମ୍ପର୍କିତ ତଥ୍ୟ ପ୍ରଦାନ କରିବାକୁ ଏପିଓଙ୍କୁ ପତ୍ର କରାଯାଇଥିଲା। ଏପିଓ ଯାହା ଦେଲେ ଆମେ ତଥ୍ୟ ମାଗିଥିବା ଆବେଦନକାରୀଙ୍କୁ ପଠାଇଛୁ ବୋଲି ସେ କହିଛନ୍ତି।