ଜଟଣୀ,୧।୮(ଡି.ଏନ୍.ଏ.): ଖୋର୍ଦ୍ଧା ଜିଲା ଜଟଣୀ ପୌରାଞ୍ଚଳର ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ଫଳରେ ମଶାଙ୍କ ପ୍ରାଦୁର୍ଭାବ ବଢ଼ିବାରେ ଲାଗିଛି। ଦୀର୍ଘଦିନ ଧରି ଅଳିଆ ସଫା ନ ହେବାରୁ ଡ୍ରେନ୍ଗୁଡ଼ିକରେ ଆବର୍ଜନା ପଡ଼ି ରହି ପୋତି ହୋଇଗଲାଣି। ଘରୁ ବାହାରୁଥିବା ଅପରିଷ୍କାର ପାଣି ଡ୍ରେନ୍ରେ ଜମିରହି ଦୁର୍ଗନ୍ଧମୟ ପରିବେଶ ସୃଷ୍ଟି କରୁଛି। ପୌର ପ୍ରଶାସନ ପକ୍ଷରୁ ଡ୍ରେନ୍ ସଫା କରାଯାଉ ନ ଥିବାରୁ ସହରରେ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। କରୋନାରୁ ଏଯାବତ୍ ମୁକ୍ତି ମିଳି ନ ଥିବା ବେଳେ ସ୍ଥାନୀୟ ବାସିନ୍ଦାଙ୍କୁ ଡେଙ୍ଗୁ ଭୟ ଘାରିଛି।
ସୂଚନାଥାଉ କି, ୬୩ ହଜାରରୁ ଊର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ଜଟଣୀ ସହରରେ ୨୩ଟି ଓ୍ବାର୍ଡ ରହିଛି। ତନ୍ମଧ୍ୟରୁୁ ୬ ଓ୍ବାର୍ଡ ରେଲଓ୍ବେ ଅଧୀନରେ ରହିଛି। ଅନ୍ୟ ୧୭ ଓ୍ବାର୍ଡରେ ସ୍ବଚ୍ଛ ଭାରତ ଯୋଜନା କାର୍ଯ୍ୟକ୍ରମ ପରିପ୍ରେକ୍ଷୀରେ ପରିମଳ ବ୍ୟବସ୍ଥାରେ ସୁଧାର ପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଉଥିଲେ ମଧ୍ୟ ପରିମଳ ବ୍ୟବସ୍ଥାରେ ସୁଧାର ଆସୁନାହିଁ। ବର୍ଷାଦିନ ପୂର୍ବରୁ ସହରର ଡ୍ରେନଗୁଡ଼ିକ ଠିକ୍ରେ ସଫା ହୋଇ ନ ଥିବାରୁ ଆବର୍ଜନା ଓ ପାଣି ଜମାହୋଇ ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ବିଭିନ୍ନ ଓ୍ବାର୍ଡର ସାହି ଓ ରାସ୍ତା କଡରେ ଅଳିଆ ଗଦାହୋଇ ପଚିଶଢ଼ି ଯିବାରୁ ଗନ୍ଧରେ ନାକ ଫାଟି ପଡୁଛି। ରାଜାବଜାର ମୁଖ୍ୟରାସ୍ତା ପଟେଲ ମାର୍ଗ ମୁଖ୍ୟ ଡ୍ରେନ୍ରେ ଆବର୍ଜନା ଜମି ରହିଛି। ଟାଉନ୍ହଲ (ସ୍ରଷ୍ଟା)ଠାରେ ଥିବା ଡ୍ରେନ୍ରେ ପାଣି ଜମିରହିବା ଫଳରେ ମଶା ବଂଶ ବୃଦ୍ଧି ପାଇବାରେ ସହାୟକ ହେଉଛି। ସୀତାରାମ କଲୋନୀ ଦେଇ ଯାଇଥିବା ମୁଖ୍ୟ ଡ୍ରେନ୍ରେ ବି ସମାନ ଅବସ୍ଥା। ଜଟଣୀ ସହରର ମୁଖ୍ୟ ରାସ୍ତାର ଉଭୟ ପାର୍ଶ୍ୱରେ ରହିଥିବା ଡ୍ରେନ୍ ସଫା ନ ହେବାରୁ ବର୍ଷା ହେଲେ ନର୍ଦ୍ଦମା ପାଣି ଲହଡି ଭାଙ୍ଗି କୃତ୍ରିମ ହ୍ରଦର ଭ୍ରମ ସୃଷ୍ଟି କରୁଛି। ଏହାର ସ୍ଥାୟୀ ସମାଧାନ ପାଇଁ ସ୍ଥାନୀୟ ବାସିନ୍ଦା ଦାବି କରୁଥିଲେ ମଧ୍ୟ ସୁଫଳ ମିଳୁନାହିଁ। ଏଥିପ୍ରତି ପୌରପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଜଟଣୀ ସହରବାସୀ କୌଣସି ସଂକ୍ରାମକ ରୋଗର ଶିକାର ହେବା ପୂର୍ବରୁ ପୌରପ୍ରଶାସନ ପରିମଳ ବ୍ୟବସ୍ଥାରେ ସୁଧାର ଆଣିବା ପାଇଁ ଭାଜପା ମିଡିଆ ସେଲ ସଂଯୋଜକ ପ୍ରଦୀପ ଜେନା ଅନୁରୋଧ କରିଛନ୍ତି। ଏ ସମ୍ପର୍କରେ ପୌରକାର୍ଯ୍ୟନିର୍ବାହୀ ଅଧିକାରୀ ଦିଲୀପ ମହାନ୍ତି କହିଛନ୍ତି, ମଶା ଧୂଅଁା, ମଶା ତେଲ ଏବଂ ବିଭିନ୍ନ ସ୍ଥାନରେ ବ୍ଲିଚିଂ ସିଞ୍ଚନ କରାଯାଉଛି। ଡ୍ରେନ୍ ସଫା କରାଯିବା ସହ ଉପଯୁକ୍ତ ରକ୍ଷଣାବେକ୍ଷଣ କରାଯାଉଛି। ଯେଉଁ ସ୍ଥାନରୁ ଅଭିଯୋଗ ଆସୁଛି ତୁରନ୍ତ ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି।