କେନ୍ଦୁଝର,୧୪ା୧୨(ନରେଶ ଚନ୍ଦ୍ର ପଟ୍ଟନାୟକ)କେନ୍ଦୁଝର ଜିଲାର ବହୁ ପ୍ରତୀକ୍ଷିତ କାନପୁର ଜଳସେଚନ ପ୍ରକଳ୍ପ ଚଳିତବର୍ଷ ଡିସେମ୍ବର ସୁଦ୍ଧା ନିର୍ମାଣ ଶେଷ ହୋଇ କାର୍ଯ୍ୟକ୍ଷମ ହେବା ନେଇ ଅନିଶ୍ଚିତତା ଦେଖାଦେଇଛି। ଅଦ୍ୟାବଧି ୯୦ ପ୍ରତିଶତ କାମ ସରିଥିବା ଜଳସମ୍ପଦ ବିଭାଗ ପକ୍ଷରୁ କୁହାଯାଉଥିଲେ ହେଁ ଜଙ୍ଗଲ ଅନୁମତି ମିଳିବାରେ ବିଳମ୍ବ କାରଣରୁ ବହୁ କାମ ବାକି ରହିଛି। ଅଦ୍ୟାବଧି ମୁଖ୍ୟ ଡ୍ୟାମ, ସ୍ପିଲ୍ ଓ୍ବେ ତଥା କେନାଲ କାମ ସରିନାହିଁ। ସେହିପରି ଜମି ଅଧିଗ୍ରହଣ, ଥଇଥାନ ତଥା କ୍ଷତିପୂରଣ ପ୍ରଦାନ ଆଦି କାମ ବାକି ରହିଛି। ଅନ୍ୟପକ୍ଷରେ ବ୍ୟୟ ଅଟକଳ ବୃଦ୍ଧି ପାଇ ୨୪୩୮ କୋଟି ଟଙ୍କା ରହିଥିବା ବେଳେ ପ୍ରକଳ୍ପ କାର୍ଯ୍ୟକ୍ଷମ ହେବା ବେଳକୁ ୩ ହଜାର କୋଟି ଟଙ୍କା ଟପିଯିବ ବୋଲି ମତପ୍ରକାଶ ପାଉଛି। ଫଳରେ ସରକାର କରିଥିବା ଘୋଷଣା ସମୟ ସୁଦ୍ଧା କାର୍ଯ୍ୟକ୍ଷମ ହେବା ନେଇ ଆଶଙ୍କା ସୃଷ୍ଟି ହୋଇଛି।
ଜଳସମ୍ପଦ ବିଭାଗର ଅଧିକାରୀ ପ୍ରସନ୍ନ ପାଣିଙ୍କ ସୂଚନା ଅନୁଯାୟୀ, ଚମ୍ପୁଆ, ସଦର ଓ ପାଟଣା ରେଞ୍ଜ୍ର ବିଭିନ୍ନ ଜଙ୍ଗଲ ଅଞ୍ଚଳ ଦେଇ କେନାଲ ଯାଉଥିବାରୁ ଏଥିପାଇଁ ଜଙ୍ଗଲ ଅନୁମତି ଆବଶ୍ୟକ। ଡ୍ୟାମ୍, ସ୍ପିଲ୍ଓ୍ବେ କାମ ସରିଛି। ଜଙ୍ଗଲ ଅନୁମତି ମିଳିବାରେ ବିଳମ୍ବ ଯୋଗୁ ଅବଶିଷ୍ଟ କାମ ଆରମ୍ଭ ହୋଇପାରୁନାହିଁ। ଏ ନେଇ ଜଳସମ୍ପଦ ବିଭାଗ ପକ୍ଷରୁ ଆବେଦନ ପରେ ଉକ୍ତ ରେଞ୍ଜର ୮୩୯ଟି ସ୍ଥାନରେ ୩୧୦.୧୧ ହେକ୍ଟର ପରିମିତ ଜଙ୍ଗଲ ଜମି ରହିଥିବା ଆକଳନ କରାଯାଇଥିଲା। ତେବେ ୨୦୧୬ରେ ଗଛ ଗଣତି ହୋଇ ପାଖାପାଖି ୬୦ ହଜାର ଗଛ ଚିହ୍ନଟ କରାଯାଇଥିଲା। ତେବେ ଜଳସମ୍ପଦ ବିଭାଗ ଦୀର୍ଘ ୮ ବର୍ଷ ହେଲା ଏହି ଜଙ୍ଗଲ କ୍ଷୟକ୍ଷତି ବାବଦକୁ ପାଖାପାଖି ୯୦ କୋଟି ଟଙ୍କା ବନ ବିଭାଗ ନିକଟରେ ଦାଖଲ କରିଥିଲା। ଅଦ୍ୟାବଧି ଅନୁମତି ମିଳୁ ନ ଥିବାରୁ କେନାଲ ଓ ଅନ୍ୟାନ୍ୟ କାମ ଆଗେଇପାରୁନାହିଁ। ସେ ସମୟରେ ଦାଖଲ ରିପୋର୍ଟ ଦୀର୍ଘ ୫ ବର୍ଷ ହେଲା ପଡ଼ିରହିଛି। ଫଳରେ ଏବେ ଗଛଗୁଡ଼ିକର ମୋଟେଇ ଓ ଉଚ୍ଚତା ବଢ଼ିଯାଇଛି। ଏବେ ଉକ୍ତ ଗଛ କାଟିବାକୁ ଅନୁମତି ଦେଲେ ସମସ୍ୟା ଉପୁଜିବ। ଏଣୁ ପୁଣି ଥରେ ଗଣନା ହେଉଛି। ଏଥିପାଇଁ ଅଧିକ ଟଙ୍କା ଜମା କରିବାକୁ ବନ ବିଭାଗ କହୁଥିବା ବେଳେ କେତେ ଟଙ୍କା ଜମା ହେବ କହୁନାହଁି। କେତେ ଟଙ୍କା ଜମା କରାଯିବ କହିଲେ, ଜମା କରିଦେବୁ ବୋଲି ସେ କହିଥିଲେ। ଚମ୍ପୁଆ ରେଞ୍ଜର ଅକ୍ଷୟ ଛତ୍ରିୟା କହିଛନ୍ତି, ସେ ସମୟରେ ଚିହ୍ନଟ ଗଛଗୁଡ଼ିକର ମୋଟେଇ ଓ ଉଚ୍ଚତା ଏବେ ବଢ଼ିଯାଇଛି। ଏଣୁ ଆଉଥରେ ଗଣନା କରାଯାଉଛି ା
ଅଧାରୁ ଅଧିକ ଗଣନା ସରିଯାଇଛି।
ସୂଚନାଯୋଗ୍ୟ, ଯୋଡ଼ା ବ୍ଲକ୍ ବାସୁଦେବପୁର ନିକଟରେ ବୈତରଣୀ ନଦୀ ଉପରେ କାନପୁର ଜଳସେଚନ ପ୍ରକଳ୍ପ ନିର୍ମାଣ ହେଉଛି। ପ୍ରାୟ ୪୦ ବର୍ଷ ହେବ ଏହି ପ୍ରକଳ୍ପର ପରିକଳ୍ପନା କରାଯାଇଥିବା ବେଳେ ୨୦୦୨ରେ ପ୍ଲାନିଂ କମିଟିର ଅନୁମୋଦନ ପରେ କାମ ଆରମ୍ଭ ହୋଇଥିଲା। ଏହା ଦ୍ୱାରା ଜିଲାର ଯୋଡ଼ା, ଚମ୍ପୁଆ, ଝୁମ୍ପୁରା, ସଦର ଓ ପାଟଣା ବ୍ଲକ୍ର ୨୨୪ ଗ୍ରାମର ୨୯ ହଜାର ହେକ୍ଟର ଜମିରେ ଜଲସେଚନ ହେବ ବୋଲି ଆଶା କରାଯାଇଛି।