ଓ୍ବାଶିଂଟନ, ୭।୧୦: ଦେଶରେ ମହିଳାଙ୍କ ସୁରକ୍ଷା ନେଇ ସରକାରଙ୍କ ପକ୍ଷରୁ ବହୁତ ପଦକ୍ଷେପ ଗ୍ରହଣ କରାଯାଇଛି। ତେବେ ବି ଝିଅ ବୋହୂମାନେ ନିଜକୁ ସୁରକ୍ଷିତ ମନେ କରି ପାରୁ ନାହାନ୍ତି। ରାସ୍ତାଘାଟ କଥା ତ ଛାଡ଼ ଏବେ ଅନ୍ ଲାଇନ୍ରେ ନିର୍ଯାତନା ଭୟରେ ବହୁ ଝିଅ ବୋହୂ ବାଧ୍ୟ ହୋଇ ସେମାନଙ୍କ ସୋସିଆଲ ମିଡ଼ିଆ ଆକାଉଣ୍ଟ ବନ୍ଦ କରିଦେଉଛନ୍ତି। ଏକ ସ୍ବେଚ୍ଛାସେବୀ ସଂଗଠନ ପ୍ଲାନ୍ ଇଣ୍ଟରନ୍ୟାଶନାଲ ପକ୍ଷରୁ କରାଯାଇଥିବା ଏକ ସର୍ଭେ ରିପୋର୍ଟ ଏସମ୍ପର୍କରେ ଉଲ୍ଲେଖ କରାଯାଇଛି। ଅନ୍ଲାଇନ୍ରେ ଅଶ୍ଳୀଳ ଶବ୍ଦ ବ୍ୟବହାର ଯୋଗୁ ଝିଅ ବୋହୂମାନେ ସୋସିଆଲ ମିଡ଼ିଆ ଛାଡ଼ିଥିବା ଏଥିରେ ଦର୍ଶାଯାଇଛି। ୫୮ ପ୍ରତିଶତରୁ ଅଧିକ ଝିଅ ବୋହୂ ବିଭିନ୍ନ ପ୍ରକାର ଅନ୍ଲାଇନ୍ ନିର୍ଯାତନା ସହୁଛନ୍ତି। ବ୍ରାଜିଲ୍, ଭାରତ, ଆମେରିକା, ନାଇଜେରିଆ, ସ୍ପେନ୍, ଥାଇଲାଣ୍ଡ୍ ସମେତ ୨୨ଟି ଦେଶରେ ଏହି ସର୍ଭେ ହୋଇଥିଲା। ସର୍ଭେରେ ୧୫ରୁ ୩୫ ବର୍ଷ ବୟସ୍କ ୧୪ ହଜାର ଝିଅ ବୋହୂଙ୍କୁ ସାମିଲ୍ କରାଯାଇଥିଲା। ସେମାନଙ୍କ ପ୍ରତି ଅନ୍ଲାଇନ୍ରେ ହେଉଥିବା ନିର୍ଯାତନା ସମ୍ପର୍କରେ ପ୍ରଶ୍ନ ପଚରା ଯାଇଥିଲା। ୧୯ ପ୍ରତିଶତ ସେମାନଙ୍କର ସୋସିଆଲ୍ ମିଡ଼ିଆ ଆକାଉଣ୍ଟ ବନ୍ଦ କରିଦେଇଥିବା ପ୍ରକାଶ କରିଥିଲେ। ସେହିପରି ୧୦ ପ୍ରତିଶତ ବିବାହିତା ମହିଳା ସୋସିଆଲ୍ ମିଡ଼ିଆରେ ସେମାନଙ୍କର ବ୍ୟକ୍ତିଗତ ତଥ୍ୟ ବଦଳାଇ ଦେଇଥିବା ସର୍ଭେ ସମୟରେ କହିଥିଲେ। ଏଭଳି ଘଟଣା ଫେସ୍ବୁକ୍ରେ ଅଧିକ ହେଉଥିବା ସର୍ଭେ ରିପୋର୍ଟରେ ପ୍ରକାଶ ପାଇଛି। ଫେସବୁକ୍ରେ ୩୯ ପ୍ରତିଶତ ଏଭଳି ଘଟଣା ଘଟୁଥିବା ବେଳେ ଇନଷ୍ଟାଗ୍ରାମ୍ରେ ୨୩ ପ୍ରତିଶତ, ହ୍ବାଟସ୍ଆପ୍ରେ ୧୪, ସ୍ନାପ୍ ଚାଟ୍ରେ ୧୦ ଏବଂ ଟୁଇଟରରେ ୯ ପ୍ରତିଶତ ଘଟଣା ଘଟୁଛି ବୋଲି ପ୍ଲାନ୍ ଇଣ୍ଟରନ୍ୟାଶନାଲର ସିଇଓ ଏନି ବିର୍ଗିଟ୍ଟି ଅଲ୍ବ୍ରେକ୍ଟସେନ୍ କହିଛନ୍ତି।