ଭୁବନେଶ୍ୱର, ୧୭।୩(କ୍ରୀଡ଼ା ପ୍ରତିନିଧି)- ପଟିଆଲାର ଏନ୍ଏସ ଏନ୍ଆଇଏସ୍ରେ ଆରମ୍ଭ ହୋଇଥିବା ୨୪ତମ ଜାତୀୟ ଫେଡେରେଶନ କପ୍ ସିନିୟର ଆଥଲେଟିକ୍ ଚାମ୍ପିୟନଶିପ୍ର ମହିଳା ୧୦୦ ମିଟର ଇଭେଣ୍ଟରେ ଜାତୀୟ ରେକର୍ଡଧାରିଣୀ ଓଡ଼ିଶାର ଦୂତୀ ଚାନ୍ଦ ରୌପ୍ୟ ପଦକରେ ସନ୍ତୁଷ୍ଟ ହୋଇଛନ୍ତି। ମଙ୍ଗଳବାର ଅନୁଷ୍ଠିତ ଫାଇନାଲରେ ଦୂତୀ ୧୧.୫୮ ସେକେଣ୍ଡ ସମୟ ନେଇ ଦ୍ୱିତୀୟ ସ୍ଥାନରେ ରହିଛନ୍ତି। ହିଟ୍ରେ ଭଲ ଟାଇମିଂ ରଖିଥିବା ତାମିଲନାଡ଼ୁର ଧନଲକ୍ଷ୍ମୀ ସେହି ପ୍ରଦର୍ଶନ ବଜାୟ ରଖି ୧୧.୩୯ ସେକେଣ୍ଡ ସହିତ ସ୍ବର୍ଣ୍ଣ ପଦକ ପାଇଛନ୍ତି। ଅନ୍ୟତମ ତାମିଲନାଡ଼ୁ ଧାବିକା ଅର୍ଚ୍ଚନା ସୁସେନ୍ଦ୍ରନ ୧୧.୭୬ ସେକେଣ୍ଡ ସମୟ ସହ ବ୍ରୋଞ୍ଜ ପଦକ ହାସଲ କରିଛନ୍ତି। ପଶ୍ଚିମବଙ୍ଗର ହିମାଶ୍ରୀ ରୟ, କର୍ନାଟକର ଧନେଶ୍ୱରୀ ଏ.ଟି., ତାମିଲନାଡ଼ୁର ସି. କାନିମୋଝି ଓ ମହାରାଷ୍ଟ୍ରର ଡିଣ୍ଡ୍ରା ଡୁଡ୍ଲି ଭାଲାଡା ପରବର୍ତ୍ତୀ ୪ ସ୍ଥାନରେ ରହିଛନ୍ତି। ଫଲ୍ସ ଷ୍ଟାର୍ଟ ଯୋଗୁ ଆସାମର ହିମା ଦାସ ରେସ୍ରୁ ବାଦ୍ ପଡ଼ିଥିଲେ। ପୁରୁଷ ବିଭାଗରେ ଜାତୀୟ ରେକର୍ଡଧାରି ଓଡ଼ିଶାର ଅମିୟ କୁମାର ମଲିକ ନିରାଶ କରିଛନ୍ତି। ୮ ପ୍ରତିଯୋଗୀ ବିଶିଷ୍ଟ ପୁରୁଷ ୧୦୦ ମିଟର ଫାଇନାଲରେ ସେ ୧୦.୭୫ ସେକେଣ୍ଡ ସମୟ ନେଇ ୭ମ ସ୍ଥାନରେ ରହିଛନ୍ତି। ହିଟ୍ ଓ ସେମିଫାଇନାଲରେ ଅମିୟ ୧୦.୭୩ ସେକେଣ୍ଡ ସମୟ ନେଇଥିଲେ। ପଞ୍ଜାବର ଗୁରିନ୍ଦରବୀର ସିଂ ୧୦.୩୨ ସେକେଣ୍ଡ ସହ ସ୍ବର୍ଣ୍ଣ, ତାମିଲନାଡ଼ୁର ଇ. କାନ୍ନାଡା ୧୦.୪୩ ସେକେଣ୍ଡ ନେଇ ରୌପ୍ୟ ଏବଂ ମହାରାଷ୍ଟ୍ରର କ୍ରିଷ୍ଣକୁମାର ସତୀଶ ଆର.୧୦.୫୬ ସେକେଣ୍ଡ ସହିତ ବ୍ରୋଞ୍ଜ ପଦକ ପାଇଛନ୍ତି।
