ମାଲକାନଗିରି,୨୪।୧(ଡି.ଏନ୍.ଏ.): ମାଲକାନଗିରି ଏସ୍ପି ଋଷିକେଶ ଡି.ଖିଲାରୀଙ୍କ ନିକଟରେ ଆଜି ଜଣେ ନାବାଳିକା ମାଓବାଦୀ ଆତ୍ମସମର୍ପଣ କରିଛନ୍ତି। ତାଙ୍କର ନାମ ଲାଛି ଖରା। ସେ ଆନ୍ଧ୍ର ଓଡ଼ିଶା ବର୍ଡର ମାଓବାଦୀ ସଙ୍ଗଠନର ସଦସ୍ୟ ଥିଲେ।
ଲାଛି କହିଛନ୍ତି, ନକ୍ସଲ ସଂଗଠନରେ ମହିଳା ସଦସ୍ୟଙ୍କୁ ନିର୍ଯାତନା ଦିଆଯାଉଛି। ତାଙ୍କ ମା’ ବାପାଙ୍କୁ ମାରପିଟ କରି ଓ ହତ୍ୟା ଧମକ ଦେଇ ତାଙ୍କୁ ଜୋର ଜବରଦସ୍ତ ମାଓବାଦୀ ସଂଗଠନରେ ସାମିଲ କରାଯାଇଥିଲା। ସେ ଦୁଇ ବର୍ଷ ଧରି ଏହି ସଂଗଠନର ସକ୍ରିୟ ସଦସ୍ୟ ଥିଲେ।
ଆଗାମୀ ଦିନରେ ରାଜ୍ୟ ସରକାରଙ୍କ ପକ୍ଷରୁ ଯେଉଁ ସବୁ ଥଇଥାନ ନୀତି ଅଛି ଉକ୍ତ ନୀତିରେ ତାଙ୍କୁ ସାମିଲ କରାଯିବା ସହ ସାମାଜିକ ମୁଖ୍ୟସ୍ରୋତରେ ସାମିଲ କରାଯିବ ବୋଲି ଏସ୍ପି ପ୍ରକାଶ କରିଛନ୍ତି। ତାଙ୍କୁ ପଢିବା ସହ ରହିବା ପାଇଁ ଘର ଓ ଆର୍ଥିକ ସହାୟତା ଏବଂ ତାଲିମ ଦିଆ ଯାଇ ସ୍ବାବଲମ୍ବୀ କରିବା ପାଇଁ ସମସ୍ତ ପ୍ରକାର ପଦକ୍ଷେପ ନିଆ ଯିବ ବୋଲି ପ୍ରକାଶ କରିଛନ୍ତି।
