ବରଗଡ଼ ଅଫିସ,୨୨।୫: ବରଗଡ଼ ଜିଲା ବରପାଲିରୁ ଗୁଜରାଟ ରାଜକୋଟକୁ ସ୍ବାମୀଙ୍କ ସହିତ କାମ ଅନ୍ବେଷଣରେ ଯାଇଥିବା ଜଣେ ମହିଳା ଶ୍ରମିକଙ୍କ ରବିବାର ସନ୍ଦେହଜନକ ମୃତ୍ୟୁ ଘଟିଛି। ମୃତା ମହିଳା ଜଣକ ହେଲେ, ବଲାଙ୍ଗୀର ଜିଲା ଟିଟିଲାଗଡ଼ ଥାନା ଲିମପଡ଼ା ନିବାସୀ ସୁଶାନ୍ତ ନାଗଙ୍କ ସ୍ତ୍ରୀ ପ୍ରତିମା(୨୩)। ପ୍ରତିମା ଆତ୍ମହତ୍ୟା କରିଥିବା ଶାଶୁଘର ଲୋକେ କହୁଥିବା ବେଳେ ପ୍ରତିମାଙ୍କୁ ତାଙ୍କ ସ୍ବାମୀ ହତ୍ୟା କରିଥିବା ନେଇ ବାପଘର ଲୋକେ ଅଭିଯୋଗ କରିଛନ୍ତି। ଏ ନେଇ ମୃତା ମହିଳାଙ୍କ ମା’ କର୍ପୁର ରବିବାର ବରପାଲି ଥାନାରେ ଏକ ଏତଲା ଦେଇଛନ୍ତି। ଏପରି କି ମାମଲାର ବିଧିବଦ୍ଧ ତଦନ୍ତ କରି ଗୁଜୁରାଟରୁ ମୃତଦେହ ଆଣିବା ଦିଗରେ ପଦକ୍ଷେପ ନେବାକୁ ବରଗଡ଼ ସାମାଜିକ କର୍ମୀ ଦୀପା ବାରିକ ଗୁଜରାଟ ଏବଂ ଓଡ଼ିଶା ସରକାରଙ୍କୁ ଟୁଇଟ୍ କରି ନିବେଦନ କରିଛନ୍ତି।
ପ୍ରକାଶ ଯେ, ବରଗଡ଼ ଜିଲା ବରପାଲି ପୌର ପରିଷଦ ଅଧୀନ ୱାର୍ଡ ନମ୍ବର-୩ର କର୍ପୁର ମହାନନ୍ଦଙ୍କ ଝିଅ ପ୍ରତିମା ଗତ ୫ବର୍ଷ ତଳେ ବଲାଙ୍ଗୀର ଜିଲା ଟିଟିଲାଗଡ଼ ଥାନା ଲିମପଡ଼ା ନିବାସୀ ଜମୁ ନାଗଙ୍କ ପୁଅ ସୁଶାନ୍ତଙ୍କୁ ବିବାହ କରିଥିଲେ। ବିବାହ ପରେ ଶାଶୁଘର ଲୋକେ ପ୍ରତିମାଙ୍କୁ ଯୌତୁକ ନିର୍ଯାତନା ଦେଇ ଆସୁଥିବା ବାପଘର ଲୋକେ ଅଭିଯୋଗ କରିଛନ୍ତି। ଗତ କିଛିଦିନ ତଳେ ପ୍ରତିମାଙ୍କୁ ଧରି ସୁଶାନ୍ତ ଗୁଜରାଟର ରାଜକୋଟ ଅଞ୍ଚଳକୁ କାମ କରିବାକୁ ଯାଇଥିଲେ। ରବିବାର ପ୍ରତିମା ଆତ୍ମହତ୍ୟା କରିଥିବା ନେଇ ଶାଶୁଘର ଲୋକେ ଫୋନ ଯୋଗେ ସୂଚନା ଦେଇଥିବା ପ୍ରତିମାଙ୍କ ମା’ କର୍ପୁର ଏତଲାରେ ଉଲ୍ଲେଖ କରିଛନ୍ତି। ଶନିବାର ଝିଅଙ୍କ ସହିତ ସେ କଥା ହୋଇଥିଲେ। ହେଲେ ରବିବାର ଝିଅର ମୃତ୍ୟୁ ଖବର ପାଇ କର୍ପୁର ଭାଙ୍ଗି ପଡିଛନ୍ତି।