ଓଡାପଡା,୬ା୭(ଡି.ଏନ.ଏ)- ଢେଙ୍କାନାଳ ଜିଲା କଣ୍ଟାବଣିଆ ଥାନା ଟାଟାଷ୍ଟିଲ ବିଏସ୍ଏଲ୍ କାରଖାନା ପରିସରରେ ମହିଳା ଠିକା ଶ୍ରମିକ ଜଲି ସାହୁ(୩୦)ଙ୍କୁ ସୋମବାର ହତ୍ୟା କରାଯାଇଛି। ଜଲିଙ୍କ ସହ ସମ୍ପର୍କ ରଖିଥିବା କେନ୍ଦୁଝର ଜିଲା ତେଲକୋଇ ଅଞ୍ଚଳର ଅଚ୍ୟୁତାନନ୍ଦ ଦାସ ଏହି ହତ୍ୟାକାଣ୍ଡ ଘଟାଇଥିବା ଥାନାରେ ଅଭିଯୋଗ ହୋଇଛି। ପୋଲିସ ନଂ. ୬୬/୨୦, ଦଫା ୩୦୨ରେ ମାମଲା ରୁଜୁ ସହ ତଦନ୍ତ ଜାରି ରଖିଥିବା ଥାନା ଅଧିକାରୀ ନିରଞ୍ଜନ ସେଠୀ ସୂଚନା ଦେଇଛନ୍ତି। ରାତି ପ୍ରାୟ ୭ଟା ୪୫ରେ କାରଖାନାର ଗେଟ୍ ନଂ-୧ ଦେଇ ଖସି ପଳାଉଥିବା ବେଳେ ଅଭିଯୁକ୍ତ ଅଚ୍ୟୁତାନନ୍ଦଙ୍କୁ ନିରାପତ୍ତାରକ୍ଷୀମାନେ କାବୁକରି ପୋଲିସକୁ ହସ୍ତାନ୍ତର କରିଥିବା ଜଣାପଡ଼ିଛି।
ପୋଲିସ କହିଛି, ଜଲିଙ୍କ ଘର ଦେବଗଡ ଜିଲା ବାରକୋଟ ଥାନା ବଡମ୍ ଅଞ୍ଚଳରେ। ବିବାହ ବିଚ୍ଛେଦ ହୋଇଥିବା ଜଲିଙ୍କ ଏକ ପୁତ୍ର ସନ୍ତାନ ରହିଛି। କିଛି ମାସ ପୂର୍ବରୁ ଜଲି କାମଖୋଜି କଣ୍ଟାବଣିଆ ଆସିଥିଲେ। ସେଠାରେ ସେ ମେସର୍ସ ଦୁର୍ଗାଷ୍ଟିଲ ଇଣ୍ଡଷ୍ଟ୍ରିଜ୍ ନାମକ ଠିକାସଂସ୍ଥା ଅଧୀନରେ ହାଉସ୍ କିପିଂ ଶ୍ରମିକ ଭାବେ କାର୍ଯ୍ୟ କରୁଥିଲେ। ଅଭିଯୁକ୍ତ ଅଚ୍ୟୁତାନନ୍ଦଙ୍କ ସହିତ ତାଙ୍କର ସମ୍ପର୍କ ଗଢ଼ି ଉଠିଥିଲା। ଅଚ୍ୟୁତାନନ୍ଦ ମଝିରେ ମଝିରେ ଜଲିଙ୍କ ଭଡାଘରକୁ ଆସିବା ସହ ମଦ୍ୟପାନ କରି ମାଡ଼ମାରି ଟଙ୍କା ଛଡାଇ ନେଉଥିଲେ। ପୂର୍ବରୁ ଏହି ଘଟଣା ଥାନା ଯାଏ ଯାଇଥିଲା। ହେଲେ ସୋମବାର ଅପରାହ୍ନ ପ୍ରାୟ ସାଢ଼େ ୨ଟାରେ ଜଲି କାରଖାନା ପରିସରରେ ଅନ୍ୟ ୩ଜଣ ମହିଳା ଶ୍ରମିକଙ୍କ ସହ ବିଶ୍ରାମ କରୁଥିବା ବେଳେ ଅଚ୍ୟୁତାନନ୍ଦ ଜଲିଙ୍କ ମୁଣ୍ଡକୁ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ଜଲିଙ୍କୁ ଢେଙ୍କାନାଳ ମୁଖ୍ୟ ଚିକିତ୍ସାଳୟ ପଠାଯାଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଥିଲେ ବୋଲି ପୋଲିସ ପ୍ରକାଶ କରିଛି। ବିନା ଗେଟ୍ ପାସ୍ରେ ଅଭିଯୁକ୍ତ ଅଚ୍ୟୁତାନନ୍ଦ କିଭଳି କାରଖାନା ଭିତରକୁ ପ୍ରବେଶ କରି ଏଭଳି ଘଟଣା ଘଟାଇଲେ ତାହା ତଦନ୍ତ ସାପେକ୍ଷ।