ଭୁବନେଶ୍ୱର, ୧୬।୧ (ବ୍ୟୁରୋ):ରାଜଧାନୀରେ ରବିବାର ଶୀତୁଆ ସକାଳକୁ ସତେଜ କରିଥିଲା ‘ପଥ ଉତ୍ସବ’। ପିଲାଠାରୁ ବୟସ୍କଙ୍କ ପର୍ଯ୍ୟନ୍ତ ସମସ୍ତେ ନାଚ, ଗୀତ ସାଙ୍ଗକୁ ମନୋରଞ୍ଜନର ଭରପୂର ମଜା ଉଠାଇଥିଲେ। ଏଥର ପଥ ଉତ୍ସବ ପୁରୁଣା ଭୁବନେଶ୍ୱର ରଥରୋଡ୍ରେ ଅନୁଷ୍ଠିତ ହୋଇଥିଲା। ସକାଳ ୬ଟା ୩୦ରୁ ବିଭିନ୍ନ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଝୋଟି, ମୁରୁଜରେ ରାସ୍ତାଗୁଡିକ ଶୋଭା ପାଉଥିବାବେଳେ କୁନି କୁନି ପିଲାମାନେ ନିଜ ତୁଳୀରେ ବିଭିନ୍ନ ଚିତ୍ର ଆଙ୍କିଥିଲେ। ପ୍ରଥମକରି ପଥ ଉତ୍ସବରେ ଖାଦ୍ୟର ପସରା ମେଲିଥିଲା। ମିଲେଟ୍ ମିଟ୍ରୁ ପ୍ରସ୍ତୁତ ପିଠା ସହିତ ବିଭିନ୍ନ ପ୍ରକାରର ଖାଦ୍ୟ ପ୍ରସ୍ତୁତ କରି ଷ୍ଟଲ ଖୋଲା ଯାଇଥିଲା। ଏଥିସହ ଜୁମ୍ବା ନୃତ୍ୟରେ ଝୁମିଥିଲେ ଦର୍ଶକ। ବିଭିନ୍ନ ଗୀତର ତାଳେ ତାଳେ ଯୁବପିଢି ନୃତ୍ୟ ପରିବେଷଣ କରିଥିଲେ। ଆଖପାଖ ଘରର ଛାତ ଉପରେ ରହି ଲୋକମାନେ ଉତ୍ସବର ମଜା ଉଠାଇଥିଲେ। ଓଡ଼ିଶୀରେ ‘ଅୟିଗିରି ନନ୍ଦୀନୀ’ଠାରୁ ଆରମ୍ଭ କରି ‘ପରଦେଶିଆ ରଜା’, ‘ଜେଡା ନସା’ ଭଳି ବିଭିନ୍ନ ଗୀତ ସାଙ୍ଗକୁ ନୃତ୍ୟରେ ପ୍ରକମ୍ପିତ ହୋଇଥିଲା ପୂରା ପରିବେଶ। ସେହିପରି ବିଏମ୍ସି ପକ୍ଷରୁ ଡେଙ୍ଗୁ ରୋଗ ନେଇ ସଚେତନ କରିବା ସହ ଓଦା ଶୁଖିଲା ଅଳିଆକୁ ଅଲଗା ଅଲଗା କରି ସଫେଇବାଲାଙ୍କୁ ଦେବା ପାଇଁ ସଚେତନତା ବାର୍ତ୍ତା ଦିଆଯାଇଥିଲା।
ଭିନ୍ନକ୍ଷମ ଓ ସଶକ୍ତୀକରଣ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା, ମେୟର ସୁଲୋଚନା ଦାସ, ଡେପୁଟି ମେୟର ମଞ୍ଜୁଲତା କହଁର, କମିଶନର ବିଜୟ ଅମୃତା କୁଲାଙ୍ଗେ, ଅତିରିକ୍ତ କମିଶନର ଓ କର୍ପୋରେଟରମାନେ ଉପସ୍ଥିତ ଥିଲେ।
ଆକର୍ଷଣ ସାଜିଲା କାନ୍ତାରା ବେଶ
କନ୍ନଡ ଚଳଚ୍ଚିତ୍ର ‘କାନ୍ତାରା’ରୁ ପ୍ରୋତ୍ସାହିତ ହୋଇ ଜଣେ ବ୍ୟକ୍ତି ନିଜକୁ କାନ୍ତାରା ବେଶରେ ସଜାଇ ଲୋକଙ୍କୁ ଆମୋଦିତ କରିଥିଲେ। ଲୋକମାନେ ମଧ୍ୟ ତାଙ୍କ ସହ ସେଲ୍ଫି ଉଠାଇବା ସହ ନୃତ୍ୟ ପରିବେଷଣ କରିଥିଲେ। ତାଙ୍କର କଳା, ଅଙ୍ଗଭଙ୍ଗୀ ଲୋକଙ୍କୁ ଆକୃଷ୍ଟ କରିଥିଲା।
ଦେବଦେବୀ ରୂପରେ କୁନିକୁନି ପିଲା
ହେଲ୍ପମେଟ୍ ପକ୍ଷରୁ ବିଦ୍ୟାଳୟ ଛାତ୍ରୀଛାତ୍ରଙ୍କୁ ନେଇ ଏକ ସ୍ବତନ୍ତ୍ର କାର୍ଯ୍ୟକ୍ରମ କରାଯାଇଥିଲା। ପିଲାମାନେ ବିଭିନ୍ନ ଦେବଦେବୀଙ୍କ ବେଶ ହୋଇ ହାତରେ ହକି ଷ୍ଟିକ୍ ଧରି ଉତ୍ସବରେ ପଦଯାତ୍ରା କରିଥିଲେ। ଏଥିସହ ହକି ବିଶ୍ୱକପ୍ରେ ଭାରତର ବିଜୟ ପାଇଁ ଶୁଭେଚ୍ଛା ଜଣାଇଥିଲେ। ଅନୁଷ୍ଠାନର ସମ୍ପାଦିକା ନିବେଦିତା ଭଞ୍ଜ କହିଛନ୍ତି, ଭାରତୀୟ ଖେଳାଳିଙ୍କ ପରିଶ୍ରମ, ଚେଷ୍ଟା, ସଂକଳ୍ପ ଏବଂ ଆତ୍ମବିଶ୍ୱାସ ପାଇଁ ବିଶ୍ୱକପ୍ ଜିତିବାରେ ସଫଳ ହେବ। ହକି ଲାଗି ଲୋକଙ୍କୁ ଉତ୍ସାହିତ କରିବା ପାଇଁ ଏହା ଏକ ଭିନ୍ନ ପ୍ରୟାସ।