ବରଗଡ଼ ଅଫିସ୍,୭।୩: ମାଧ୍ୟମିକ ଶିକ୍ଷା ପରିଷଦ (ବିଏସ୍ଇ) ପରିଚାଳିତ ହାଇସ୍କୁଲ ସାର୍ଟିଫିକେଟ୍ ପରୀକ୍ଷା (ଏଚ୍ଏସ୍ସି) ତଥା ମାଟ୍ରିକ ପରୀକ୍ଷା ଆସନ୍ତା ୧୦ତାରିଖରୁ ଆରମ୍ଭ ହେବ। ଏହା ୨୦ତାରିଖ ପର୍ଯ୍ୟନ୍ତ ଚାଲିବ। ଏଥିପାଇଁ ବରଗଡ଼ ଜିଲାରେ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଛି। ଏଥର ଜିଲାରେ ସମୁଦାୟ ୧୭ହଜାର ୮୮୭ ମାଟ୍ରିକ ପରୀକ୍ଷାର୍ଥୀ ଅଛନ୍ତି। ସେମାନଙ୍କ ମଧ୍ୟରେ ୧୭ହଜାର ୬ଶହ ରେଗୁଲାର, ୫୧ ରେଗୁଲାର, ୧୩୭ ମଧ୍ୟମା ଏବଂ ୯୯ଜଣ ଏସ୍ଆଇଓଏସ୍ ପରୀକ୍ଷାର୍ଥୀ ରହିଛନ୍ତି। ପରୀକ୍ଷାର୍ଥୀଙ୍କ ପାଇଁ ମୋଟ୍ ୯୭ ପରୀକ୍ଷା କେନ୍ଦ୍ର ରହିଛି। ସେଥିରୁ ଏଚ୍ଏସ୍ସି ପରୀକ୍ଷାର୍ଥୀଙ୍କ ପାଇଁ ୯୩, ମଧ୍ୟମା ପାଇଁ ୩ ଏବଂ ଏସ୍ଆଇଓଏସ୍ ପରୀକ୍ଷାର୍ଥୀଙ୍କ ପାଇଁ ଗୋଟିଏ ପରୀକ୍ଷା କେନ୍ଦ୍ର ରହିଛି ।
ବିଗତ ବର୍ଷକୁ ଅନୁଧ୍ୟାନ କଲେ ଜିଲାରେ ମାଟ୍ରିକ ପରୀକ୍ଷାର୍ଥୀଙ୍କ ସଂଖ୍ୟା ହ୍ରାସ ପାଉଥିବା ଜଣାପଡ଼ିଛି। ୨୦୧୮ରେ ଜିଲାରେ ୧୮ହଜାର ୮୨୪ଜଣ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରେ ୧୮ହଜାର ୨୩୧ଜଣ ରେଗୁଲାର ଓ ଏକ୍ସ ରେଗୁଲାର, ୧୧୩ଜଣ ମଧ୍ୟମା ଏବଂ ୪୮୦ଜଣ ଏସ୍ଆଇଓଏସ୍ ପରୀକ୍ଷାର୍ଥୀ ଥିଲେ। ୨୦୧୯ରେ ଏହି ସଂଖ୍ୟା ୧୮ହଜାର ୫୧୩କୁ ଖସିଥିଲା। ସେତେବେଳେ ୧୮ହଜାର ୮୫ଜଣ ରେଗୁଲାର ଓ ଏକ୍ସ ରେଗୁଲାର, ୧୨୫ଜଣ ମଧ୍ୟମା, ୩୦୩ଜଣ ଏସ୍ଆଇଓଏସ୍ ପରୀକ୍ଷାର୍ଥୀ ଥିଲେ। ୨୦୨୦ ବେଳକୁ ଏଠାରେ ସଂଖ୍ୟା ୧୭ହଜାର ୩୯୫କୁ ଖସିଥିଲା। ଏହି ସମୟରେ ୧୬ହଜାର ୮୮୮ଜଣ ରେଗୁଲାର ଓ ଏକ୍ସରେଗୁଲାର, ୧୨୫ଜଣ ମଧ୍ୟମା ଏବଂ ୩୮୨ଜଣ ଏସ୍ଆଇଓଏସ୍ ପରୀକ୍ଷାର୍ଥୀ ଥିଲେ। ୨୦୨୧ରେ ପରୀକ୍ଷାର୍ଥୀଙ୍କ ସଂଖ୍ୟା ପୁଣି ବଢ଼ିଥିଲା ଏବଂ ଏହା ୨୦ହଜାର ୫୭୫ରେ ପହଞ୍ଚତ୍ଥିଲା। ରେଗୁଲାର, ଏକ୍ସ ରେଗୁଲାର ପରୀକ୍ଷାର୍ଥୀଙ୍କ ସଂଖ୍ୟା ବୃଦ୍ଧି ପାଇ ୨୦ହଜାର ୯୦କୁ ଛୁଇଁଥିବାବେଳେ ୧୩୯ ମଧ୍ୟମା ଏବଂ ୩୪୬ ମଧ୍ୟମା ଏସ୍ଆଇଓଏସ୍ ପରୀକ୍ଷାର୍ଥୀ ରହିଥିଲେ। କିନ୍ତୁ ୨୦୨୨ରୁ ଜିଲାରେ ପୁଣି ମାଟ୍ରିକ ପରୀକ୍ଷାର୍ଥୀଙ୍କ ସଂଖ୍ୟା ହ୍ରାସ ପାଇଛି। ୨୦୨୨ରେ ଜିଲାରେ ୨୦ହଜାର ୨୫୫ଜଣ ମାଟ୍ରିକ ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୧୯ହଜାର ୬୯୦ଜଣ ରେଗୁଲାର୍, ଏକ୍ସ ରେଗୁଲାର, ୧୪୫ଜଣ ମଧ୍ୟମା ଏବଂ ୪୨୦ଜଣ ଏସ୍ଆଇଓଏସ୍ ପରୀକ୍ଷାର୍ଥୀ ରହିଥିଲେ । ୨୦୨୩ ତଥା ଚଳିତବଷ ଏହା ୧୭ହଜାର ୮୮୭କୁ ଖସିଛି।
ମାଧ୍ୟମିକ ଶିକ୍ଷା ପରିଷଦ ପରିଚାଳିତ ମାଟ୍ରିକ ପରୀକ୍ଷାରେ ପରୀକ୍ଷାର୍ଥୀଙ୍କ ସଂଖ୍ୟା ଏଭଳି ହ୍ରାସ ପାଇବାରେ ଲାଗିଛି। ଅଭିଭାବକମାନେ ଘରୋଇ ସ୍କୁଲ ପ୍ରତି ଆଗ୍ରହ ପ୍ରକାଶ କରି ସେଠାରେ ନିଜ ଝିଅପୁଅଙ୍କୁ ପଢ଼ାଇବାକୁ ପଠାଉଥିବା ଯୋଗୁ ଏଭଳି ସ୍ଥିତି ଉପୁଜିଥିବା ଆଲୋଚନା ହେଉଛି। ତେବେ ରାଜ୍ୟ ସରକାର ଜିଲାର ଅନେକ ହାଇସ୍କୁଲକୁ ୫-ଟି ରୂପାନ୍ତରୀକରଣ କରୁଥିବା ସତ୍ତ୍ବେ ମାଧ୍ୟମିକ ଶିକ୍ଷା ପରିଷଦ ପରିଚାଳିତ ହାଇସ୍କୁଲରେ ମାଟ୍ରିକ ପରୀକ୍ଷାର୍ଥୀଙ୍କ ସଂଖ୍ୟା ହ୍ରାସ ପାଇବା ଏବେ ଚର୍ଚ୍ଚାର ବିଷୟ ହୋଇଛି ।