ପୁରୁଷଙ୍କ ତୁଳନାରେ କମ୍‌ ମହିଳା ନେଉଛନ୍ତି ଟିକା
3:19 pmJune 30, 2021June 30, 2021 / 41

ନୂଆଦିଲ୍ଲୀ,୩୦।୬: ଭାରତରେ କରୋନା ବିରୋଧ ଲଢ଼େଇରେ ମୁଖ୍ୟ ଅସ୍ତ୍ର ଭାବେ ଥିବା ଟିକାକରଣ ଅଭିଯାନ ଜାନୁଆରୀ ୧୬ରୁ ଆରମ୍ଭ ହୋଇଛି। କିନ୍ତୁ ଜୁନ ୨୧ରୁ ଏହି ଅଭିଯାନକୁ ତ୍ୱରାନ୍ବିତ କରାଯାଇଛି। ଜୁନ ୧୨ରୁ ଜୁନ ୨୯ମଧ୍ୟରେ
କାନାଡାର ମୋଟ ଜନସଂଖ୍ୟା ଅପେକ୍ଷା ଭାରତରେ ଅଧିକ ଲୋକଙ୍କୁ ଟିକାକରଣ କରାଯାଇଥିବା ଜଣାପଡ଼ିଛି। କିନ୍ତୁ ଏହି ଟିକାକରଣରେ ପୁରୁଷ ଓ ମହିଳାଙ୍କ ଅନୁପାତ ଏବେ ଚିନ୍ତାର ବିଷୟ ପାଲଟିଛି। କାରଣ ପୁରୁଷଙ୍କ ଅପେକ୍ଷା କମ୍‌ ସଂଖ୍ୟକ ମହିଳା ନିଜର ଟିକାକରଣ କରାଇଛନ୍ତି। ସୂଚନାଯୋଗ୍ୟ, ଗତ ୮ଦିନ ମଧ୍ୟରେ ଭାରତରେ ୪.୬୧କୋଟିରୁ ଊର୍ଦ୍ଧ୍ୱ ଲୋକଙ୍କୁ ଟିକା ଦିଆଯାଇଛି। ଯାହା ଇରାକ(୪.୦୨କୋଟି), କାନାଡା(୩.୭୭କୋଟି), ସୌଦି(୩.୪୮କୋଟି) ଓ ମାଲେସିଆ(୩.୨୩କୋଟି) ଜନସଂଖ୍ୟାଠାରୁ ଢ଼େର ଗୁଣା ଅଧିକ ରହିଛି ବୋଲି କେନ୍ଦ୍ର ସରକାର କହିଛନ୍ତି। ଅନ୍ୟପଟେ ପୁରୁଷ ଓ ମହିଳାଙ୍କ ଅନୁପାତ ବିଷୟରେ କହିବାକୁ ଗଲେ ସରକାରୀ ତଥ୍ୟ ଅନୁସାରେ ମହିଳାଙ୍କ ତୁଳନାରେ ୩କୋଟିରୁ ଊର୍ଦ୍ଧ୍ୱ ପୁରୁଷ ଟିକା ନେଇଛନ୍ତି। ଟିକାକରଣ ଅଭିଯାନର ଆରମ୍ଭରୁ ଏପର୍ଯ୍ୟନ୍ତ ମୋଟ ୧୪.୯୯ କୋଟି ମହିଳା ଟିକା ନେଇସାରିଛନ୍ତି। ଯାହା ଟିକାକରଣର ମୋଟ ୪୬ପ୍ରତିଶତ। ସେହିପରି ଏପର୍ଯ୍ୟନ୍ତ ମୋଟ ୧୭.୮କୋଟି ପୁରୁଷମାନେ ଟିକା ନେଇସାରିଥିବା ବେଳେ, ଯାହା ଟିକାକରଣର ୫୪ ପ୍ରତିଶତ ରହିଥିବା ଜଣାପଡ଼ିଛି। ଅନ୍ୟପଟେ ଭାରତରେ ଏପର୍ଯ୍ୟନ୍ତ ମୋଟ ୫୪,୬୯୩ କିନ୍ନରଙ୍କୁ ଟିକା ଦିଆଯାଇଛି ବୋଲି ନୀତି ଆୟୋଗର ସଦସ୍ୟ(ସ୍ବାସ୍ଥ୍ୟ) ବି.କେ ପଲ୍‌ ସୂଚନା ଦେଇଛନ୍ତି।