ଚେନ୍ନାଇ, ୨୪ା୭ (ପି.ଟି.)-ଚଳିତ ମାସ ୨୫ରୁ ଅଗଷ୍ଟ ୩୦ ପର୍ଯ୍ୟନ୍ତ ଫିଡେ ଅନ୍ଲାଇନ୍ ଅଲିମ୍ପିଆଡ୍ ହେବ। ଏଥିରେ ବିଶ୍ୱର ୩ ନମ୍ବର ମାନ୍ୟତାପ୍ରାପ୍ତ ଡିଙ୍ଗ୍ ଲିରେନ୍ ଏବଂ ଭାରତର ବିଶ୍ୱନାଥନ ଆନନ୍ଦଙ୍କ ଭଳି ଟପ୍ ଖେଳାଳିମାନେ ଅଂଶଗ୍ରହଣ କରିବେ। ପ୍ରଥମଥର ଅନୁଷ୍ଠିତ ହେଉଥିବା ଅନ୍ଲାଇନ୍ ଅଲିମ୍ପିଆଡ୍ରେ ୧୬୩ଟି ଦେଶରୁ ଟିମ୍ଗୁଡ଼ିକ ଅଂଶଗ୍ରହଣ କରିବେ। ରୁଷିଆ ଶୀର୍ଷ ର଼୍ୟାଙ୍କିଙ୍ଗପ୍ରାପ୍ତ ଦଳ ହୋଇଥିବାବେଳେ ଏହାପଛକୁ ଚାଇନା, ଯୁକ୍ତରାଷ୍ଟ୍ର ଆମେରିକା, ଆର୍ମେନିଆ ଓ ୟୁକ୍ରେନ୍। ଏହି ସମ୍ମାନଜନକ ପ୍ରତିଯୋଗିତା ପାଇଁ ଭିଦିତ୍ ସନ୍ତୋଷ ଗୁଜରାଟୀଙ୍କୁ ଅଧିନାୟକ କରାଯାଇଛି। ପ୍ରତିଯୋଗିତାରେ ତାଙ୍କୁ ୭ମ ସିଡ୍ ମାନ୍ୟତା ମିଳିଛି। ରୁଷିଆ, ଚାଇନା, ଯୁକ୍ତରାଷ୍ଟ୍ର ଆମେରିକା, ୟୁକ୍ରେନ ଓ ଅନ୍ୟମାନଙ୍କ ସହ ଭାରତକୁ ଟପ୍ ଡିଭିଜନରେ ସ୍ଥାନ ମିଳିଛି। ଟପ୍ ଡିଭିଜନରୁ ୮ଟି ଦଳ ଷ୍ଟେଜ୍-୨ ପାଇଁ ଯୋଗ୍ୟତା ଅର୍ଜନ କରିବେ। ସେମାନଙ୍କୁ ଅନ୍ୟ ଡିଭିଜନର ଦେଶଗୁଡ଼ିକ ସହ ମୁକାବିଲା କରିବାକୁ ପଡ଼ିବ। ବିଶ୍ୱର ନମ୍ବର ଓ୍ବାନ ମାଗ୍ନସ କାର୍ଲସେନ୍ ଇଭେଣ୍ଟରେ ଉପସ୍ଥିତ ରହିବେ ନାହିଁ। ୨୦୧୮ରେ ଚାଇନା ଉଭୟ ଓପନ୍ ଏବଂ ମହିଳା ବିଭାଗରେ ବିଜୟ ଲାଭ କରିଥିଲା। ଏହି ଦେଶ ଆହୁରି ମଧ୍ୟ ମେ ମାସରେ ଅନ୍ଲାଇନ୍ ନେଶନ୍ସ କପ୍ ଜିତିଥିଲା। ସୂଚନାଯୋଗ୍ୟ, ପାରମ୍ପରିକ ଚେସ୍ ଅଲିମ୍ପିଆଡ୍ ଏହି ବର୍ଷ ଅଗଷ୍ଟରେ ରୁଷିଆରେ ଆୟୋଜିତ ହେବା କାର୍ଯ୍ୟକ୍ରମ ଥିଲା। ମାତ୍ର କୋଭିଡ୍-୧୯ ଯୋଗୁ ଓ୍ବାଲର୍ଡ ଚେସ୍ ଗଭର୍ନିଂବଡି ଏହାକୁ ୨୦୨୧କୁ ଘୁଞ୍ଚାଇ ଦେବାରୁ ଫିଡେ ଅନଲାଇନ୍ ଚେସ୍ ଅଲିମ୍ପିଆଡ୍ର ଆୟୋଜନ କରିଛି। ଆନନ୍ଦଙ୍କ ବ୍ୟତୀତ ଯେଉଁ ଅଗ୍ରଣୀ ଖେଳାଳିମାନେ ଏଥିରେ ଅଂଶଗ୍ରହଣ କରିବେ ସେମାନଙ୍କ ମଧ୍ୟରେ ରହିଛନ୍ତି ଗ୍ରାଣ୍ଡମାଷ୍ଟର ଡିଙ୍ଗ୍ ଲିରେନ, ଇଆନ୍ ନେପୋମ୍ନିଆଚି, ଆଲେକ୍ଜାଣ୍ଡର ଗ୍ରିସ୍ଚୁକ୍, ଲେଭନ ଆରୋନିଆନ, ଅନିଶ ଗିରି ଓ ଓ୍ବେସ୍ଲି ସୋ। ମହିଳା ଖେଳାଳିଙ୍କ ମଧ୍ୟରେ ଅଛନ୍ତି ବିଶ୍ୱର ନମ୍ବର ଓ୍ବାନ ହୁଓ ୟିଫାନ୍, ଭାରତର କୋନେରୁ ହମ୍ପି, ଡି. ହାରିକା କାଟରନ୍ୟା ଲାଗ୍ନୋ। ପ୍ରତ୍ୟେକ ଟିମ୍ରେ ୬ଜଣ ଲେଖାଏଁ ଖେଳାଳି ରହିବେ। ଏକ ମିକ୍ସଡ ଫର୍ମାଟରେ ଅତି କମ୍ରେ ତିନି ମହିଳା ଖେଳାଳି ଓ ଦୁଇ ଜୁନିୟର ଖେଳାଳି ରହିବେ।