ନୂଆଗାଁ,୭।୪(ଧନେଶ୍ୱର ସାହୁ)ନୟାଗଡ଼ ଜିଲା ନୂଆଗାଁ ବ୍ଲକ ଉଦୟପୁର ପଞ୍ଚାୟତରେ ଜଣେ ବ୍ୟକ୍ତିଙ୍କ ନାମରେ କ୍ଷେତ ପୋଖରୀ (ଫାର୍ମ ପଣ୍ଡ) ଖୋଳାଯାଇଛ। ହେଲେ ଯେଉଁ ବ୍ୟକ୍ତିଙ୍କ ନାମରେ ପୋଖରୀ ଖୋଳା ଯାଇଛି ସେହି ହିତାଧିକାରୀ ପୋଖରୀ ଖୋଳା ବିଷୟରେ ଜାଣି ନାହାନ୍ତି। ଏ ବାବଦରେ ଅଭିଯୋଗ କରିବାର ୪୦ ଦିନ ବିତି ଯାଇଥିଲେ ମଧ୍ୟ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ବଦଳରେ ଅଭିଯୋଗକୁ ଚାପି ଦେବାକୁ ଚେଷ୍ଠା କରାଯାଉଥିବା ଅଭିଯୋଗ ହେଉଛି।
ନୂଆଗାଁ ବ୍ଲକ ଜଳ ବିଭାଜିକା ବିଭାଗ ତରଫରୁ ଉଦୟପୁର ପଞ୍ଚାୟତ ଶିଖରଗୋଛା ଗ୍ରାମର ଲକ୍ଷ୍ମଣ ବେହେରାଙ୍କ ନାମରେ ଏକ କ୍ଷେତ ପୋଖରୀ ଖୋଳା ଯାଇଥିବାର ସୂଚନା ଫଳକ ଅନ୍ୟ ଜଣେ ବ୍ୟକ୍ତିଙ୍କ ନାମରେ ରେକର୍ଡ ଥିବା ପୋଖରୀ ହୁଡାରେ ଲାଗିଥିବା ଅଭିଯୋଗ ହୋଇଥିଲା । ତେବେ ଲକ୍ଷ୍ମଣ ବେହେରାଙ୍କୁ ପୋଖରୀ ବାବଦରେ ପଚାରିବାରେ ପୋଖରୀ ବିଷୟରେ ସେ ଜାଣି ନାହାନ୍ତି କିମ୍ବା କେବେ ପୋଖରୀ ଖୋଳି ନାହାନ୍ତି ବୋଲି ମନା କରିଥିଲେ । ପୋଖରୀ ଖୋଳାକୁ ତଦାରଖ କରିଥିବା ଜଳ ବିଭାଜିକା ବିଭାଗ କର୍ମଚାରୀ ଦୁଃଶାସନ ନାୟକଙ୍କୁ ପଚାରିବାରେ ସୂଚନା ଫଳକରେ ହିତାଧିକାରୀଙ୍କ ନାମ ଭୁଲ ହୋଇଯାଇଛି। ଉକ୍ତ ପୋଖରୀ ବିଭାଗର ପୂର୍ବତନ ପିଡିଙ୍କ ଜଣେ ସମ୍ପର୍କୀୟ ଖୋଳିଥିବାରୁ ପିଡିଙ୍କ ନିର୍ଦ୍ଦେଶକ୍ରମେ ବିଲ୍ କରାଯାଇଥିବା ଅଭିଯୋଗକାରୀଙ୍କ ସାମ୍ନାରେ କର୍ମଚାରୀ ନାୟକ ଯନ୍ତ୍ରୀ ହରପ୍ରସାଦ ରଥଙ୍କୁ କହିଥିଲେ । ହିତାଧିକାରୀଙ୍କ ଅଜାଣତରେ ପୋଖରୀ ଖୋଳି ୧ ଲକ୍ଷ ୬୦ ହଜାର ୮୪୮ ଟଙ୍କା ଉଠାଣ ହୋଇଥିବା ନେଇ ଗତ ଫେବୃଆରୀ ୨୨ରେ ବ୍ଲକରେ ଅନୁଷ୍ଠିତ ହୋଇଥିବା ସାମାଜିକ ସମୀକ୍ଷା ଜନଶୁଣାଣିରେ ଅଭିଯୋଗ ହେବା ପରେ ତୁରନ୍ତ ତଦନ୍ତ କରିବା ପାଇଁ ଅତିରିକ୍ତ ଜିଲା ମାଜିଷ୍ଟ୍ରେଟ ରୋଜିନା ଦାସ ନିଦ୍ଦେର୍ଶ ଦେଇଥିଲେ । ତେଣୁ ଏହାର ତଦନ୍ତ କରିବା ପାଇଁ ନୂଆଗାଁ ବିଡିଓ ବାସୁଦେବ ନାୟକ ନୂଆଗାଁ ବ୍ଲକ ସାମାଜିକ ସମୀକ୍ଷକ ସ୍ବର୍ଣ୍ଣଲତା ଦଳବେହେରାଙ୍କୁ ନିର୍ଦ୍ଦେଶ ଦେଇଥିଲେ । କିନ୍ତୁ ଅଭିଯୋଗ ହେବାର ୪୦ ଦିନ ବିତିଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହେଉ ନାହିଁ । ଅଧିକାରୀଙ୍କ ନୀରବତା ପରେ ନୟାଗଡ଼ ଜଳ ବିଭାଜିକା ପ୍ରକଳ୍ପ ନିର୍ଦ୍ଦେଶକ ଉପେନ୍ଦ୍ର ପରିଡ଼ାଙ୍କୁ ଜଣାଇବାରେ ବିଚାର କରାଯିବ କହି ସେ ମଧ୍ୟ ନୀରବ ରହିଛନ୍ତି। ତେବେ ଜିଲା ସାମାଜିକ ସମୀକ୍ଷକ ବିଜୟ ବଳିୟାରସିଂଙ୍କୁ ପଚାରିବାରେ ଲକ୍ଷ୍ମଣ ବେହେରାଙ୍କ ପୋଖରୀର ତଦନ୍ତ ଦାୟିତ୍ୱ ଅଣ୍ଡୁସମ୍ୟାନ ନେଇଛନ୍ତି କହିଥିଲେ । ଅଣ୍ଡୁସମ୍ୟାନ ଗିରିଶ ଚନ୍ଦ୍ର ଦାସଙ୍କୁ ପଚାରିବାରେ ତଦନ୍ତ ପାଇଁ ସମୟ ଲାଗିବ ବୋଲି କହିଛନ୍ତି। ତେବେ କ୍ଷେତ ପୋଖରୀ ଖନନରେ ଅନିୟମିତତା ହୋଇଥିବା ଜାଣି ଅଧିକାରୀମାନେ ଅଭିଯୋଗକୁ ଚାପି ଦେବାର ପ୍ରୟାସ କରି ସମୟ ଗଡାଇ ଚାଲୁଛନ୍ତି ବୋଲି ଅଭିଯୋଗକାରୀ କହିଛନ୍ତି।