ଝାରସୁଗୁଡ଼ା ଅଫିସ,୧୮ା୧୦: ରାଜ୍ୟ ସରକାରଙ୍କ ତରଫରୁ ଝାରସୁଗୁଡ଼ାରେ ଏକ ହାର୍ଟ ହସ୍ପିଟାଲ୍ ବହୁଶୀଘ୍ର କାର୍ଯ୍ୟକ୍ଷମ ହେବାକୁ ଯାଉଛି। ଏହାକୁ ପିପିପି ମୋଡ୍ରେ ପରିଚାଳନା କରିବା ପାଇଁ ରାଜ୍ୟ ସରକାର କେତେକ ଘରୋଇ ସଂସ୍ଥାକୁ ଆମନ୍ତ୍ରଣ କରିଛନ୍ତି। ଏହାକୁ ରକ୍ଷାକରି ସତ୍ୟସାଇ ହେଲ୍ଥ ଆଣ୍ଡ୍ ଏଜୁକେଶନ ଟ୍ରଷ୍ଟ ତରଫରୁ ଡା. ଖଣ୍ଡେପାର୍କରଙ୍କ ନେତୃତ୍ୱରେ ଏକ ବିଶେଷଜ୍ଞ ଡାକ୍ତର ଦଳ ସୋମବାର ହାର୍ଟ ହସ୍ପିଟାଲ୍ ପରିଦର୍ଶନ କରି ଭିତ୍ତିଭୂମି ଅନୁଧ୍ୟାନ କରିଥିଲେ।
ଏ ନେଇ ଜିଲାପାଳଙ୍କ କାର୍ଯ୍ୟାଳୟ ପରିସର ସମ୍ମିଳନୀ କକ୍ଷରେ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ବରଗଡ ଏମ୍ପି ସୁରେଶ ପୂଜାରୀ, ଜିଲାପାଳ ସରୋଜ କୁମାର ସାମଲ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ଡୋଲାମଣି ପଟେଲ, ସତ୍ୟସାଇ ଟ୍ରଷ୍ଟ ବିଶେଷଜ୍ଞ ଦଳର ପ୍ରମୁଖ ଶିଶୁ ହୃଦ୍ରୋଗ ବିଶେଷଜ୍ଞ ଡା. ଖଣ୍ଡେପାର୍କର, ଡା. ସ୍ନେହଲ କୁଲକର୍ଣ୍ଣୀ, ଡା.ବାଲସ୍ବରୂପ ସାହୁ, ଡା. ଅତୁଳ ପ୍ରଭୁ, ଡା. ପ୍ରଦୀପ ବର୍ମା, ଡା. ରବିକିରଣ ଶ୍ରୀପଦ, ସୌମ୍ୟା ଶ୍ରୀପଦ, ଅଜୟ ଶ୍ରଫ୍, ଅତିରିକ୍ତ ଜିଲାପାଳ ପ୍ରବୀର କୁମାର ନାୟକ, ଡିପିଏମ୍ ବୁଲୁନାଥ ସାହୁ, ବଣିକସଂଘ ସଭାପତି ହୀରାଲାଲ୍ ଲୋକଚାନ୍ଦିନୀ, ରଘୁମଣି ପଟେଲ,ତାପସରାୟ ଚୌଧୁରୀ, ହରିଶ ଗଣତ୍ରା, ପିଣ୍ଟୁ ପାଢୀ ପ୍ରମୁଖ ଉପସ୍ଥିତ ଥିଲେ। ଏହି ବୈଠକରେ ସତ୍ୟସାଇ ଟ୍ରଷ୍ଟ ତରଫରୁ କୁହାଯାଇଛି, ରାଜ୍ୟ ସରକାର ସୁବିଧା ସୁଯୋଗ ଯୋଗାଇଦେଲେ ଝାରସୁଗୁଡ଼ାରେ ମାତୃ ଓ ଶିଶୁ ଚିକିତ୍ସାଳୟ (ଏମ୍ସିଏଚ୍) ଖୋଲିବ। ଏହା କାର୍ଯ୍ୟକ୍ଷମ ହେଲେ ଲୋକେ ମାଗଣାରେ ସ୍ବାସ୍ଥ୍ୟସେବା ପାଇପାରିବେ। ଏହା ସହିତ ହାର୍ଟ ହସ୍ପିଟାଲ୍ ପାଇଁ ଭିତ୍ତିଭୂମି (କୋଠା) ନିର୍ମାଣ ହୋଇଛି। ହେଲେ ବହୁ ଅତ୍ୟାଧୁନିକ ଯନ୍ତ୍ରପାତି ଓ ଉପକରଣ ଆବଶ୍ୟକ ରହିଛ । ଏସବୁ ଦିଗରେ ଟ୍ରଷ୍ଟ କର୍ତ୍ତୃପକ୍ଷ ବିଚାର ବିମର୍ଷକରି ଏକ ରିପୋର୍ଟ ପ୍ରସ୍ତୁତ କରି ରାଜ୍ୟ ସରକାରଙ୍କୁ ପ୍ରଦାନ କରିବେ ବୋଲି ବିଶେଷଜ୍ଞ ଡା. ଖଣ୍ଡେପାର୍କର କହିଛନ୍ତି। ଏ ନେଇ ସ୍ବାସ୍ଥ୍ୟମନ୍ତ୍ରୀ ଦାସ କହିଛନ୍ତି, ଓଡିଶାରେ ଲୋକଙ୍କୁ ଉନ୍ନତମାନର ସ୍ବାସ୍ଥ୍ୟସେବା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁତ୍ୱାରୋପ କରୁଛନ୍ତି। ଏଠାରେ ଏମ୍ସିଏଚ୍ ଖୋଲିଲେ ରାଜ୍ୟ ସରକାରଙ୍କ ତରଫରୁ ସତ୍ୟସାଇ ଟ୍ରଷ୍ଟକୁ ସମସ୍ତ ପ୍ରକାର ସୁବିଧା ଯୋଗାଇ ଦିଆଯିବ। ଏଠାରେ ଆଗାମୀ ଦିନରେ ହାର୍ଟ ହସ୍ପିଟାଲ୍, କ୍ୟାନସର ହସ୍ପିଟାଲ୍, ମେଡିକାଲ୍ କଲେଜ ଆଦି ପ୍ରତିଷ୍ଠା ହେବ । ଏସବୁ କାର୍ଯ୍ୟକ୍ଷମ ହେଲେ ଝାରସୁଗୁଡା ନୂତନ ନିର୍ମାଣରେ ଏହା ଅଂଶବିଶେଷ ହେବ ବୋଲି ମନ୍ତ୍ରୀ ଦାସ କହିଛନ୍ତି। ବରଗଡ ଏମ୍ପି ପୂଜାରୀ କହିଛନ୍ତି, ଏଠାରେ ହାର୍ଟ ହସ୍ପିଟାଲ୍ କାର୍ଯ୍ୟକ୍ଷମ ହେଲେ ପଶ୍ଚିମ ଓଡିଶା, ପଡୋଶୀ ଛତିଶଗଡ ଓ ଝାଡଖଣ୍ଡ ରାଜ୍ୟର ଲୋକେ ହୃଦ୍ରୋଗର ଚିକିତ୍ସା ପାଇପାରିବେ।