ଜେନେଭା,୨୮।୫(ଏପି): ବିଶ୍ୱ ଫୁଟ୍ବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫାର ଏକ ସର୍ଭେ ବିଶ୍ୱ ମହିଳା ଫୁଟ୍ବଲର ସମସ୍ୟାକୁ ପଦାରେ ପକାଇଛି। ଅନ୍ତର୍ଜାତୀୟସ୍ତରର ୭୦ ପ୍ରତିଶତ ମହିଳା ଫୁଟ୍ବଲ କ୍ଲବ କ୍ଷତିରେ ଚାଲୁଛି ବୋଲି ଏହି ସର୍ଭେରେ ଦର୍ଶାଯାଇଛି। ମାତ୍ର ୧୩ ପ୍ରତିଶତ କ୍ଲବ ୧୦ ଲକ୍ଷ ଆମେରିକୀୟ ଡଲାରଠାରୁ ସାମାନ୍ୟ ଊର୍ଦ୍ଧ୍ୱ ରାଜସ୍ବ ଉପାର୍ଜନ କରୁଛି। ଏହାର ଅଧାରୁ ଅଧିକ ଅର୍ଥ ପ୍ରାୟୋଜନ ଚୁକ୍ତିରୁ ଆସୁଛି ବୋଲି ବୁଧବାର ପ୍ରକାଶିତ ଫିଫା ଡାଡା ରିଲିଜ୍ରୁ ଜଣାଯାଇଛି। ୩୦ଟି ଲିଗ୍ ଓ ୨୮୨ଟି କ୍ଲବର ପରିଚାଳନା ଉଚ୍ଚକୋଟୀର ହୋଇଛି। ଫିଫା ବେଞ୍ଚମାର୍କିଂ ରିପୋର୍ଟରେ ଏ ନେଇ ଉଲ୍ଲେଖ କରାଯାଇଛି।
କୋଭିଡ୍-୧୯ ମହାମାରୀ ଏହାର ମୁଖ୍ୟ କାରଣ ବୋଲି କୁହାଯାଇଛି। ଏହି ରିପୋର୍ଟରେ ଗଭର୍ନାନ୍ସ, ଫାଇନାନ୍ସ, ଫ୍ୟାନ ଏନ୍ଗେଜମେଣ୍ଟ, ଖେଳାଳି ଓ ଅନ୍ଫିଲ୍ଡ ଘଟଣା କରୋନା ମହାମାରୀ ଦ୍ୱାରା ପ୍ରଭାବିତ ହୋଇଛି ବୋଲି ଦର୍ଶାଯାଇଛି। ମହିଳା ଫୁଟ୍ବଲ ଏବେ ବିଶ୍ୱର ଏକମାତ୍ର ଇଭେଣ୍ଟ, ଯାହାର ଲୋକପ୍ରିୟତା ବୃଦ୍ଧି ଘଟୁଛି। ଏହା ଜାରି ରହିବା ଉଚିତ ବୋଲି ଫିଫା ମୁଖ୍ୟ ଫୁଟ୍ବଲ ଅଧିକାରୀ ସରାଇ ବାରେମାନ କହିଛନ୍ତି। ପ୍ରତିବର୍ଷ ଏହି ସର୍ଭେ କରାଯିବ। ଏହା ଦ୍ୱାରା ମହିଳା ଫୁଟ୍ବଲ ମହାମାରୀ ଦ୍ୱାରା କେତେ ପ୍ରଭାବିତ ହୋଇଛି ତାହା ଜଣାପଡିବ ବୋଲି ବାରେମାନ କହିଛନ୍ତି। ଫିଫାରେ ୨୧୧ଟି ମେମ୍ବର ଆସୋସିଏଶନ ରହିଛନ୍ତି। ମହିଳା ଫୁଟ୍ବଲ ଉନ୍ନତି ପାଇଁ ଏହି ମେମ୍ବରଗୁଡିକ ସହ ସାଥି ହୋଇ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ମହିଳା କ୍ଲବ ଓ୍ବାଲର୍ଡ କପ୍କୁ ଆହୁରି ଆଗକୁ ବଢାଇବାକୁ ଓ ମହିଳା ଫିଫା ବିଶ୍ୱକପ୍ ପ୍ରତି ଦୁଇବର୍ଷରେ ଥରେ ଆୟୋଜନ କରାଯିବାକୁ ଫିଫା ଗୁରୁତ୍ୱ ଦେବ ବୋଲି କୁହାଯାଇଛି।