ଭୁବନେଶ୍ୱର, ୧୧।୧୦ (କ୍ରୀଡ଼ା ପ୍ରତିନିଧି): ଟୁର୍ନାମେଣ୍ଟରେ ଆମେରିକା ଓ ବ୍ରାଜିଲ ପରି ଉଚ୍ଚ ର଼୍ୟାଙ୍କ୍ପ୍ରାପ୍ତ ଦଳ ବିପକ୍ଷରେ ଖେଳିବାକୁ ଥିଲେ ହେଁ ଭାରତର ଭଲ ପ୍ରଦର୍ଶନକୁ ନେଇ ଆଶା ରଖିଛନ୍ତି ମୁଖ୍ୟ କୋଚ୍ ଥୋମାସ ଡେନର୍ବି। ”ଆମେ ଗତ ଫେବୃୟାରୀଠାରୁ କଠିନ ପରିଶ୍ରମ କରିଛୁ। ଟ୍ରେନିଂ ସେସନ ବହୁତ ଭଲ ରହିଛି। ଭାରତୀୟ ଖେଳାଳିଙ୍କ ଏକ୍ସପୋଜର ଟ୍ରିପ୍ ମଧ୍ୟ ଉତ୍ତମ ରହିଛି। ମୋଟାମୋଟି କହିଲେ ଭାରତ ଆଗାମୀ ଫିଫା ଇଭେଣ୍ଟ ପାଇଁ ସମ୍ପୂର୍ଣ୍ଣ ପ୍ରସ୍ତୁତ“ ବୋଲି ମଙ୍ଗଳବାର ଅନୁଷ୍ଠିତ ଖବରଦାତା ସମ୍ମିଳନୀରେ ଡେନର୍ବି ପ୍ରକାଶ କରିଛନ୍ତି। ଆୟୋଜକ ଦେଶ ଭାରତ ସ୍ବାଭାବିକ ଭାବେ ଟୁର୍ନାମେଣ୍ଟରେ ଖେଳିବାକୁ ଯୋଗ୍ୟତା ଅର୍ଜନ କରିଛି। ମରକ୍କୋ ଓ ତାଞ୍ଜାନିଆ ସହିତ ଭାରତ ଏହି ପ୍ରତିଯୋଗିତାରେ ଡେବ୍ୟୁ କରିବ। ଏହାସତ୍ତ୍ୱେ ଭାରତ ବିପକ୍ଷରେ ଗୋଲ କରିବା ପ୍ରତିପକ୍ଷ ଦଳ ପାଇଁ ସହଜ ହେବନାହିଁ ବୋଲି ଡେନର୍ବି କହିଛନ୍ତି। ”ଆମ ବିପକ୍ଷରେ ଆମେରିକା ଫେଭରାଇଟ, ଏଥିରେ ଦ୍ୱିମତ ନାହିଁ। ମାତ୍ର ତାହା କେବଳ ଏକ ରେକର୍ଡ। ପ୍ରକୃତ ଫୁଟ୍ବଲ ପଡ଼ିଆରେ ୯୦ରୁ ୯୫ ମିନିଟ୍ ଖେଳିବାକୁ ପଡ଼ିଥାଏ। ତେଣୁ ଆମେରିକା ବିପକ୍ଷରେ ଆମର ମଧ୍ୟ ସୁଯୋଗ ଅଛି ବୋଲି ଆମେ ଅନୁଭବ କରୁଛୁ। କ୍ୱାର୍ଟର ଫାଇନାଲରେ ପ୍ରବେଶ କରିପାରିଲେ ତାହା ଆମ ପାଇଁ ବହୁତ ବଡ଼ ସଫଳତା ହେବ। ତେବେ ଏବେ ଆମେ କେବଳ ପ୍ରଥମ ମ୍ୟାଚ ଉପରେ ଫୋକସ କରୁଛୁ। ଯଦି ଆମେରିକା ବିପକ୍ଷରେ ଆମେ ପ୍ରଥମେ ଗୋଲ ସ୍କୋର କରିପାରିବୁ ତେବେ ଚାପ ପକାଇ ପାରିବୁ। ଏଥିରୁ ଫାଇଦା ମିଳିବା ସମ୍ଭାବନା ରହିଛି“ ବୋଲି ଏହି ସ୍ବିଡିଶ୍ କୋଚ୍ ପ୍ରକାଶ କରିଛନ୍ତି। ଆମେ ୪୫-୪୬ କୋର୍ ଖେଳାଳିଙ୍କୁ ନେଇ କ୍ୟାମ୍ପ ଆରମ୍ଭ କରିଥିଲୁ। କେବଳ ଗୋଲ୍କିପର ଅନିତା ଏବଂ ପିଙ୍କୁ ଦେବୀଙ୍କୁ ଛାଡ଼ିଦେଲେ ଅନ୍ୟ କେହି ଆହତ ସମସ୍ୟାରେ ନାହାନ୍ତି। ଦୀର୍ଘଦିନ କ୍ୟାମ୍ପ୍ ଚାଲିଥିଲେ ହେଁ ଅଧିକ ଖେଳାଳି ଆହତ ନ ହେବା ବହୁତ ଭଲ କଥା ବୋଲି ସେ କହିଛନ୍ତି।
