ଭୁବନେଶ୍ୱର, ୧୨।୧୦ (କ୍ରୀଡ଼ା ପ୍ରତିନିଧି): ଭାରତ ଏବଂ ଓଡ଼ିଶା କ୍ରୀଡ଼ା ଇତିହାସରେ ଯୋଡ଼ି ହୋଇଛି ଏକ ନୂଆ ଅଧ୍ୟାୟ। ଦେଶରେ ପ୍ରଥମଥରପାଇଁ ଆୟୋଜିତ ହୋଇଛି ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ। ଟୁର୍ନାମେଣ୍ଟରେ ଭାରତ ମଧ୍ୟ ଡେବ୍ୟୁ କରିଛି। କଳିଙ୍ଗ ଷ୍ଟାଡିୟମରେ ଉଦ୍ଘାଟିତ ହୋଇଛି ବିଶ୍ୱକପର ୭ମ ସଂସ୍କରଣ। ପ୍ରତିଯୋଗିତାର ପ୍ରଥମ ମ୍ୟାଚ ଅପରାହ୍ନ ୪ଟା ୩୦ରେ ବ୍ରାଜିଲ ଓ ମରକ୍କୋ ମଧ୍ୟରେ ହୋଇଥିଲେ ହେଁ ଉଦ୍ଘାଟନୀ ଉତ୍ସବ ରାତି ୮ଟାରେ ଭାରତ-ଆମେରିକା ମ୍ୟାଚ ପୂର୍ବରୁ ଅନୁଷ୍ଠିତ ହୋଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ର କ୍ରୀଡ଼ାମନ୍ତ୍ରୀ ଅନୁରାଗ ଠାକୁର, କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ବିଭାଗ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଫିଫା ମହାସଚିବ ଫାତମା ସମୋଉରା, ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ. ପାଣ୍ଡିଆନ, ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫଏଫ) ସଭାପତି କଲ୍ୟାଣ ଚୌବେ ପ୍ରମୁଖ ଅତିଥିଭାବେ ଯୋଗ ଦେଇଥିଲେ। ମୁଖ୍ୟମନ୍ତ୍ରୀ ହାତଯୋଡ଼ି ସମସ୍ତ ଖେଳାଳି ଓ ଅଫିସିଆଲଙ୍କ ସହ ପରିଚିତ ହେବାପରେ ମ୍ୟାଚ ଆରମ୍ଭ ହୋଇଥିଲା। ରାଜ୍ୟ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା ଏହି ଉତ୍ସବରେ ଯୋଗ ଦେଇଥିଲେ। ଆତସବାଜି କାର୍ଯ୍ୟକ୍ରମ ଦର୍ଶକଙ୍କ ମନ ମୋହିଥିଲା। ପୂର୍ବରୁ ହକି ବିଶ୍ୱକପ ସମେତ ଡଜନେରୁ ଊର୍ଦ୍ଧ୍ୱ ଅନ୍ତର୍ଜାତୀୟ ଟୁର୍ନାମେଣ୍ଟ ଦେଖି ସାରିଥିବା ଓଡ଼ିଶା ଦର୍ଶକ ଏବେ ଉପଭୋଗ କରିଛନ୍ତି ଫିଫାର ଏକ ମେଗା ପ୍ରତିଯୋଗିତା। ବିଶ୍ୱର ମହିଳା ଫୁଟବଲରେ ରାଜୁତି କରୁଥିବା ଉଦୀୟମାନ ତାରକାଙ୍କ ଆକ୍ସନ ଦେଖିବାକୁ ମିଳିଛି କଳିଙ୍ଗ ଆରେନାରେ। ଓଡ଼ିଶାର ଦର୍ଶକ ମଧ୍ୟ ଏହି ସୁଯୋଗକୁ ହାତଛଡ଼ା କରି ନାହାନ୍ତି। ବହୁ ସଂଖ୍ୟାରେ ଉପସ୍ଥିତ ରହି ଫୁଟବଲର ରୋମାଞ୍ଚକୁ ନିକଟରୁ ଦେଖିବା ସହ ସେମାନଙ୍କ ପ୍ରିୟ ତାରକାଙ୍କୁ ଉତ୍ସାହିତ କରିଥିଲେ।