ମୁମ୍ବାଇ, ୨ା୧୨ (ପି.ଟି.)-ପୁରୁଷ ଦଳ ଅପେକ୍ଷା ଜାତୀୟ ମହିଳା ଦଳ ପ୍ରଥମେ ଫିଫା ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିବ ବୋଲି ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ସଭାପତି ପ୍ରଫୁଲ ପଟେଲ କହିଛନ୍ତି। ମହିଳା ଦଳ ୨୦୨୭ ଫିଫା ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିବ ବୋଲି ଏଆଇଏଫ୍ଏଫ୍ ଆଶା କରୁଥିବା ପଟେଲ କହିଛନ୍ତି। ପଟେଲଙ୍କ କଥାକୁ ସମର୍ଥନ ଜଣାଇ ୨୦୨୭ ବିଶ୍ୱକପ୍ ପାଇଁ ମହିଳା ଦଳ କିପରି ଯୋଗ୍ୟତା ହାସଲ କରିପାରିବ ସେ ନେଇ ଏକ ରୋଡ୍ମ୍ୟାପ୍ ପ୍ରସ୍ତୁତ କରିବା ଲାଗି କ୍ରୀଡ଼ା ମନ୍ତ୍ରଣାଳୟ ଏଆଇଏଫ୍ଏକୁ କହିଥିବା ସେ ସୂଚନା ଦେଇଛନ୍ତି। ଫିଫା ର଼୍ୟାଙ୍କିଙ୍ଗରେ ପୁରୁଷ ଦଳ ତୁଳନାରେ ମହିଳା ଦଳ ଭଲ ସ୍ଥାନରେ ରହିଛି। କିନ୍ତୁ ପୁରୁଷ ତୁଳନାରେ ମହିଳା ଫୁଟ୍ବଲ ଦଳ ପ୍ରତି ସେତେଟା ଧ୍ୟାନ ଦିଆଯାଉନାହିଁ। ୧୭ବର୍ଷରୁ କମ୍ ମହିଳା ବିଶ୍ୱକପ୍ ଦଳର ସଦସ୍ୟ ଏବଂ କ୍ରୀଡ଼ା ମନ୍ତ୍ରୀ କିରନ ରିଜିଜୁଙ୍କ ସହିତ ଏକ ଭର୍ଚୁଆଲ କଥାବାର୍ତ୍ତାବେଳେ ପଟେଲ ଏକଥା କହିଛନ୍ତି। ଏହି ପିଲାମାନେ କ୍ରମେ ଉନ୍ନତି କରିପାରିଲେ ମହିଳା ଦଳ ପୁରୁଷଙ୍କଠାରୁ ଆଗୁଆ ୨୦୨୭ ସଂସ୍କରଣରେ ଭାଗ ନେବେ ବୋଲି ପଟେଲ ଆଶା ପ୍ରକାଶ କରି କହିଛନ୍ତି। ଫିଫା ର଼୍ୟାଙ୍କିଙ୍ଗରେ ମହିଳା ଦଳ ୧୫୯ ଦେଶ ମଧ୍ୟରେ ୫୫ତମ ସ୍ଥାନରେ ରହିଥିବାବେଳେ ପୁରୁଷ ଦଳ ୨୧୦ ଦେଶ ମଧ୍ୟରେ ୧୦୪ତମ ସ୍ଥାନରେ ରହିଛି। ରିଜିଜୁ ମଧ୍ୟ ସମାନ କଥା କହିଥିଲେ। ନିକଟ ଭବିଷ୍ୟତରେ ଭାରତ ମହିଳା ଫିଫା ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିବ। ଏନେଇ ତାଙ୍କର ଦୃଢ ବିଶ୍ୱାସ ରହିଥିବା ରିଜିଜୁ କହିଛନ୍ତି।
