କାତାର ବିଶ୍ୱକପ୍ ପାଇଁ ୨୬ ଜଣିିଆ ସୌଦି ଆରବ ଫୁଟ୍ବଲ ଦଳ ଘୋଷଣାର ୪୮ ଘଣ୍ଟା ନ ପୂରୁଣୁ ଡୋପିଙ୍ଗ୍ ମାମଲା ଯୋଗୁ ଓ୍ବିଙ୍ଗର ଫହାଦ୍ ଅଲ୍-ମୋଓ୍ବାଲାଦ୍ ବାଦ୍ ପଡ଼ିଛନ୍ତି। ସତର୍କତାମୂଳକ ପଦକ୍ଷେପସ୍ବରୂପ ମୋଓ୍ବାଲାଦ୍ଙ୍କୁ ଦଳରୁ ବାଦ୍ ଦିଆଯାଇଥିବା କୋଚ୍ ହର୍ଭେ ରେନାର୍ଡ ତାଙ୍କ ଟୁଇଟର ଆକାଉଣ୍ଟରେ ସୂଚନା ଦେଇଛନ୍ତି। ଗତ ଫେବୃୟାରୀରେ ଡୋପିଙ୍ଗ୍ ପଦାର୍ଥ ଫୁରୋସେମାଇଡ୍ ପାଇଁ ଏହି ଖେଳାଳିଙ୍କୁ ମେ’ରେ ୧୮ ମାସ ପାଇଁ ସସ୍ପେଣ୍ଡ କରାଯାଇଥିଲା। ସୌଦି ମିଡିଆ ରିପୋର୍ଟ ପକ୍ଷରୁ କୁହାଯାଇଛି, ୨୮ ବର୍ଷୀୟ ମୋଓ୍ବାଲାଦ୍ ଯେପରି କାତାରରେ ଖେଳିବା ପାଇଁ ମନୋନୀତ ହେବେ ସେଥିପାଇଁ ତାଙ୍କ ବାସନ୍ଦ ଦଣ୍ଡକୁ ହ୍ରାସ କରାଯାଇଥିଲା। ସେ ଦ୍ୱିତୀୟଥର ବିଶ୍ୱକପ୍ ଖେଳିବାକୁ ଯାଉଥିଲେ। ମାତ୍ର ଓ୍ବାଲର୍ଡ ଆଣ୍ଟି ଡୋପିଙ୍ଗ୍ ଏଜେନ୍ସି(ଓ୍ବାଡା) ସୌଦି ଆରବ ଦଳ ମନୋନୟନ ପୂର୍ବରୁ ଏହି ମାମଲାରେ ହସ୍ତକ୍ଷେପ କରିଥିଲା। ମୋଓ୍ବାଲାଦ୍ଙ୍କୁ ଦୀର୍ଘ ସମୟ ଅଯୋଗ୍ୟ ଘୋଷଣା କରିବା ଲାଗି କ୍ରୀଡ଼ାର ସର୍ବୋଚ୍ଚ ନ୍ୟାୟାଳୟ କୋର୍ଟ ଅଫ୍ ଆର୍ବିଟ୍ରେଶନ ଫର୍ ସ୍ପୋଟର୍ସ (କାସ୍)ରେ ଅପିଲ କରିଛି। କାତାର ଫୁଟ୍ବଲ ବିଶ୍ୱକପ୍ ଗ୍ରୁପ୍-‘ସି’ରେ ସୌଦି ଆରବ ଏହାର ପ୍ରଥମ ମ୍ୟାଚ୍ ଟୁର୍ନାମେଣ୍ଟର ଅନ୍ୟତମ ଫେଭରାଇଟ୍ ଆର୍ଜେଣ୍ଟିନାକୁ ଭେଟିବ। ଏହାର ଅଳ୍ପ ଦିନ ପୂର୍ବରୁ ମୋଓ୍ବାଲାଦ୍ ବିଶ୍ୱକପ୍ରୁ ବାଦ୍ ପଡ଼ିଛନ୍ତି। ସୌଦି ଆରବ ପରେ ନଭେମ୍ବର ୨୬ରେ ପୋଲାଣ୍ଡ ଓ ୩୦ରେ ମେକ୍ସିକୋ ସହ ମୁକାବିଲା କରିବ। ରେନାର୍ଡ ବର୍ତ୍ତମାନ ଅଲ୍-ଶାବାବରେ ମୋଓ୍ବାଲାଦଙ୍କ ଜଣେ କ୍ଲବ ଟିମ୍ମେଟ୍ ନାଓ୍ବାଫ୍ ଅଲ୍ ଆବିଦ୍ଙ୍କୁ ସୌଦି ଆରବ ଫୁଟ୍ବଲ ଦଳରେ ସାମିଲ କରିଛନ୍ତି। ମୋଓ୍ବାଲାଦ ଦଶନ୍ଧି ଧରି ଅଲ୍ ଇତିହାଦ୍ ଦଳରେ ଖେଳିବା ପରେ ଏହି ସିଜନରେ ଅଲ୍ ଶାବାବ୍ ଦଳରେ ଯୋଗଦେଇଛନ୍ତି। ୨୦୧୮ ବିଶ୍ୱକପ୍ ପରେ କିଛିଦିନ ସେ ଲୋନ୍ଭିତ୍ତିରେ ସ୍ପେନ୍ର ଲେଭାଣ୍ଟି ଦଳରେ ଖେଳିଥିଲେ। ଗତ ବିଶ୍ୱକପ୍ରେ ମୋଓ୍ବାଲାଦ ଗ୍ରୁପ୍ ପର୍ଯ୍ୟାୟର ସମସ୍ତ ତିନୋଟି ମ୍ୟାଚ୍ ଖେଳିଥିଲେ। ଇଜିପ୍ଟକୁ ପରାସ୍ତ କରିବା ପୂର୍ବରୁ ରୁଷିଆ ଓ ଉରୁଗୁଏଠାରୁ ହାରିଯାଇଥିଲା ସୌଦି ଆରବ।