ନୂଆଦିଲ୍ଲୀ, ୧୩।୮- ୨୦୨୨ ଫିଫା ବିଶ୍ୱକପର ଏସିଆନ କ୍ୱାଲିଫାଇଂ ମ୍ୟାଚ ଗୁଡ଼ିକ ୨୦୨୧କୁ ଘୁଞ୍ଚାଇ ଦିଆ ଯାଇଛି। କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଏସିଆନ ଫୁଟବଲ କନ୍ଫେଡେରେଶନ (ଏଏଫସି) ଫିଫା ବିଶ୍ୱକପ ଏବଂ ୨୦୨୩ ଏସିଆନ କପ୍ର ଅକ୍ଟୋବର ଓ ନଭେମ୍ବରରେ ହେବାକୁଥିବା ମ୍ୟାଚ ଗୁଡ଼ିକୁ ସ୍ଥଗିତ ରଖିଛି। ଫଳରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଅକ୍ଟୋବର ୮ରେ ହେବାକୁଥିବା ଭାରତ-କାତାର ମ୍ୟାଚ ମଧ୍ୟ ସ୍ଥଗିତ ରହିଛି। ଏଥିସହ ଚଳିତ ବର୍ଷ ଭାରତୀୟ ଫୁଟବଲ ଦଳ ଆଉ କୌଣସି ମ୍ୟାଚ ନ ଖେଳିବା ସ୍ପଷ୍ଟ ହୋଇ ଯାଇଛି। ଶେଷଥରପାଇଁ ଭାରତ ଗତବର୍ଷ ନଭେମ୍ବରରେ ମସ୍କଟଠାରେ ଓମାନ ବିପକ୍ଷରେ କ୍ୱାଲିଫାଇଂ ମ୍ୟାଚ ଖେଳି ୦-୧ ଗୋଲରେ ପରାସ୍ତ ହୋଇଥିଲା।
ଭାରତ ବିଶ୍ୱକପ ଯୋଗ୍ୟତା ହାସଲ ଦୌଡ଼ରୁ ବାଦ୍ ପଡ଼ିଥିଲେ ହେଁ ୨୦୨୩ ଏସିଆନ କପ୍ ଆଶା ଉଜ୍ଜୀବିତ ରଖିଛି। ବିଶ୍ୱକପ ଯୋଗ୍ୟତା ପର୍ଯ୍ୟାୟରେ ଭାରତ ଏହାର ପରବର୍ତ୍ତୀ ମ୍ୟାଚ ଗୁଡ଼ିକରେ କାତାର, ଆଫଗାନିସ୍ତାନ ଓ ବାଂଲାଦେଶ ବିପକ୍ଷରେ ମ୍ୟାଚ ଖେଳିବାର ଅଛି। ନିଜ ଗ୍ରୁପ୍ରେ ଭାରତ ତୃତୀୟ ସ୍ଥାନ ହାସଲ କରିପାରିଲେ ସିଧାସଳଖ ୨୦୨୩ ଏସିଆନ କପ୍ ତୃତୀୟ ରାଉଣ୍ଡ କ୍ୱାଲିଫାୟର୍ସ ପାଇଁ ଯୋଗ୍ୟତା ଅର୍ଜନ କରିବ। ”ଅନେକ ଦେଶରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଫିଫା ଏବଂ ଏସିଆନ ଫୁଟବଲ କନ୍ଫେଡେରେଶନ ଯୁଗ୍ମଭାବେ ଚଳିତ ବର୍ଷ ଅକ୍ଟୋବର ଓ ନଭେମ୍ବରରେ ହେବାକୁଥିବା ଯୋଗ୍ୟତା ପର୍ଯ୍ୟାୟ ମ୍ୟାଚ ଗୁଡ଼ିକ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି। ୨୦୨୧ରେ ଏହି ମ୍ୟାଚ ଗୁଡ଼ିକର ପରବର୍ତ୍ତୀ କାର୍ଯ୍ୟସୂଚୀ ପ୍ରକାଶ ପାଇବ“ ବୋଲି ଫିଫା ଏବଂ ଏଏଫସି ପକ୍ଷରୁ ଏକ ଯୁଗ୍ମ ବିବୃତ୍ତିରେ ପ୍ରକାଶ କରାଯାଇଛି। ବିଶ୍ୱକପ ଯୋଗ୍ୟତା ପର୍ଯ୍ୟାୟରେ ଭାରତ ୫ଟି ମ୍ୟାଚ ଖେଳି ୩ ପଏଣ୍ଟ ସହିତ ଗ୍ରୁପ୍ ‘ଇ’ର ୪ର୍ଥ ସ୍ଥାନରେ ରହିଛି। କାତାର ୧୩ ପଏଣ୍ଟ ସହିତ ଶୀର୍ଷସ୍ଥାନ ଅଧିକାର କରିଛି। ୮ଟି ଗ୍ରୁପ୍ ବିଜେତା ଏବଂ ଶ୍ରେଷ୍ଠ ୪ ରନର୍ସଅପ୍ ଦଳ ବିଶ୍ୱକପ ପାଇଁ ଯୋଗ୍ୟତା ଅର୍ଜନ କରିବେ।