ଇସ୍ତାନବୁଲ,୯।୨ : ତୁର୍କୀରେ ଭୂକମ୍ପ ଉଦ୍ଧାର କାର୍ଯ୍ୟ ଜାରି ରହିଛି। ପୃଥିବୀର ୭୨ ଟି ରାଷ୍ଟ୍ର ତୁର୍କୀକୁ ସହାୟତାର ହାତ ବଢ଼ାଇଛନ୍ତି। ଏହି କ୍ରମରେ ମାଟି ତଳେ ପୋତି ହୋଇ ରହିଥିବା ଲୋକଙ୍କ ଉଦ୍ଧାର ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚଓ) ମୁଖ୍ୟ ଟେଡ୍ରୋସ ଆଧାନୋମ ଘେବ୍ରେୟସସ ଚେତାବନୀ ଦେଇଛନ୍ତି ଯେ ଅଳିଆ ଗଦାରେ ପୋତି ହୋଇଯାଇଥିବା ଲୋକଙ୍କ ପାଇଁ ସମୟ ସରି ସରି ଯାଉଛି। ଜୀବନ ଯୁଦ୍ଧରେ ସମୟ ସହିତ ମୁକାବିଲା, ସମୟ ସରିବା ପୂର୍ବରୂ ଜୀବନ ବଞ୍ଚାନ୍ତୁ ୭୨ ଦେଶର ଉଦ୍ଧାରକାରୀ ।
ତାଙ୍କର ଏଭଳି ଭାବୁକ ମନ୍ତବ୍ୟ ସମସ୍ତଙ୍କୁ ବ୍ୟଥିତ କରିଛି। ତୁର୍କୀ ଏବଂ ସିରିଆର ଅନେକ ସହରରେ ତାପମାତ୍ରା ଶୂନ ତଳେ ପହଞ୍ଚିଛି। ମିଳିତ ଜାତିସଂଘ କହିଛି ଯେ ଭୂକମ୍ପ ପ୍ରଭାବିତ ଅଞ୍ଚଳରେ ବରଫ ଓ ବର୍ଷା ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରୁଛି। ଭୂକମ୍ପର କେନ୍ଦ୍ରସ୍ଥଳ ଗଞ୍ଜିଆତେପର ଲୋକମାନେ କହିଛନ୍ତି ଯେ ବିନାଶର ୧୨ ଘଣ୍ଟା ପରେ ମଧ୍ୟ ସାହାଯ୍ୟ ସେମାନଙ୍କ ନିକଟରେ ପହଞ୍ଚି ନ ଥିଲା। ସବୁଠାରୁ ଅଧିକ ପ୍ରଭାବିତ ଅଞ୍ଚଳର ଅନେକ ପରିବାର କହିଛନ୍ତି ଯେ ଉଦ୍ଧାର କାର୍ଯ୍ୟ ବହୁତ ମନ୍ଥର ହୋଇଛି। ବର୍ଜ୍ୟବସ୍ତୁରୁ ସମ୍ପର୍କୀୟମାନଙ୍କୁ ଖୋଳିବାରେ ଆମେ କୌଣସି ସାହାଯ୍ୟ ପାଇନାହୁଁ । ବିପର୍ଯ୍ୟୟ ଯୋଗୁ ରାସ୍ତା ନଷ୍ଟ ହୋଇ ଯାଇଛି। ଫଳରେ ଦୁର୍ଗମ ଅଞ୍ଚଳରେ ପହଞ୍ଚିବା ମଧ୍ୟ କଷ୍ଟସାଧ୍ୟ ହୋଇପଡିଛି।
ୟୁରୋପୀୟ ୟୁନିଅନ, ଆମେରିକା, ଇସ୍ରାଏଲ ଏବଂ ରୁଷିଆ ପକ୍ଷରୁ ତାଲିମପ୍ରାପ୍ତ ଉଦ୍ଧାରକାରୀ ଦଳ ତୁର୍କୀରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଅସ୍ଥାୟୀ ଶିବିରକୁ ପ୍ୟାକ ହୋଇଥିବା ଖାଦ୍ୟ, କମ୍ବଳ, ଔଷଧ ଏବଂ ଅନ୍ୟାନ୍ୟ ଜିନିଷ ପଠାଯାଉଛି।