ମୁଜାଫରପୁର,୨୫।୫: ଜଣେ ବୃଦ୍ଧଙ୍କ ପାଇଁ ଲିଭ୍ଇନ୍ ରିଲେଶନଶିପ୍ରେ ରହିବା ମହଙ୍ଗା ପଡ଼ିଛି। କୌଣସି କାରଣରୁ ବୃଦ୍ଧ ଏବଂ ତାଙ୍କ ସହିତ ଲିଭ୍ଇନ୍ରେ ରହୁଥିବା ମହିଳାଙ୍କ ମଧ୍ୟରେ ପାଟିତୁଣ୍ଡ ହେବାରୁ ପରିସ୍ଥିତି ଭୟଙ୍କର ହୋଇଥିଲା। ଶେଷରେ ଘର କଥା ଦାଣ୍ଡକୁ ଆସିଛି। ମହିଳା ଜଣକ ବୃଦ୍ଧଙ୍କୁ ସର୍ବସାଧାରଣଙ୍କ ସମ୍ମୁଖରେ ନିସ୍ତୁକ ପିଟିଛନ୍ତି। ଏବେ ଏହାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏହି ଘଟଣା ବିହାରର ମୁଜାଫରପୁରରେ ଘଟିଛି। ଲିଭ୍ଇନ୍ରେ ଥିବା ସମ୍ପୃକ୍ତ ବୃଦ୍ଧ ଜଣକ ଔରାଇ ଅଞ୍ଚଳର ରତଓ୍ବାରା ଗାଁର ବାସିନ୍ଦା। ସେ ତାଙ୍କୁଠାରୁ ଯଥେଷ୍ଟ କମ୍ ବୟସ୍କା ଜଣେ ମହିଳାଙ୍କୁ ଭଲ ପାଉଥିଲେ। ବିବାହ କରିବାର ପ୍ରତିଶ୍ରୁତି ମଧ୍ୟ ଦେଇଥିଲେ। ଉଭୟ ଲିଭ୍ଇନ୍ରେ ଥିଲେ। ତେବେ କରୋନା ମହାମାରୀ ସଂକ୍ରମଣ ଯୋଗୁ ରାଜ୍ୟରେ ଲକ୍ଡାଉନ୍ ଘୋଷଣା କରାଯାଇଛି। ଏପରିସ୍ଥଳେ ବୃଦ୍ଧଙ୍କ ପାଖରେ ଥିବା ଟଙ୍କା ସରିଯିବାରୁ ସେ ସମ୍ପୃକ୍ତ ମହିଳାଙ୍କୁ ନ ଜଣାଇ ଚୁପ୍ଚାପ୍ ଗାଁକୁ ଯିବାକୁ ସ୍ଥାନୀୟ ଇମିଲିଚଟ୍ଟି ବସଷ୍ଟାଣ୍ଡ୍ରେ ପହଞ୍ଚିଥିଲେ। ମହିଳା ଜଣକ କୌଣସି ସୂତ୍ରରୁ ସମ୍ପର୍କିତ ଖବର ପାଇ ବସ୍ଷ୍ଟାଣ୍ଡ୍ରେ ପହଞ୍ଚି ବୃଦ୍ଧଙ୍କୁ ନିସ୍ତୁକ ପିଟିବା ଆରମ୍ଭ କରିଥିଲେ। ଉପସ୍ଥିତ ଲୋକେ କେବଳ ନୀରବ ଦର୍ଶକ ପାଲଟିଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଥାନାକୁ ଆଣିଥିଲେ। ପରେ ସେମାନଙ୍କୁ ଛାଡି ଦିଆଯାଇଥିବା କୁହାଯାଉଛି।
