ଲାଉସାନେ, ୨୨ା୫(ପି.ଟି.)- ଦେଶରେ ହକି ଖେଳର ସମୃଦ୍ଧି ଓ ବିକାଶ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ହକି ଇଣ୍ଡିଆକୁ ଶୁକ୍ରବାର ସମ୍ମାନଜନକ ଇଟିନ୍ ଗ୍ଲିଚିଚ୍ ପୁରସ୍କାର ମିଳିଛି। ଏଠାରେ ଅନ୍ଲାଇନ୍ରେ ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍)ର ୪୭ତମ ସମ୍ମିଳନୀ ଅନୁଷ୍ଠିତ ହେଉଛି। ଏଥିରେ ଏଫ୍ଆଇଏଚ୍ର ସମ୍ମାନଜନ ପୁରସ୍କାର ବିଜେତାଙ୍କ ନାମ ଘୋଷଣା କରାଯାଇଛି। ହକି ପାଇଁ ଉଲ୍ଲେଖନୀୟ ଅବଦାନ ରଖିଥିବା ବ୍ୟକ୍ତିବିଶେଷ, ଟିମ୍ ଓ ସଙ୍ଗଠନର କାର୍ଯ୍ୟକୁ ସ୍ବୀକୃତି ପାଇଁ ଏହି ପୁରସ୍କାର ଦିଆଯାଇଥାଏ। ପାବ୍ଲୋ ନର୍ଗେ ପୁରସ୍କାର ଉଜ୍ବେକିସ୍ତାନ ହକି ମହାସଂଘକୁ ମିଳିଥିଲା। ନୂଆ ଭିତ୍ତିଭୂମି ଜରିଆରେ ପ୍ଲେଇଂ କଣ୍ଡିଶନରେ ଉନ୍ନତି ଆଣିବା, ୟୁଥ୍ ଡେଭଲପମେଣ୍ଟ ମଡେଲର ପ୍ରଚଳନ କ୍ଷେତ୍ରରେ ଉଦ୍ୟମ ପ୍ରଚେଷ୍ଟା ପାଇଁ ଏହି ପୁରସ୍କାର ଦିଆଯାଇଛି। ପୋଲାଣ୍ଡ ହକି ଆସୋସିଏଶନକୁ ଥେଓ ଇକେମା ପୁରସ୍କାର ଦିଆଯାଇଛି। ଆସୋସିଏଶନ ହକିର ବିକାଶ ଲାଗି ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛି। ୩୦ଜଣ ନୂଆ କୋଚ୍ଙ୍କୁୁ ତାଲିମ ଦେବା ସହ ଦେଶର ୩,୦୦୦ ସ୍କୁଲ ପିଲାଙ୍କୁ ହକି ଖେଳ ସହିତ ସମ୍ପୃକ୍ତ କରାଇଛି। ବ୍ୟକ୍ତିଗତ ଭାବେ ଯେଉଁମାନେ ପୁରସ୍କାର ଜିତିଛନ୍ତି ସେମାନଙ୍କ ମଧ୍ୟରେ ରହିଛନ୍ତି ଇଂଲଣ୍ଡ ଷ୍ଟ୍ରାଇକର ସାମ୍ ଓ୍ବାର୍ଡ, ୨୦୧୯ରେ ତାଙ୍କ ଆଖିରେ ଆଘାତ ଲାଗିବାରୁ ତାଙ୍କ କ୍ୟାରିୟର ପ୍ରତି ବିପଦ ଦେଖା ଦେଇଥିଲା। ସେ ସୁପର ଫେୟାର ପ୍ଲେ ଟ୍ରଫି ରେନେ ଜି’ ଫ୍ରାଙ୍କ୍ ପୁରସ୍କାର ଲାଭ କରିଛନ୍ତି। ଗଷ୍ଟ୍ ଲାଥୋର୍ସ ମେମୋରିଆଲ ଟ୍ରଫି କ୍ରୋଏସିଆର ଇଭୋନା ମାକାର ଜିତିଥିଲେ। ଅମ୍ପାୟରିଂ ଡେଭଲପମେଣ୍ଟ କାର୍ଯ୍ୟ ପାଇଁ ତାଙ୍କୁ ଏହି ପୁରସ୍କାର ମିଳିଛି। ନ୍ୟୁଜିଲାଣ୍ଡର ଶାରନ ଓ୍ବିଲିୟମସନ ଏଚ୍ଆର୍ଏଚ୍ ସୁଲ୍ତାନ ଆଜଲାନ୍ ଶାହା ପୁରସ୍କାର ପାଇଛନ୍ତି। ନ୍ୟୁଜିଲାଣ୍ଡର ଅକ୍ଲାଣ୍ଡଠାେରେ ନୂଆ ଜାତୀୟ ହକି ସେଣ୍ଟର ପ୍ରତିଷ୍ଠା ଦିଗରେ ତାଙ୍କର ଉଲ୍ଲେଖନୀୟ ଅବଦାନ ରହିଛି। ଏଫ୍ଆଇଏଚ୍ର ସମ୍ମାନଜନକ ପୁରସ୍କାର ୪୭ତମ ଅଧିବେଶନର ପ୍ରଥମ ଦିବସରେ ଘୋଷଣା କରାଯାଇଥିଲା। ଶନିବାର ଏଫ୍ଆଇଏଚ୍ ସଭାପତି ଏବଂ କାର୍ଯ୍ୟନିର୍ବାହୀ ବୋର୍ଡର ୪ ସାଧାରଣ ସଦସ୍ୟ ପଦବୀ ପାଇଁ ନିର୍ବାଚନ ହେବାର କାର୍ଯ୍ୟକ୍ରମ ରହିଛି।
