ବୁଏନ୍ସ ଆରିଜ, ୧୩।୪-
ଏଫ୍ଆଇଏଚ୍ ପ୍ରୋ ଲିଗ୍ ହକିରେ ଭାରତ ଅଲିମ୍ପିକ୍ ଚାମ୍ପିୟନ ଆର୍ଜେଣ୍ଟିନା ବିପକ୍ଷରେ ଡବଲ ବିଜୟ ହାସଲ କରିଛି। ପୂର୍ବ ମ୍ୟାଚରେ ଶୁଟ୍ ଆଉଟ ୩-୨ ଗୋଲରେ ବିଜୟୀ ହୋଇଥିବା ଭାରତ ସୋମବାର ଦ୍ୱିତୀୟ ମ୍ୟାଚରେ ଘରୋଇ ଦଳକୁ ୩-୦ ଗୋଲରେ ପରାସ୍ତ କରିଛି। ଏଥିସହ ଭାରତ ପଏଣ୍ଟ ଟେବୁଲର ୪ର୍ଥ ସ୍ଥାନକୁ ଉନ୍ନୀତ ହୋଇଛି।
ପୂରା ମ୍ୟାଚରେ ପ୍ରଭାବ ବିସ୍ତାର କରି ଖେଳିଥିଲା ଭାରତ। ୧୧ତମ ମିନିଟରେ ଗୋଲ ଦେଇ ହରମନପ୍ରୀତ ସିଂ ପ୍ରଥମ କ୍ୱାର୍ଟରରେ ଭାରତକୁ ଅଗ୍ରଣୀ କରାଇଥିଲେ। ୨୫ତମ ମିନିଟ୍ରେ ଲଳିତ ଉପାଧ୍ୟାୟ ଏକ ଗୋଲ ଦେବାରୁ ପ୍ରଥମାର୍ଦ୍ଧ ଶେଷସୁଦ୍ଧା ଭାରତ ୨-୦ରେ ଅଗ୍ରଣୀଲାଭ କରିଥିଲା। ତୃତୀୟ କ୍ୱାର୍ଟରରେ ସଂଘର୍ଷପୂର୍ଣ୍ଣ ଖେଳ ଦେଖିବାକୁ ମିଳିଥିଲା। ଉଭୟ ଦଳ ସୁଯୋଗ ସୃଷ୍ଟି କରିଥିଲେ ହେଁ ଗୋଲ ଦେଇପାରି ନ ଥିଲେ। ୪ର୍ଥ ତଥା ଅନ୍ତିମ କ୍ୱାର୍ଟରରେ ଭାରତ ଆକ୍ରମଣକୁ ଜୋରଦାର କରିଥିବାବେଳେ ୫୮ତମ ମିନିଟରେ ମନପ୍ରୀତ ସିଂ ଏକ ଗୋଲ ଦେଇ ଦଳର ୩ ପଏଣ୍ଟ ହାସଲକୁ ନିଶ୍ଚିତ କରିଥିଲେ। ଏହି ମ୍ୟାଚ ଜିତିବା ସହ ଭାରତ ୮ ଗେମ୍ରୁ ୩ ବିଜୟ, ୩ ଶୁଟ୍ ଆଉଟ ବିଜୟ ଓ ୨ ପରାଜୟ ସହ ୧୫ ପଏଣ୍ଟ ପାଇଛି। ଦଳ ୨୨ଟି ଗୋଲ ଦେଇଥିବାବେଳେ ୧୭ ବରଣ କରିଛି। ଆର୍ଜେଣ୍ଟିନା ୧୨ ଗେମ୍ରୁ ୧୧ ପଏଣ୍ଟରେ ରହି ୬ଷ୍ଠ ସ୍ଥାନରେ ରହିଛି। ଆଗାମୀ ଅଲିମ୍ପିକ୍ସରେ ଭାରତ, ଆର୍ଜେଣ୍ଟିନା ଓ ଅଷ୍ଟ୍ରେଲିଆ ଗୋଟିଏ ଗ୍ରୁପ୍ରେ ରହିଥିବାରୁ ପରସ୍ପର ବିପକ୍ଷରେ ମ୍ୟାଚ ଖେଳିବେ। ତେଣୁ ଭାରତ ପାଇଁ ଏହା ଭଲ ମ୍ୟାଚ ପ୍ରାକ୍ଟିସ ସଦୃଶ ହୋଇଛି। ଏହି ୩ ଦଳ ସହ ପୁଲ୍ ‘ଏ’ରେ ସ୍ପେନ, ନ୍ୟୁଜିଲାଣ୍ଡ ଓ ଘରୋଇ ଫେଭରାଇଟ ଜାପାନ ସ୍ଥାନ ପାଇଛି। ”ଦ୍ୱିତୀୟ ମ୍ୟାଚରେ ଆର୍ଜେଣ୍ଟିନା ଭଲ ଖେଳିଥିଲା। ମାତ୍ର ଭାରତର ଦୃଢ଼ ରକ୍ଷଣଭାଗ ଯୋଗୁ ଗୋଲ ଦେଇପାରି ନ ଥିଲା“ ବୋଲି ଭାରତୀୟ ଗୋଲକିପର କ୍ରିଷ୍ଣନ ପାଠକ ପ୍ରକାଶ କରିଥିଲେ। ପାଠକ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଥିଲେ। ଆର୍ଜେଣ୍ଟିନା ରକ୍ଷଣଭାଗ ମଧ୍ୟ ଦୃଢ଼। ତେବେ ଆମ ଖେଳାଳିମାନେ ଚକ୍ମା ଦେବାରେ ସକ୍ଷମ ହେଲେ ବୋଲି ସେ କହିଛନ୍ତି। ଏଫ୍ଆଇଏଚ୍ ପ୍ରୋ ଲିଗ୍ରେ ଭାରତର ପରବର୍ତ୍ତୀ ପ୍ରତିଦ୍ୱନ୍ଦ୍ୱୀ ଗ୍ରେଟ ବ୍ରିଟେନ। ଭାରତ ସେଠାକୁ ଯାଇ ମେ ୮ ଓ ୯ ତାରିଖରେ ୨ଟି ଲିଗ୍ ମ୍ୟାଚ ଖେଳିବ। ବେଲଜିୟମ ୧୩ ମ୍ୟାଚରୁ ସର୍ବାଧିକ ୩୨ ପଏଣ୍ଟ ପାଇ ଟେବୁଲର ଶୀର୍ଷସ୍ଥାନରେ ରହିଥିବାବେଳେ ଜର୍ମାନୀ ୮ ମ୍ୟାଚରୁ ୧୯, ନେଦରଲାଣ୍ଡ୍ସ ୧୧ ମ୍ୟାଚରୁ ୧୮ ପଏଣ୍ଟ ପାଇ ପ୍ରଥମ ୩ ସ୍ଥାନରେ ଅଛନ୍ତି। ଅଷ୍ଟ୍ରେଲିଆ ୮ ମ୍ୟାଚରୁ ୧୪ ପଏଣ୍ଟ ପାଇ ଭାରତ ପଛକୁ ୫ମ ସ୍ଥାନ ଅଧିକାର କରିଛି।