ଟୋକିଓ, ୨୯ା୭ (ଏପି)-ଅଲିମ୍ପିକ୍ସରେ ଫିଜି ପୁଣି ଥରେ ରଗ୍ବୀ ସେଭେନ୍ସ ଟାଇଟଲ ହାସଲ କରିଛି। ବୁଧବାର ଜେରି ତୁଓ୍ବାଇଙ୍କ ନେତୃତ୍ୱାଧୀନ ଦଳ ନ୍ୟୁଜିଲାଣ୍ଡ ବିପକ୍ଷ ଫାଇନାଲରେ ୨୭-୧୨ରେ ବିଜୟ ହାସଲ କରିଛି। ଫଳରେ କୋଭିଡ୍ ସମୟରେ ପ୍ରଶାନ୍ତ ମହାସାଗରରେ ଅବସ୍ଥିିତ ଏହି କ୍ଷୁଦ୍ର ଦ୍ୱୀପରାଷ୍ଟ୍ରରେ ଖୁସିର ବାତାବରଣ ଦେଖାଦେଇଛି। ୨୦୧୬ ରିଓ ଗେମ୍ସରେ ରଗ୍ବୀ ସେଭେନ୍ସକୁ ପ୍ରଥମ ଥର ସାମିଲ କରାଯାଇଥିଲା। ସେଥର ଗ୍ରେଟ୍ ବ୍ରିଟେନକୁ ପରାସ୍ତ କରି ଫିଜି ସ୍ବର୍ଣ୍ଣ ପଦକ ଲାଭ କରିଥିଲା। ଅଲିମ୍ପିକ୍ସରେ ଫିଜିର ଏହା ଥିଲା ପ୍ରଥମ ସ୍ବର୍ଣ୍ଣ। ଏହି ଦିନକୁ ସ୍ମରଣ ରଖିବା ଲାଗି ସରକାର ଗୋଟିଏ ଦିନ ଜାତୀୟ ଛୁଟି ଘୋଷଣା କରିଥିଲେ। ସେଣ୍ଟ୍ରାଲ ବ୍ୟାଙ୍କ୍ ପକ୍ଷରୁ ୭ ଡଲାର ନୋଟ୍ ଛପାଯାଇଥିଲା। ତୁଓ୍ବାଇଙ୍କ ଦଳ କିଛି ମାସ ହେଲା ବାୟୋ-ବବଲରେ ରହିଆସିଥିଲା। ଫିଜିକୁ ଫେରିଲେ ପୁଣି କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ପ୍ରଶାନ୍ତ ମହାସାଗର ଅନ୍ତର୍ଗତ ଉଭୟ ଫିଜି ଓ ନ୍ୟୁଜିଲାଣ୍ଡ ଦେଶର ଜାତୀୟ କ୍ରୀଡ଼ା ହେଉଛି ରଗ୍ବୀ। ହେଲେ ଏହି ଖେଳ ସମଗ୍ର ଫିଜିରେ ଗ୍ରାମଠାରୁ ଆରମ୍ଭ କରି ସହରରେ ବେଶ୍ ଲୋକପ୍ରିୟ। ନ୍ୟୁଜିଲାଣ୍ଡ ରୌପ୍ୟ ଜିତିଥିଲେ ମଧ୍ୟ ଏହାର ଉନ୍ନତି ଘଟିଛି। କାରଣ ଏହି ଦଳ ୨୦୧୬ ରିଓ ଡି’ଜେନିରୋରେ ପୋଡିୟମ ଫିନିଶ କରିପାରି ନ ଥିଲା। ଆର୍ଜେଣ୍ଟିନା ୧୭-୧୨ରେ ବ୍ରିଟେନକୁ ପରାସ୍ତ କରି ବ୍ରୋଞ୍ଜ ପଦକ ଲାଭ କରିଥିଲା।
