ମାଞ୍ଚେଷ୍ଟର,୨୪।୭(ଏପି): ସ୍ଥାନୀୟ ଓଲ୍ଡ ଟ୍ରାଫର୍ଡ ଗ୍ରାଉଣ୍ଡରେ ଶୁକ୍ରବାର ଆରମ୍ଭ ହୋଇଥିବା ଇଂଲଣ୍ଡ ବିପକ୍ଷ ତୃତୀୟ ତଥା ଅନ୍ତିମ ଟେଷ୍ଟ ମ୍ୟାଚ୍ରେ ଭ୍ରମଣକାରୀ ଓ୍ବେଷ୍ଟଇଣ୍ଡିଜ ଟସ୍ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଛି। ରିପୋର୍ଟ ଲେଖାହେବା ବେଳକୁ ଇଂଲଣ୍ଡ ପ୍ରଥମ ଇନିଂସ ଆରମ୍ଭ କରି ପ୍ରାରମ୍ଭିକ ଝଟ୍କା ଖାଇଛି। ଦଳ ୮ ଓଭରରେ ଗୋଟିଏ ଉଇକେଟ ହରାଇ ୧୩ ରନ ସଂଗ୍ରହ କରିଛି। ଓପନର ଡୋମିନିକ୍ ସିବ୍ଲେ ଖାତା ଖୋଲିବା ପୂର୍ବରୁ କେମର ରୋଚଙ୍କ ବଲ୍ରେ ଏଲ୍ବିଡବ୍ଳୁୃ ହୋଇ ପ୍ୟାଭିଲିୟନ ଫେରିଛନ୍ତି। ରୋରି ବର୍ଣ୍ଣସ ୫ ଓ ଅଧିନାୟକ ଜୋ ରୁଟ ୩ ରନ କରି ବ୍ୟାଟିଂ ଜାରି ରଖିଛନ୍ତି।
ସାମ କୁରାନ ଓ ଜ୍ୟାକ କ୍ରଲିଙ୍କ ବଦଳରେ ଇଂଲଣ୍ଡ ଜୋଫ୍ରା ଆର୍ଚର ଓ ଜେମ୍ସ ଆଣ୍ଡରସନଙ୍କୁ ଦଳରେ ସାମିଲ କରିଛି। ଅପରପକ୍ଷରେ ଓ୍ବେଷ୍ଟଇଣ୍ଡିଜ ଦଳରେ ଗୋଟିଏ ପରିବର୍ତ୍ତନ କରାଯାଇଛି। ଅଲଜାରି ଜୋସେଫ୍ଙ୍କ ବଦଳରେ ସ୍ପିନର ରାଖିମ କର୍ନଓ୍ବାଲଙ୍କୁ ଦଳରେ ସାମିଲ କରାଯାଇଛି। ୩ ମ୍ୟାଚ୍ ବିଶିଷ୍ଟ ଏହି ସିରିଜ ୧-୧ରେ ସମାନସ୍ତରରେ ରହିଛି। ୧୯୮୮ ପରେ ଓ୍ବେଷ୍ଟଇଣ୍ଡିଜ ପ୍ରଥମଥର ପାଇଁ ଇଂଲଣ୍ଡ ମାଟିରେ ସିରିଜ ବିଜୟ ଲକ୍ଷ୍ୟରେ ରହିଛି।
