ଭୁବନେଶ୍ୱର,୭।୧୨: ଇଣ୍ଡିଆନ୍ ବ୍ୟାଙ୍କ ପକ୍ଷରୁ ମଙ୍ଗଳବାର ସ୍ଥାନୀୟ ଚନ୍ଦ୍ରଶେଖରପୁର ସ୍ଥିତ ରେଳ ଅଡିଟୋରିୟମଠାରେ ଏକ ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି) ଆଉଟ୍ରିଚ୍ ଶିବିରର ଆୟୋଜନ କରାଯାଇଥିଲା। ଉକ୍ତ ଶିବିରରେ ବ୍ୟାଙ୍କର ପରିଚାଳନା ନିର୍ଦ୍ଦେଶକ ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶାନ୍ତିଲାଲ ଜୈନ, ରାଜ୍ୟ ସରକାରଙ୍କ ଇନ୍ଷ୍ଟିଚ୍ୟୁଶନାଲ୍ ଫାଇନାନ୍ସ ବିଭାଗର ନିର୍ଦ୍ଦେଶକ ପ୍ରଜ୍ଞାସ୍ମିତା ସାହୁ ଓ ବ୍ୟାଙ୍କର କ୍ଷେତ୍ରୀୟ ମହାପ୍ରବନ୍ଧକ ମନୋଜ ଦାଶ, ମିଶନ ଶକ୍ତିର ଯୁଗ୍ମ ସଚିବ ବିନୋଦ କୁମାର ଜେନା ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ନିର୍ଦ୍ଦେଶକ ସାହୁ ତାଙ୍କ ବକ୍ତବ୍ୟରେ ସ୍ବୟଂ ସହାୟକ ଗୋଷ୍ଠୀଗୁଡିକ ଗ୍ରାମାଞ୍ଚଳର ମେରୁଦଣ୍ଡ ବୋଲି ପ୍ରକାଶ କରିଥିଲେ। ସେହିପରି ଜୈନ କହିଥିଲେ, ଇଣ୍ଡିଆନ ବ୍ୟାଙ୍କ ଏସ୍ଏଚ୍ଜିଙ୍କୁ ଋଣ ପ୍ରଦାନ କ୍ଷେତ୍ରରେ ଅଗ୍ରଣୀ ଭୂମିକା ଗ୍ରହଣ କରିଥିବାବେଳେ ଗୃହ ନିର୍ମାଣ ପାଇଁ ଏସ୍ଏଚ୍ଜି ହାଉସିଂ ଆଦି ବିଭିନ୍ନ ଯୋଜନାରେ ୧୦ଲକ୍ଷରୁ ୨୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ରାଶି ବିନା ସିକ୍ୟୁରିଟିରେ ଉପଲବ୍ଧ ହୋଇପାରିବ। ଉକ୍ତ କାର୍ଯ୍ୟକ୍ରମରେ ରାଜ୍ୟର ୨୯୧୦ଟି ସ୍ବୟଂ ସହାୟକ ଗୋଷ୍ଠୀକୁ ୧୨୬ କୋଟି ଟଙ୍କାର ଋଣ ମଞ୍ଜୁର କରାଯାଇଛି। ସେହିପରି ବ୍ୟାଙ୍କର କ୍ଷେତ୍ରୀୟ ମହାପ୍ରବନ୍ଧକ ମନୋଜ ଦାସ ବ୍ୟାଙ୍କ ଦ୍ୱାରା ପ୍ରଦାନ କରାଯାଇଥିବା ଆର୍ଥିକ ସେବାକୁ ହିତାଧିକାରୀମାନେ ଠିକ୍ ବ୍ୟବହାର କରି ଲାଭବାନ୍ ହେବା ପାଇଁ ଆହ୍ବାନ କରିଥିଲେ। ଋଣଗ୍ରହୀତାମାନେ ସଠିକ୍ ସମୟରେ ଋଣ ପରିଶୋଧ କରି ସେମାନଙ୍କର କ୍ରେଡିଟ୍ ସ୍କୋରରେ ଉନ୍ନତି ଆଣିବାସହ ସୁଧ ରିହାତି ପାଇବା ଉପରେ ଦାସ ଗୁରୁତ୍ୱାରୋପ କରିଥିଲେ।