ଭୁବନେଶ୍ୱର, ୨ା୧୧(କ୍ରୀଡ଼ା ପ୍ରତିନିଧି): ଅଦମ୍ୟ ଇଚ୍ଛାଶକ୍ତି ଏବଂ ନିଷ୍ଠା ବଳରେ ଆଗକୁ ବଢ଼ିବାର ପ୍ରୟାସ ଜାରି ରଖିଛନ୍ତି ଓଡ଼ିଶାର ‘ସ୍ନୋ ଗର୍ଲ’ ରଞ୍ଜିତା ବେହେରା। ତାଙ୍କୁ ଏବେ ସହାୟତାର ହାତ ବଢ଼ାଇଛି ଏଲ୍ଆଇସି ହାଉସିଂ ଫାଇନାନ୍ସ ନିଗମ। ସ୍ନୋ, ସ୍କି ପରି ବରଫ କ୍ରୀଡ଼ାରେ ପ୍ରଭାବୀ ପ୍ରଦର୍ଶନ କରି ପ୍ରଶଂସା ସାଉଁଟି ଚାଲିଥିବା ରଞ୍ଜିତାଙ୍କୁ ମଙ୍ଗଳବାର ଏଲ୍ଆଇସି ହାଉସିଂ ଫାଇନାନ୍ସ ନିଗମ ପକ୍ଷରୁ ସମ୍ବର୍ଦ୍ଧିତ କରାଯାଇଛି। ଏଠାରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ତାଙ୍କୁ ୨ ଲକ୍ଷ ଟଙ୍କାର ଚେକ୍ ଓ ଉପଢୌକନ ପ୍ରଦାନ କରାଯାଇଛି। ଏଥିରେ ସ୍ବାଭାବିକଭାବେ ଖୁସି ଜାହିର କରିଛନ୍ତି ରଞ୍ଜିତା। ଆସନ୍ତା ଜାନୁୟାରୀରେ ସର୍ବିୟାରେ ଅନ୍ତର୍ଜାତୀୟ ଏବଂ ଫେବୃୟାରୀରେ ଜାତୀୟ ପ୍ରତିଯୋଗିତା ଅଛି। ଅନ୍ତର୍ଜାତୀୟ ପ୍ରତିଯୋଗିତାରେ ଭାଗନେବା ପୂର୍ବରୁ ମୁଁ ୟୁରୋପର ଆଲଭାସରେ ବ୍ୟୟ ବହୁଳ ତାଲିମ ପାଇଁ ଲକ୍ଷ୍ୟ ରଖିଛି। ତେଣୁ ଆର୍ଥିକ ପ୍ରୋତ୍ସାହନ ନିଶ୍ଚିତ ମୋତେ ତାଲିମ ପାଇଁ ସହାୟକ ହେବ। ଓଡ଼ିଶା ସରକାର କ୍ରୀଡ଼ା ପାଇଁ ବହୁତ କିଛି କରୁଛନ୍ତି। ରାଜ୍ୟ ସରକାରଙ୍କଠାରୁ ମଧ୍ୟ ପ୍ରୋତ୍ସାହନ ମିଳିବ ବୋଲି ଆଶା ରଖିଛି। ଏହା ହୋଇପାରିଲେ ମୁଁ ଉପଯୁକ୍ତ ତାଲିମ ନେଇ ଆଗାମୀ ଦିନରେ ରାଜ୍ୟ ଏବଂ ଦେଶକୁ ଗର୍ବିତ କରିପାରିବି“ ବୋଲି ରାଉରକେଲାର ଅନ୍ନପୂର୍ଣ୍ଣା ଓ ରଘୁନାଥ ବେହେରାଙ୍କ କନ୍ୟା ରଞ୍ଜିତା ପ୍ରକାଶ କରିଛନ୍ତି।
ରଞ୍ଜିତାଙ୍କୁ ସମ୍ବର୍ଦ୍ଧିତ କରିବା ଅବସରରେ ଏଲ୍ଆଇସି ହାଉସିଂ ଫାଇନାନ୍ସ ନିଗମର କ୍ଷେତ୍ରୀୟ ପ୍ରବନ୍ଧକ ରମେଶ ଚନ୍ଦ୍ର ଖୋରା କହିଛନ୍ତି ଯେ, ”ଓଡ଼ିଶାଭଳି ବରଫହୀନ ରାଜ୍ୟରେ ଜନ୍ମ ହୋଇଥିଲେ ମଧ୍ୟ ଏହା ତାଙ୍କ ପାଇଁ କୌଣସି ପ୍ରତିବନ୍ଧକ ନୁହେଁ ବୋଲି ରଞ୍ଜିତା ପ୍ରମାଣିତ କରିଛନ୍ତି। ତାଙ୍କ ପ୍ରଭାବୀ ପ୍ରଦର୍ଶନ ପାଇଁ ଆଜି ରାଜ୍ୟ ଗର୍ବିତ। ରଞ୍ଜିତା ଆଗାମୀ ଯୁବପୀଢ଼ିଙ୍କ ପାଇଁ ଏକ ରୋଲ୍ ମଡେଲ ଏବଂ ତାଙ୍କର ଏହି ବ୍ୟୟ ବହୁଳ କ୍ରୀଡ଼ା ପାଇଁ ସହାୟତା କରିବାଲାଗି ସରକାରଙ୍କ ସମେତ ବିଭିନ୍ନ ଉଦ୍ୟୋଗପତି ଏବଂ ଶିଳ୍ପାନୁଷ୍ଠାନ ଆଗେଇ ଆସିବା ଉଚିତ“। ସମ୍ବର୍ଦ୍ଧନା କାର୍ଯ୍ୟକ୍ରମରେ ନିଗମର ଆଞ୍ଚଳିକ ପ୍ରବନ୍ଧକ ଇନ୍ଦ୍ରନୀଳ ରାୟ, ଶାଖା ପ୍ରବନ୍ଧକ ସୁମନ୍ତ ପାଣିଗ୍ରାହୀ ଏବଂ ସ୍କି ଓ ସ୍ନୋ ବୋର୍ଡ ଆସୋସିଏଶନ ଅଫ୍ ଓଡ଼ିଶାର ସଭାପତି ଅନୁପ କୁମାର ନାୟକ, ସମ୍ପାଦକ ସୁଶାନ୍ତ ଦାସ, ଯୁଗ୍ମ ସମ୍ପାଦକ ସୁଜିତ ପଟ୍ଟନାୟକ ଏବଂ ଅନ୍ୟ କର୍ମକର୍ତ୍ତାମାନେ ଉପସ୍ଥିତ ଥିଲେ।
