ସମ୍ବଲପୁର,୧୩ା୧୦(ବ୍ୟୁରୋ): ମଧ୍ୟମ ଓ କ୍ଷୁଦ୍ର ଶିଳ୍ପ କ୍ଷେତ୍ରକୁ ପ୍ରୋତ୍ସାହନ ଦେବା ପାଇଁ ରାଜ୍ୟରେ ସରକାର ଅର୍ଥ ନିଗମ ଖୋଲିଥିଲେ। ସେ ସମୟରେ ରାଜନେତା, ପ୍ରତିଷ୍ଠିତ ବ୍ୟବସାୟୀ ଏହା ଦ୍ୱାରା ବେଶ୍ ଲାଭବାନ ହୋଇଥିଲେ। ସେମାନେ ନିଗମରୁ ବହୁ କୋଟି ଟଙ୍କା ଋଣ ଆକାରରେ ନେଇଥିଲେ। ପରବର୍ତ୍ତୀ ସମୟରେ ଋଣଟଙ୍କା ଫେରସ୍ତ ନ କରି ଚଳୁ କରିଦେଇଥିଲେ। ଫଳରେ ରାଜ୍ୟରେ ଅର୍ଥ ନିଗମ ଦେବାଳିଆ ଅବସ୍ଥାରେ ପହଞ୍ଚତ୍ୟାଇଛି। ସମ୍ବଲପୁର ଆଞ୍ଚଳିକ ଶାଖା ମଧ୍ୟ ଏଥିରୁ ବାଦ୍ ପଡ଼ିନାହିଁ।
ସମ୍ବଲପୁର ଆଞ୍ଚଳିକ ଶାଖା ଅଧୀନରେ କଳାହାଣ୍ଡି, ବଲାଙ୍ଗୀର, ବରଗଡ଼, ଝାରସୁଗୁଡ଼ା, ସୁନ୍ଦରଗଡ଼ ଜିଲାରେ ଶାଖା ଖୋଲି ଋଣ ପ୍ରଦାନ କରାଯାଉଥିଲା। ଏଥିରେ ଉକ୍ତ ଜିଲାଗୁଡ଼ିକର ଶିଳ୍ପପତି, ରାଜନେତା, ବ୍ୟବସାୟୀ ପ୍ରତ୍ୟକ୍ଷ ଓ ପରୋକ୍ଷ ଭାବେ ଅନୁଷ୍ଠାନ ଖୋଲି ଋଣ ନେଇଥିଲେ। ଏହିସବୁ ଜିଲାର ୧୨୧୦ ଗ୍ରାହକ ପ୍ରାୟ ୧୦୦ କୋଟିରୁ ଊର୍ଦ୍ଧ୍ୱ ଋଣ ନେଇଥିଲେ। ୧୯୮୦ରୁ ୧୯୯୦ ପ୍ରାୟ ୧୦ବର୍ଷ ଭିତରେ ଏହି ଋଣ ପ୍ରଦାନ କରାଯାଇଥିଲା। ପରେ ଶିଳ୍ପପତିମାନେ ନିଜକୁ ଦେବାଳିଆ ଘୋଷଣାକରି ନିଗମକୁ ଫାଙ୍କିଦେଲେ। ଅନ୍ୟପଟେ ଋଣପାଇଁ ଦେଇଥିବା କାଗଜପତ୍ର, ଜମି ଓ ଦସ୍ତାବିଜରେ ମଧ୍ୟ ଜାଲିଆତି ହୋଇଥିଲା। ଫଳରେ ଅର୍ଥ ନିଗମ ପାଇଁ ଋଣ ଆଦାୟରେ ସମସ୍ୟା ସୃଷ୍ଟି ହେଉଛି। ସମ୍ବଲପୁର ଅଫିସରୁ ମିଳିଥିବା ସୂଚନା ଅନୁସାରେ ଏବେ ମଧ୍ୟ ଏହି ଜିଲାଗୁଡ଼ିକ ମଧ୍ୟରେ ୭୨ଟି ମାମଲା କୋର୍ଟରେ ବିଚାରାଧୀନ ରହିଛି। କୋର୍ଟ ନିର୍ଦ୍ଦେଶକ୍ରମେ ଆଗାମୀ ପଦକ୍ଷେପ ଗ୍ରହଣ କରାଯିବ। ପ୍ରାୟ ୫ବର୍ଷ ଭିତରେ ସୁନ୍ଦରଗଡ଼ ଜିଲା ରାଜଗାଙ୍ଗପୁର କୋଣାର୍କ ଅକ୍ସିଜେନ ପ୍ଲାଣ୍ଟ ନାମକ କମ୍ପାନୀକୁ ନିଲାମ କରାଯାଇଥିଲା। ଏଥିରୁ ପ୍ରାୟ ଅଢ଼େଇକୋଟି ଟଙ୍କା ଆଦାୟ ହୋଇଛି। କିଛିବର୍ଷ ପୂର୍ବରୁ ନିଗମ ପକ୍ଷରୁ ୨ଟି ଗାଡ଼ି ଜବତ କରାଯାଇଥିଲା। ଉକ୍ତ ଗାଡ଼ି ଷ୍ଟକ୍ୟାର୍ଡରେ ପଡ଼ିରହିଛି। କୋର୍ଟରେ ମାମଲା ବିଚାରାଧୀନ ଥିବାରୁ ନିଲାମ କରାଯାଇ ପାରୁନାହିଁ। ଫଳରେ ଗାଡ଼ିଗୁଡ଼ିକ ସ୍କ୍ରାପ୍ ଆକାରରେ ବିକ୍ରି କରାଯିବ। ଆଞ୍ଚଳିକ ଅଫିସ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି। ଛାତରୁ ପାଣି ଗଳିବା ସହ କାନ୍ଥ ବିପଦସଙ୍କୁଳ ରହିଛି। ଆବଶ୍ୟକ କର୍ମଚାରୀ ନିଯୁକ୍ତି କରାଯାଉନାହିଁ। ମାତ୍ର ୨ଜଣ କର୍ମଚାରୀ କୋର୍ଟ କଚେରି ଓ ଚିଠି ଦିଆନିଆ କାମ ପାଇଁ ଜଗି ବସିଛନ୍ତି। ବରଗଡ଼, ବଲାଙ୍ଗୀର, କଳାହାଣ୍ଡି, ସୁନ୍ଦରଗଡ଼, ଝାରସୁଗୁଡ଼ା ଜିଲା ଅଫିସଗୁଡ଼ିକ ବନ୍ଦ କରିଦିଆଯାଇଛି। ସମସ୍ତ କାଗଜପତ୍ର ସମ୍ବଲପୁର ଆଞ୍ଚଳିକ ଅଫିସରେ ରଖାଯାଇଛି।
ରାଜ୍ୟରେ ପୂର୍ବରୁ ୧୬ହଜାର କର୍ମଚାରୀ ଓ ଅଧିକାରୀ ରହିଥିବା ବେଳେ ଏବେ ମାତ୍ର ୨୭ଜଣ ଅଧିକାରୀ ଓ କର୍ମଚାରୀ କାର୍ଯ୍ୟରତ ଅଛନ୍ତି। ଏ ସମ୍ପର୍କରେ ରାଜ୍ୟ ଅର୍ଥ ନିଗମର ରିକଭରି ମୁଖ୍ୟ କାହ୍ନୁଚରଣ ପାଣିଗ୍ରାହୀ କହିଛନ୍ତି, ଆବଶ୍ୟକ କର୍ମଚାରୀ ନ ଥିବାରୁ ଋଣ ଆଦାୟରେ ସମସ୍ୟା ହେଉଛି। ଅନେକ କମ୍ପାନୀର ଚିହ୍ନବର୍ଣ୍ଣ ନ ଥିବାବେଳେ ଋଣ ନେଇଥିବା ବ୍ୟକ୍ତିବିଶେଷ ମଧ୍ୟ ମୃତ୍ୟୁବରଣ କରିସାରିଛନ୍ତି। ଭାରତୀୟ ଲଘୁ ବିକାଶ ବ୍ୟାଙ୍କରେ ରାଜ୍ୟ ଅର୍ଥ ନିଗମ ଋଣୀ ହୋଇ ରହିଛି। ଋଣ ପରିଶୋଧ ନ ହେବାରୁ ଅର୍ଥ ନିଗମ ମଧ୍ୟ ବକେୟା ଟଙ୍କା ପରିଶୋଧ କରିପାରୁନାହିଁ। ଗ୍ରାହକମାନଙ୍କୁ ବାରମ୍ବାର ନୋଟିସ କରାଯାଉଛି। ୨୦୦୨ରୁ ଅର୍ଥ ନିଗମ ଋଣ ଦେବା ଉପରେ ରୋକ ଲଗାଇଛି। ଏବେ କେବଳ ଋଣ ଆଦାୟ ଉପରେ ଗୁରୁତ୍ୱ ଦେଉଛି ବୋଲି ସେ କହିଥିଲେ।