ମେଲବୋର୍ନ,୬।୧୦: ଷ୍ଟାର ଅଷ୍ଟ୍ରେଲିଆନ ବ୍ୟାଟ୍ସମ୍ୟାନ ଡେଭିଡ ଓ୍ବାର୍ନର ଏବେ ଖରାପ ଫର୍ମ କାରଣରୁ ଆଇପିଏଲରେ ଖେଳିବାକୁ ସୁଯୋଗ ପାଉନାହାନ୍ତି। ବର୍ଷେରୁ ଅଧିକ ସମୟ ହେଲା ଅନ୍ତର୍ଜାତୀୟ ଟି୨୦ ଫର୍ମାଟରେ ଖେଳିନାହାନ୍ତି ଏହି ବିସ୍ଫୋରକ ବ୍ୟାଟ୍ସମ୍ୟାନ। ଏହାସତ୍ତ୍ୱେ ଟି୨୦ ବିଶ୍ୱକପ୍ରେ ସେ ଅଷ୍ଟ୍ରେଲିଆ ପାଇଁ ଓପନିଂ କରିବେ। ଏଥିରେ କୌଣସି ସନ୍ଦେହ ନାହିଁ ବୋଲି କହିଛନ୍ତି ଅଷ୍ଟ୍ରେଲିଆ ଦଳର ଅଧିନାୟକ ଆରୋନ ଫିଞ୍ଚ।
“ଅଷ୍ଟ୍ରେଲିଆକୁ ପ୍ରତିନିଧିତ୍ୱ କରିଥିବା ଶ୍ରେଷ୍ଠ ଖେଳାଳିଙ୍କ ମଧ୍ୟରୁ ଓ୍ବାର୍ନର ଜଣେ। ତାଙ୍କ ପ୍ରସ୍ତୁତି ଉପରେ ମୋର ସନ୍ଦେହ ନାହିଁ” ବୋଲି ଟି୨୦ ବିଶ୍ୱକପ୍ ପାଇଁ ଅଷ୍ଟ୍ରେଲିଆ ଦଳର ୟୁଏଇ ଗସ୍ତ ପୂର୍ବରୁ ଫିଞ୍ଚ କହିଛନ୍ତି।
ଅନ୍ତିମ ଥର ୨୦୨୦ ସେପ୍ଟେମ୍ବରରେ ଓ୍ବାର୍ନର ଖେଳିଥିଲେ ଅନ୍ତର୍ଜାତୀୟ ଟି୨୦ ମ୍ୟାଚ୍। ଏହାପରେ ଆହତ ସମସ୍ୟା ଓ ବିଶ୍ରାମ ଭଳି କାରଣରୁ ଲଗାତାର ୪ ସିରିଜ୍ (୧୪ ମ୍ୟାଚ୍)ରେ ଖେଳିବା ଲାଗି ସେ ଉପଲବ୍ଧ ନ ଥିଲେ। ଉଲ୍ଲେଖଯୋଗ୍ୟ, ଚଳିତ ଆଇପିଏଲ ସିଜନର ଉଭୟ ଫେଜରେ ଓ୍ବାର୍ନର ୮ ମ୍ୟାଚ୍ ଖେଳି ୨ଟି ଅର୍ଦ୍ଧଶତକ ହାସଲ କରିଥିଲେ। ଏଭଳି ପ୍ରଦର୍ଶନ କାରଣରୁ ସନରାଇଜର୍ସ ହାଇଦ୍ରାବାଦ୍ ତାଙ୍କୁ ଅଧିନାୟକ ପଦରୁ ତଡ଼ି ଦେଇଥିଲା।
