ଆମର ଅନେକ ରାଜନେତା ଅଛନ୍ତି, ଯେଉଁମାନଙ୍କ ହାତରେ ଆମ ଦେଶ ଏବଂ ରାଜ୍ୟ ପରିଚାଳିତ ହେଉଛି। ତେବେ ଏମାନଙ୍କ ଶିକ୍ଷାଗତ ଯୋଗ୍ୟତା ବିଷୟରେ ଅଧିକାଂଶ ଲୋକ ଜାଣି ନ ଥିବେ। ଜାଣନ୍ତୁ ଏ ସମ୍ପର୍କରେ…
ମନମୋହନ ସିଂଙ୍କ ଶିକ୍ଷାଗତ ଯୋଗ୍ୟତା:
ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ହେଉଛନ୍ତି ଜଣେ ଉଚ୍ଚଶିକ୍ଷିତ। ସେ ପଞ୍ଜାବ ବିଶ୍ୱବିଦ୍ୟାଳୟରୁ ଅର୍ଥନୀତିରେ ମାଷ୍ଟର ଡିଗ୍ରୀ ହାସଲ କରିଛନ୍ତି। ୧୯୫୭ରେ କେମ୍ବ୍ରିଜ ୟୁନିଭର୍ସିଟିର ସେଣ୍ଟ ଜନ୍ କଲେଜରୁ ଇକୋନୋମିକ୍ସ ଟ୍ରିପୋ ସମାପ୍ତ କରିଥିଲେ ଏବଂ ୧୯୬୦ରେ ଅକ୍ସଫୋର୍ଡ ୟୁନିଭର୍ସିଟିରେ ଡକ୍ଟରେଟ ଡିଗ୍ରୀ ହାସଲ କରିଥିଲେ।
ମୋଦିଙ୍କ ଶିକ୍ଷାଗତ ଯୋଗ୍ୟତା:
ବର୍ତ୍ତମାନର ପ୍ରଧାନମନ୍ତ୍ରୀ ପିଲାଦିନେ ସେ ଭଦନଗର ରେଳ ଷ୍ଟେଶନରେ ଚା’ଷ୍ଟଲ ଚଳାଉଥିବା ପିତାଙ୍କୁ ସାହାଯ୍ୟ କରୁଥିଲେ। ପରେ ସେ ଏବଂ ତାଙ୍କ ଭାଇ ଏକ ବସ୍ ଟର୍ମିନାଲ୍ରେ ନିଜେ ଏକ ଚା’ ଷ୍ଟଲ ଚଳାଉଥିଲେ। ୧୯୭୮ରେ ମୋଦି ବିଏ ପାସ୍ କରିଥିଲେ। ଦିଲ୍ଲୀ ବିଶ୍ୱବିଦ୍ୟାଳୟର ସ୍କୁଲ ଅଫ୍ ଓପନ ଲର୍ନିଂରୁ ରାଜନୀତି ବିଜ୍ଞାନରେ ଡିଗ୍ରୀ ହାସଲ କରି ତୃତୀୟ ଶ୍ରେଣୀରେ ସ୍ନାତକ ହାସଲ କରିଥିଲେ।
ରାହୁଲ ଗାନ୍ଧୀଙ୍କ ଶିକ୍ଷାଗତ ଯୋଗ୍ୟତା:
କଂଗ୍ରେସ ନେତା ରାହୁଲ ଗାନ୍ଧୀ ତାଙ୍କର ପ୍ରାଥମିକ ଶିକ୍ଷା ଦିଲ୍ଲୀର ସେଣ୍ଟ କଲମ୍ବସ ସ୍କୁଲରୁ ଗ୍ରହଣ କରିଥିଲେ। ଏହା ପରେ ତାଙ୍କୁ ସମ୍ମାନଜନକ ଦ ଡୁନ ସ୍କୁଲ, ଦେହରାଡୁନରେ ଭର୍ତ୍ତି କରାଯାଇଥିଲା। ରାହୁଲ ଫ୍ଲୋରିଡାର ସମ୍ମାନଜନକ ହାର୍ଭାର୍ଡ ବିଶ୍ୱବିଦ୍ୟାଳୟର ରୋଲିନ୍ସ କଲେଜରୁ ସ୍ନାତକ ହାସଲ କରିଥିଲେ। ରାହୁଲ ଗାନ୍ଧୀ କେମ୍ବ୍ରିଜ ବିଶ୍ୱବିଦ୍ୟାଳୟର ଟ୍ରିନିଟି କଲେଜରୁ ଏମ୍.ଫିଲ ଡିଗ୍ରୀ ହାସଲ କରିଛନ୍ତି। ତେଣୁ ରାହୁଲ ଜଣେ ଉଚ୍ଚଶିକ୍ଷିତ ରାଜନେତା।
ଯେତେବେଳେ ଇନ୍ଦିରା ଗାନ୍ଧୀଙ୍କୁ ହତ୍ୟା କରାଯାଇଥିଲା, ସେତେବେଳେ ରାହୁଲଙ୍କୁ ୧୪ ବର୍ଷ ହୋଇଥିଲା। ସେ ବିଦ୍ୟାଳୟରେ ଅଧ୍ୟୟନ କରୁଥିଲେ। ସାତ ବର୍ଷ ପରେ ଅର୍ଥାତ୍ ୧୯୯୧ରେ ଯେତେବେଳେ ସେ କଲେଜରେ ପଢୁଥିଲେ ତାଙ୍କ ପିତା ରାଜୀବ ଗାନ୍ଧୀଙ୍କୁ ହତ୍ୟା କରାଯାଇଥିଲା। ଏହି ଦୁଇଟି ହତ୍ୟା ସମଗ୍ର ଗାନ୍ଧୀ ପରିବାରକୁ ଥରାଇ ଦେଇଥିଲା। ସୁରକ୍ଷା କାରଣରୁ ରାହୁଲଙ୍କୁ ଦେଶ ବାହାରକୁ ପଠାଯାଇଥିଲା।
ଶାହାଙ୍କ ଶିକ୍ଷାଗତ ଯୋଗ୍ୟତା:
କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଜୋର୍ଦାର ରାଜନୀତି ପ୍ରଚାର କରୁଛନ୍ତି। ତେବେ ଜାଣନ୍ତୁ ତାଙ୍କ ଶିକ୍ଷାଗତ ଯୋଗ୍ୟତା ବିଷୟରେ…
ରାଜନୀତିର ଚାଣକ୍ୟ କୁହାଯାଉଥିବା ଅମିତ ଶାହା ମେହସାନା ବିଦ୍ୟାଳୟରେ ତାଙ୍କର ପ୍ରାଥମିକ ଶିକ୍ଷା କରିଥିଲେ। ଏହା ପରେ ସେ ଅହମ୍ମଦାବାଦ ଯାଇ ସିୟୁ ଶାହା ସାଇନ୍ସ କଲେଜରେ ବାୟୋକେମିଷ୍ଟ୍ରି ଅଧ୍ୟୟନ କରିଥିଲେ। ସେ ବାୟୋ କେମେଷ୍ଟ୍ରିରେ ବିଏସ୍ସି ଡିଗ୍ରୀ ହାସଲ କରିଛନ୍ତି।
ନବୀନ ପଟ୍ଟନାୟକଙ୍କ ଶିକ୍ଷାଗତ ଯୋଗ୍ୟତା:
ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଥମେ ଡେରାଡୁନର ଓ୍ବେଲ୍ହମ ବୟଜ ସ୍କୁଲ ଏବଂ ପରେ ଡୁନ୍ ସ୍କୁଲରେ ଅଧ୍ୟୟନ ଶେଷ କରିଥିଲେ। ଏହା ପରେ ସେ ଦିଲ୍ଲୀ ବିଶ୍ୱବିଦ୍ୟାଳୟର କିରୋରି ମାଲ କଲେଜରୁ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି।
କାର୍ତ୍ତିକ ପାଣ୍ଡିଆନଙ୍କ ଶିକ୍ଷାଗତ ଯୋଗ୍ୟତା:
ବିଜେଡିର ବରିଷ୍ଠ ନେତା ତଥା ୫-ଟି ଅଧ୍ୟକ୍ଷ ପାଣ୍ଡିଆନ ତାମିଲନାଡୁ କୃଷି ବିଶ୍ୱବିଦ୍ୟାଳୟ (ମଦୁରାଇ କ୍ୟାମ୍ପସ)ରୁ କୃଷି କ୍ଷେତ୍ରରେ ସ୍ନାତକ ଡିଗ୍ରୀ ସମାପ୍ତ କରିଥିଲେ ଏବଂ ପରେ ଭାରତୀୟ କୃଷି ଅନୁସନ୍ଧାନ ପ୍ରତିଷ୍ଠାନ ପୁସା, ନୂଆଦିଲ୍ଲୀରୁ ମାଷ୍ଟର ଡିଗ୍ରୀ ହାସଲ କରିଥିଲେ। ୨୦୦୦ରେ ସେ ପଞ୍ଜାବ କ୍ୟାଡରରେ ଆଇଏସ୍ (ଭାରତୀୟ ପ୍ରଶାସନିକ ସେବା) ଅଧିକାରୀ ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ।