ମୋଗଲ ଗାର୍ଡେନର ନାମ ଅମୃତ ଉଦ୍ୟାନକୁ ପରିବର୍ତ୍ତନ କରାଯାଇଛି। ତେବେ ଏହି ମୋଗଲ ଗାର୍ଡେନ ଦିଲ୍ଲୀର ରାଷ୍ଟ୍ରପତି ଭବନ ପରିସରରେ ରହିଛି। ଏହି ଉଦ୍ୟାନ ସ୍ବଦେଶୀ ଏବଂ ବିଦେଶୀ ଫୁଲର ଏକ ଅଦ୍ଭୁତ ଉଦ୍ୟାନ। ଟ୍ୟୁଲିପ୍, ଗୋଲାପ ସହିତ ବିଭିନ୍ନ ପ୍ରକାରର ଫୁଲ ରହିଛି। ଏହା ୧୫ ଏକର ପରିମିତ ଜାଗାରେ ବ୍ୟାପିଛି। ଏହା ଭାରତୀୟ ସଂସ୍କୃତି ଏବଂ ମୋଗଲ ଶୈଳୀରେ ନିର୍ମିତ ହୋଇଥିଲା। ତେବେ ଏହାର ଇତିହାସ କ’ଣ ଜାଣନ୍ତୁ ସେ ସମ୍ପର୍କରେ…
ବ୍ରିଟିଶ ଶାସନ ସମୟରେ ମୋଗଲ ଗାର୍ଡେନ ତିଆରି କରାଯାଇଥିଲା। ମୋଗଲ ଗାର୍ଡେନ ନାମ ସୂଚିତ କରେ ଯେ, ଏହା ନିଶ୍ଚିତ ଭାବରେ ମୋଗଲ ଶାସକମାନଙ୍କ ଦ୍ୱାରା ନିର୍ମିତ ହୋଇଛି। କିନ୍ତୁ ଏହା ନୁହେଁ, ବ୍ରିଟିଶ ଶାସନ ସମୟରେ ଏହି ଉଦ୍ୟାନ ତିଆରି କରାଯାଇଥିଲା। ଯେତେବେଳେ ବ୍ରିଟିଶମାନେ ଭାରତ ଶାସନ କରୁଥିଲେ, ଦେଶର ରାଜଧାନୀ କୋଲକାତା ଥିଲା। ୧୯୧୧ରେ ଭାରତର ରାଜଧାନୀ ଦିଲ୍ଲୀକୁ ଉଠିଆସିଲା। ଦିଲ୍ଲୀରେ ଭାଇସରାୟଙ୍କ ହାଉସ ନିର୍ମାଣ କରାଯାଇଥିଲା। ସ୍ବାଧୀନତା ପରେ ଏହି ହାଉସ ରାଷ୍ଟ୍ରୀୟ ଭବନରେ ପରିଣତ ହେଲା। ଏହି ବିଲ୍ଡିଂର ଡିଜାଇନ ବ୍ରିଟିଶି ଶିଳ୍ପୀ ସାର୍ ଏଡଓ୍ବିନ ଲୁଟିନ୍ସଙ୍କ ଦ୍ୱାରା ପ୍ରସ୍ତୁତ କରାଯାଇଥିଲା। ଇଂଲଣ୍ଡରୁ ଭାରତ ଆସିବା ପରେ ସାର୍ ଏଡଓ୍ବିନ ଲୁଟିନ୍ସ ମୋଗଲ ଗାର୍ଡେନ୍ସର ମାନଚିତ୍ର ପ୍ରସ୍ତୁତ କରିଥିଲେ। ୧୯୧୭ରେ ମୋଗଲ ଗାର୍ଡେନର ଡିଜାଇନ ପ୍ରସ୍ତୁତ କରାଯାଇଥିଲା। ଏହି ଉଦ୍ୟାନ ୧୯୨୮ରେ ସମ୍ପୂର୍ଣ୍ଣ ହୋଇଥିଲା
ରାଷ୍ଟ୍ରପତି ଭବନ ରାଇସିନା ପାହାଡ଼ ଉପରେ ନିର୍ମିତ ହୋଇଥିଲା। ଏଠାରେ ଇଂରାଜୀ ଶାସକ ଭାଇସରାୟଙ୍କ ପାଇଁ ଏକ ଫୁଲ ବଗିଚା ତିଆରି କରିଥିଲେ। ମୋଗଲ ଗାର୍ଡେନ ହେଉଛି ଏକମାତ୍ର ଉଦ୍ୟାନ, ଯେଉଁଠାରେ ସାରା ବିଶ୍ୱର ରଙ୍ଗୀନ ଫୁଲ ଦେଖିବାକୁ ମିଳିଥାଏ। ମୋଗଲ ଗାର୍ଡେନକୁ ଚାରି ଭାଗରେ ବିଭକ୍ତ କରାଯାଇଛି। ସ୍କୋୟାର ଗାର୍ଡେନ, ଲଙ୍ଗ ଗାର୍ଡେନ, ପରଦା ଗାର୍ଡେନା ଏବଂ ସର୍କୁଲାର୍ ଗାର୍ଡେନ।
ପ୍ରଥମ ରାଷ୍ଟ୍ରପତି ସାଧାରଣ ଲୋକଙ୍କ ପାଇଁ ମୋଗଲ ଗାର୍ଡେନ ଖୋଲିଥିଲେ। ସ୍ବାଧୀନତା ପରେ ଭାଇସରାୟ ହାଉସର ନାମ ରାଷ୍ଟ୍ରପତି ଭବନରେ ପରିବର୍ତ୍ତନ କରାଯାଇଥିଲା। ଦେଶର ପ୍ରଥମ ରାଷ୍ଟ୍ରପତି ଡକ୍ଟର ରାଜେନ୍ଦ୍ର ପ୍ରସାଦ ଏଠାରେ ରହିବାକୁ ଆସିଥିଲେ। ତା’ପରେ ସେ ସାଧାରଣ ଲୋକଙ୍କ ପାଇଁ ମୋଗଲ ଗାର୍ଡେନ ଖୋଲିଥିଲେ। ସେବେଠାରୁ ପ୍ରତ୍ୟେକ ବସନ୍ତରେ ସାଧାରଣ ଲୋକଙ୍କ ପାଇଁ ମୋଗଲ ଗାର୍ଡେନ ଖୋଲାଯାଉଛି। ବର୍ତ୍ତମାନ ଏହାର ନାମ ଅମୃତ ଉଦ୍ୟାନକୁ ପରିବର୍ତ୍ତନ କରାଯାଇଛି।