ଭୁବନେଶ୍ୱର(ବ୍ୟୁରୋ),୧୩।୮:ଭୁବନେଶ୍ୱର ଉପକଣ୍ଠ ହାଇଟେକ୍ ଛକଠାରୁ ୭ କିଲୋମିଟର ଦୂର କୁଆଖାଇ ନଦୀର ଦକ୍ଷିଣ ପାର୍ଶ୍ୱରେ ଅବସ୍ଥିତ ବରିମୁଣ୍ଡ ଗ୍ରାମରୁ ପ୍ରାଚୀନ ସଭ୍ୟତାର ସନ୍ଧାନ ମିଳିଛି। ବରିମୁଣ୍ଡ ଗ୍ରାମର ଜଳଯୋଗାଣକେନ୍ଦ୍ର ନିକଟରେ ଏକ ପାଣିଟାଙ୍କି ନିର୍ମାଣକାର୍ଯ୍ୟ ଆରମ୍ଭ ହୋଇଥିଲା। ଏହି ପାଣି ଟାଙ୍କିର ମୂଳଦୁଆ ତିଆରି ନିମନ୍ତେ ଖନନ କରିବା ସମୟରେ ସେଠାରୁ ବହୁପ୍ରାଚୀନ ମାଟିପାତ୍ର ମିଳିଛି। ଏହି ମାଟିପାତ୍ର ମଧ୍ୟରେ ନାଲି, କଳା, ଧୂସର ରଙ୍ଗର ଖପରା ଦେଖିବାକୁ ମିଳିଛି। ଏହାସହ ବହୁ ସଂଖ୍ୟାରେ ଗୋଲାକାର ପଥର ଏଠାରୁ ମିଳିଛି। କୁଆଖାଇ ନଦୀ ଅବବାହିକାରେ ଏଭଳି ପ୍ରାଚୀନ ସଭ୍ୟତାର ସନ୍ଧାନ ପ୍ରଥମଥର ପାଇଁ ଦେଖିବାକୁ ମିଳିଛି।
ବରିମୁଣ୍ଡ ଏକ ପ୍ରାଚୀନ ସଂସ୍କୃତିସମ୍ପନ୍ନ ଗ୍ରାମ ହୋଇଥିବାବେଳେ ଏଠାରେ ଏକାଦଶ ଶତାବ୍ଦୀର ଲକ୍ଷେଶ୍ୱର ଶିବମନ୍ଦିର ରହିଛି। ମହାନଦୀ ଓ କାଠଯୋଡ଼ି ଅବବାହିକାରେ ପୂର୍ବରୁ ବହୁ ପ୍ରାଚୀନ ସହର ଓ ଗ୍ରାମାଞ୍ଚଳ ସଭ୍ୟତାର ସନ୍ଧାନ ମିଳିଥିଲା। ଏଗୁଡ଼ିକ ମଧ୍ୟରେ ଶିଶୁପାଳଗଡ଼ ଓ ତାଳପଡ଼ା ସହରୀ ସଭ୍ୟତା ହୋଇଥିବାବେଳେ ନରାଜ, ବିଦ୍ୟାଧରପୁର, କୋରକୋରା, ନଛିପୁର, କଲ୍ୟାଣପୁର ଗ୍ରାମାଞ୍ଚଳ ସଭ୍ୟତାର ନିଦର୍ଶନ। ଏହି ଗ୍ରାମାଞ୍ଚଳ ସଭ୍ୟତାଗୁଡ଼ିକ ବନ୍ୟା ଦ୍ୱାରା ଧ୍ୱଂସ ପାଇଥିବା ଆକଳନ କରାଯାଇଛି। ଏହି ସ୍ଥାନଗୁଡ଼ିକରେ ପ୍ରତ୍ନତାତ୍ତ୍ୱିକ ଅବଶେଷ ଉପରେ ୧ ରୁ ୨ ମିଟର ପର୍ଯ୍ୟନ୍ତ ବାଲି ମାଡ଼ିଯାଇଥିବା ପ୍ରତ୍ନତତ୍ତ୍ୱବିତ୍ମାନେ ଆକଳନ କରିଛନ୍ତି।
