କେନ୍ଦୁଝର,୨।୧(ସ୍ବ.ପ୍ର.) : ନୂଆବର୍ଷ ଠାରୁ କେନ୍ଦ୍ର ସରକାରଙ୍କ ନିଷ୍ପତ୍ତି କ୍ରମେ କେନ୍ଦୁଝର ଜିଲାରେ ଆରମ୍ଭ ହୋଇଛି ମୋଟରଯାନ ନିୟମ। ବିଶେଷ କରି ହେଲମେଟ ଓ ବେପରୁଆ ଗାଡ଼ିଚାଳନା ଉପରେ ଧରପଗଡ଼। ପ୍ରଥମଥର ପାଇଁ ସିସିଟିଭି ଦ୍ୱାରା ଚାଲିଛି ଏହି ଧରପଗଡ଼। ଏଣୁ ଖିଲାପୀ ମାନଙ୍କ ମୋବାଇଲକୁ ଫାଇନ ବା ଚାଲାଣ ମେସେଜ ମାଧ୍ୟମରେ ଯାଉଛି। ଏଣୁ ଏଭଳି ବ୍ୟବସ୍ଥାକୁ ନେଇ ଅନେକ ଛାନିଆ ହୋଇପଡ଼ିଥିବା ବେଳେ ଅନେକ ଏବେ ମଧ୍ୟ ବେପରୁଆ ଭାବରେ ବିନା ହେଲମେଟରେ ଗାଡି ଚଳାଚଳ କରୁଥିବା ଦେଖିବାକୁ ମିଳୁଛି।
ଦୁଇ ଦିନରେ ଜିଲା ମୁଖ୍ୟାଳୟରେ ପ୍ରାୟ ଖିଲାପୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଦେଢ଼ ଲକ୍ଷ ଟଙ୍କା ଫାଇନ କରାଯାଇଥିବା ଦାୟିତ୍ୱରେ ଥିବା ଟାଉନଥାନା ଏସ୍ଆଇ ଶାନ୍ତନୁ ଜେନା କହିଛନ୍ତି। ପ୍ରଥମେ ବିନା ହେଲମେଟ, ତିନି ଜଣିଆ ଯାତାୟାତ, ଭୁଲ ରାସ୍ତାରେ ଯାତାୟାତ, ମୋବାଇଲ ଧରି ବାଇକ ଚାଳନା ଆଦି ଧରପଗଡ଼ ଉପରେ ଅଧିକ ଗୁରୁତ୍ୱ ଦିଆଯାଉଛି ବୋଲି ପୋଲିସ ସୂଚନା ଦେଇଛି। ସିସିଟିଭିରେ ଯାଞ୍ଚ କରାଯାଇ ମେସେଜ ଜରିଆରେ ଚାଲାଣ ସିଧାସଳଖ ଗାଡ଼ି ମାଲିକଙ୍କୁ ପଠାଯାଉଛି। ଏହା ଦ୍ୱାରା ଦୁର୍ଘଟଣା ରୋକିବା ସହ ବେପରୁଆ ଗାଲି ଚାଲାଣ କୁ ସାବାଡ଼ କରାଯାଇ ପାରିବ ବୋଲି ମତ ପ୍ରକାଶ ପାଉଛି। ପ୍ରକାଶ ଯେ କେନ୍ଦୁଝର ସହରର କୋର୍ଟ ଛକ, ଲାବ୍ଯଯ ଛକ, ଜିଲାପାଳ ଙ୍କ ଅଫିସ ଛକ, ଏସପି ଅଫିସ ଛକ, ଗାନ୍ଧୀ ଛକ ତଥା ସିରାଜଉଦ୍ଦିନ ଛକ ଆଦି ସ୍ଥାନରେ ସିସିଟିଭି କ୍ୟାମେରା ଲଗାଯାଇ ପୋଲିସ କଣ୍ଟ୍ରୋଲରୁମ୍ରୁ ବିନା ହେଲମେଟ୍ରେ ଗାଡି ଚଳାଚଳ ନିୟନ୍ତ୍ରଣ କରିବା ସହ ବାଇକରେ ତିନିଜଣ ବସି ଗାଡି ଚଳାଚଳ, ମୋବାଇଲ ଫୋନରେ କଥା ହୋଇ ଗାଡ଼ି ଚଳାଚଳ ଆଦି ଉପରେ ନଜର ରଖି ଫାଇନ ଆଦାୟ କରାଯାଉଛି।।