ନୂଆଦିଲ୍ଲୀ,୩୧।୩(ପି.ଟି.): ମାର୍ଚ୍ଚ ୩୧ ସୁଦ୍ଧା ଟିକସଦାତାମାନେ ସେମାନଙ୍କ ସ୍ଥାୟୀ ଆକାଉଣ୍ଟ ନମ୍ବର (ପାନ୍) ସହ ଆଧାର ନମ୍ବର ଲିଙ୍କ୍ କରି ନ ଥିଲେ ୫୦୦ରୁ ୧,୦୦୦ ଟଙ୍କା ପର୍ଯ୍ୟନ୍ତ ଜରିମାନା ଦେବାକୁ ପଡ଼ିବ। ଆୟକର ବିଭାଗ ପକ୍ଷରୁ ଏହି ସୂଚନା ଦିଆଯାଇଛି। ପାନ୍-ଆଧାର ଲିଙ୍କ୍ ପାଇଁ ଶେଷ ତାରିଖ ମାର୍ଚ୍ଚ ୩୧ ରଖାଯାଇଛି। ଆଧାର ସଂଯୋଗ ହୋଇ ନ ଥିଲେ, ପାନ୍ ଅକାମୀ ହୋଇଯିବ। ଯେଉଁମାନେ ଏପ୍ରିଲ୧ରୁ ଜୁନ୍ ୩୦ ମଧ୍ୟରେ ଆଧାର ସଂଯୋଗ କରିବାକୁ ଚାହିଁବେ, ସେମାନଙ୍କୁ ୫୦୦ ଟଙ୍କା ବିଳମ୍ବିତ ଦେୟ ଦାଖଲ କରିବାକୁ ପଡ଼ିବ ବୋଲି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି) ପକ୍ଷରୁ ପ୍ରକାଶିତ ବିଜ୍ଞପ୍ତିରେ କୁହାଯାଇଛି। ଏହା ପରେ ପାନ୍କୁ ପୁନଃ କାର୍ଯ୍ୟକ୍ଷମ କରିବାକୁ ହେଲେ ଟିକସଦାତାଙ୍କୁ ୧,୦୦୦ ଟଙ୍କା ଜରିମାନା ଭରିବାକୁ ହେବ।
ପାନ୍ ସହ ଆଧାର ସଂଯୋଗ ଲାଗି ରହିଥିବା ସମୟସୀମାକୁ ସରକାର ଏକାଧିକ ଥର ବଢ଼ାଇବା ପରେ ଏପ୍ରିଲ୧ରୁ ପ୍ରଥମ ୩ ମାସ ପାଇଁ ୫୦୦ ଟଙ୍କା ଓ ଏହାର ପରେ ୧,୦୦୦ ଟଙ୍କା ଜରିମାନା ସଂଗ୍ରହ କରିବାକୁ ନିଷ୍ପତ୍ତି ନେଇଥିବା ଏକେଏମ୍ ଗ୍ଲୋବାଲ ଟାକ୍ସ ପାର୍ଟନର ଅମିତ ମାହେଶ୍ୱରୀ କହିଛନ୍ତି। ଏଥିରେ ବିଫଳ ହେଲେ ପାନ୍ ଅକାମୀ ହୋଇଯିବ ଏବଂ କରଦାତାଙ୍କର ପାନ୍ କାର୍ଡ ନାହିଁ ବୋଲି ବିବେଚନା କରାଯିବ। ସେଥିପାଇଁ କରଦାତାମାନେ ସେମାନଙ୍କ ଆୟକର ପୋର୍ଟାଲ ଯାଞ୍ଚ କରି ପାନ୍-ଆଧାର ଲିଙ୍କ୍ ହୋଇଛି କି ନାହିଁ ତାହା ସୁନିଶ୍ଚିତ କରିନେବାକୁ ପରାମର୍ଶ ଦିଆଯାଇଛି। ଯେଉଁମାନଙ୍କର ଆୟକର ପୋର୍ଟାଲକୁ ଯିବା ସୁବିଧା ନାହିଁ ସେମାନେ ଏସ୍ଏମ୍ଏସ୍ରେ ମଧ୍ୟ ଏହା ଜାଣିପାରିବେ। ରିଟର୍ନ ଦାଖଲ ଆଦି ବିଭିନ୍ନ ଆୟକର ସମ୍ପର୍କିତ କାର୍ଯ୍ୟ ପାଇଁ ପାନ୍-ଆଧାର ସଂଯୋଗକୁ ବାଧ୍ୟତାମୂଳକ କରାଯାଇଛି। ଏହା ବ୍ୟତୀତ ବ୍ୟାଙ୍କ ଆକାଉଣ୍ଟ ଖୋଲିବା, ସ୍ଥାବର ସମ୍ପତ୍ତି କ୍ରୟ କିମ୍ବା ପରିଚୟ ପ୍ରମାଣ ଭାବେ ପାନ୍ ବ୍ୟବହୃତ ହେଉଛି। ଆଧାର ସଂଯୋଗ ହୋଇ ନ ଥିଲେ ପାନ୍ କାର୍ଡଧାରୀ ବିଭିନ୍ନ ଚ୍ୟାଲେଞ୍ଜ୍ର ସମ୍ମୁଖୀନହେବେ। ପାନ୍ ନମ୍ବର ବାଧ୍ୟତାମୂଳକ ଥିବା ବିଭିନ୍ନ ଆର୍ଥିକ କାରବାର କରିବାରୁ ସେ ବଞ୍ଚତ୍ତ ହେବେ। ଫଳରେ ଧାରା ୨୭୨ ବି ଅନୁଯାୟୀ ତାଙ୍କୁ ଅଧିକ ହାରରେ ଟିଡିଏସ୍ ଏବଂ ଜରିମାନା ଦେବାକୁ ପଡ଼ିବ ବୋଲି ନାଙ୍ଗିଆ ଆଣ୍ଡରସନ ଏଲ୍ଏଲ୍ପି ପାର୍ଟନର ନୀରଜ ଅଗ୍ରଓ୍ବାଲ କହିଛନ୍ତି।