ହାଇଦ୍ରାବାଦ, ୧ା୯: ବେଆଇନ ଭାବେ ଭିଜା ତିଆରି ଅଭିଯୋଗରେ ତେଲଙ୍ଗାନା ପୋଲିସ ଗୁରୁବାର ଦୁଇ ଯୁବକଙ୍କୁ ଗିରଫ କରିଛି। ଅଭିଯୁକ୍ତ ଫିଙ୍ଗରପ୍ରିଣ୍ଟ ସର୍ଜରି ଦ୍ୱାରା କୁଏଟ୍ରେ ଚାକିରି କରିବାକୁ ଚାହୁଁଥିବା ଲୋକଙ୍କୁ ଭିଜା ଯୋଗାଉଥିଲେ। ରାଜସ୍ଥାନ ଓ କେରଳରେ ଏହି ଦୁଇ ଯୁବକ ପାଖାପାଖି ୧୧ଟି ଅସ୍ତ୍ରୋପଚାର କରିଥିବାବେଳେ ସର୍ଜରି ପିଛା ୨୫ ହଜାର ଟଙ୍କା ଖର୍ଚ୍ଚ ହେଉଥିବା ପୋଲିସ କହିଛି। ଫିଙ୍ଗରପ୍ରିଣ୍ଟ ସର୍ଜରି କରିଥିବା ଅନ୍ୟ ଦୁଇଜଣଙ୍କୁ ମଧ୍ୟ ପୋଲିସ ଗିରଫ କରିଛି। ସର୍ଜରିରେ ବ୍ୟବହୃତ ମେଡିକାଲ କିଟ୍ସ ଅଭିଯୁକ୍ତଙ୍କ ନିକଟରୁ ପୋଲିସ ଜବତ କରିଛି। ଆପରାଧିକ କାରଣ ଦର୍ଶାଇ କୁଏଟ୍ ସରକାର ଯେଉଁମାନଙ୍କୁ ଦେଶରୁ ନିର୍ବାସିତ କରିଛନ୍ତି ସେହି ବ୍ୟକ୍ତିମାନେ ଫିଙ୍ଗରପ୍ରିଣ୍ଟ ସର୍ଜରି ଜରିଆରେ ନୂଆ ଭିଜା ତିଆରି କରି କୁଏଟ୍ ଯାଉଥିବା ପୋଲିସ କହିଛି। ଗିରଫ ୪ଜଣ ହେଲେ ଗାଜ୍ଜାଲାକୋଣ୍ଡୁଗାରି ନାଗା ମୁନେଶ୍ୱର ରେଡ୍ଡୀ, ସାଗବାଲା ଭେଙ୍କଟ ରମନ, ବୋଭିଲ୍ଲା ଶିବା ଶଙ୍କର ରେଡ୍ଡୀ ଏବଂ ରେଣ୍ଡଲା ରାମା କ୍ରିଷ୍ଣା ରେଡ୍ଡୀ। ଅଭିଯୁକ୍ତଙ୍କ ଘର କାଡପାରେ ହୋଇଥିବାବେଳେ ହାଇଦ୍ରାବାଦରେ ଏକ ହୋଟେଲରେ ସେମାନେ ରହୁଥିଲେ। ଅଭିଯୁକ୍ତ ମୁନେଶ୍ୱର ରେଡ୍ଡୀ (୩୬) ଜଣେ ଏକ୍ସ-ରେ ଟେକ୍ନିସିଆନ୍ ଏବଂ ସାଗାବାଲା (୩୯) ଜଣେ ଆନାସ୍ଥେସିଆ ଟେକ୍ନିସିଆନ୍।