ଭଦ୍ରକ ଅଫିସ, ୧୪।୧ ଭଦ୍ରକ ବନଖଣ୍ଡ ବନ୍ୟପ୍ରାଣୀ ଡିଭିଜନ ପକ୍ଷରୁ କୁମ୍ଭୀର ଓ ପକ୍ଷୀ ଗଣନା ଶେଷ ହୋଇଛି। ଜିଲା ବନଖଣ୍ଡ ବନ୍ୟପ୍ରାଣୀ ବିଭାଗର ଚାନ୍ଦବାଲି, ବାସୁଦେବପୁର, ଭଦ୍ରକ ଓ ଧାମନଗର ରେଞ୍ଜରେ ୪ ଟିମ୍ ଏଥିରେ ସାମିଲ ଥିଲେ। ଚାନ୍ଦବାଲି ଓ ବାସୁଦେବପୁର ଡିଭିଜନରେ ଚଳିତ ମାସ ୬ ଓ ୭ ଦୁଇଦିନ ଧରି କୁମ୍ଭୀର ଗଣନା କରାଯାଇଥିଲା। ଦୁଇଦିନ ମଧ୍ୟରେ ବୈତରଣୀ, ସାଳନ୍ଦୀ ଓ ମନ୍ତେଈ ନଦୀରେ ୫୨ଟି ବଉଳା ପ୍ରଜାତିର କୁମ୍ଭୀର ଦେଖିବାକୁ ମିଳିଥିବା ସୂଚନା ମିଳିଥିଲା। କିନ୍ତୁ ଗତବର୍ଷ ୬୨ଟି କୁମ୍ଭୀର ଥିବା ଗଣନା ହୋଇଥିଲା। ପ୍ରାକୃତିକ ପାଣିପାଗ ପରିବର୍ତ୍ତନ କାରଣରୁ କୁମ୍ଭୀରଗୁଡ଼ିକ ଗଣନା ସମୟରେ ଦେଖାଯାଇ ନ ଥିବା ବିଶାରଦ ସୁଧାକର କର କହିଛନ୍ତି।
୪ଟି ରେଞ୍ଜରେ ମୋଟ ୪୬ ପ୍ରଜାତିର ୧୩,୫୧୬ ପକ୍ଷୀ ଥିବା ବିଭାଗ ଗଣନା କରିଛି। ଅନ୍ୟ ଦେଶଗୁଡ଼ିକରେ ଶୀତର ପ୍ରକୋପ ନ ଥିବାରୁ ବିଦେଶୀ ପକ୍ଷୀ ଏଠାକୁ ଆସି ନ ଥିବା ଅଧିକାରୀ କହିଛନ୍ତି। ଇରାୱାଡ଼ି ପ୍ରଜାତିର ଡଲ୍ଫିନ ୪ଟି ଥିବା ଜଣାପଡ଼ିଛି। ସେଗୁଡ଼ିକ ବାସୁଦେବପୁର ରେଞ୍ଜ ଅଞ୍ଚଳରେ ଦେଖାଯାଇଥିବା ବେଳେ ଦୁର୍ଗାପୁର ମୁହାଣ, ଅବ୍ଦୁଲ କଲାମ ମୁହାଣ, ଚାନ୍ଦିନୀପାଳଠାରୁ ବାଲିମୁଣ୍ଡା ସମୁଦ୍ର ତଟ ମଧ୍ୟରେ ଦେଖାଯାଇଥିବା ବିଭାଗ ପକ୍ଷରୁ କୁହାଯାଇଛି। ରେଞ୍ଜର ବୈକୁଣ୍ଠନାଥ ବେହେରା, ସୁବାସ ଚନ୍ଦ୍ର ନାୟକ, ରଞ୍ଜିତ କୁମାର ମହାନ୍ତି, କୁଶ ସିଂଙ୍କ ସମେତ ବନପାଳ, ବନରକ୍ଷୀମାନେ ଗଣନା କାର୍ଯ୍ୟରେ ସାମିଲ ଥିଲେ।