ଲକ୍ଷ୍ନୌ,୨ ।୧୧: ଫ୍ରାନ୍ସରେ ଆତଙ୍କବାଦୀ ଆକ୍ରମଣକୁ ନେଇ ବିବାଦୀୟ ବୟାନ ଦେଇଥିବା ଜଣାଶୁଣା ଶାୟର ମୁନବ୍ୱର ରାଣାଙ୍କ ବିରୋଧରେ ଲକ୍ଷ୍ନୌର ହଜରତଗଞ୍ଜ କୋତୱାଲିରେ ଏଫ୍ଆଇଆର୍ ଦିଆଯାଇଛି । ତାଙ୍କ ବିରୋଧରେ ଗମ୍ଭୀର ଧାରାରେ ମାମଲା ଦାୟର କରାଯାଇଛି । ସୂଚନାଯୋଗ୍ୟ, ଆତଙ୍କବାଦୀ ଆକ୍ରମଣକୁ ଠିକ୍ ବୋଲି କହି ଏବେ ଫସି ଯାଇଛନ୍ତି ଏହି ଶାୟର । ସେ କହିଥିଲେ ପେଗାମ୍ବର ମହମ୍ମଦ ସାହେବଙ୍କ କାର୍ଟୁନ କରି ସେହି ଯୁବକଙ୍କୁ ଏପରି ବାଧ୍ୟ କରାଯାଇଥିଲା କି ସେ କାହାକୁ ହତ୍ୟା କରିବସିଲେ । ଯଦି ସେହି ଛାତ୍ରଙ୍କ ସ୍ଥାନରେ ମୁଁ ଥାଆନ୍ତି ମୁଁ ବି କାହାର ହତ୍ୟା କରିଥାଆନ୍ତି ବୋଲି ମୁନବ୍ୱର କହିଥିଲେ । ତେବେ କଥା କେବଳ ପେଗାମ୍ବର ମହମ୍ମଦ ସାହେବଙ୍କର ନୁହେଁ ଭଗବାନ ରାମଙ୍କର କେହି ଯଦି ବିବାଦୀୟ କାର୍ଟୁନ କରିଥାଆନ୍ତା ତେବେବି ଏଭଳି କରାଯାଇଥାଆନ୍ତା । ମୁନବ୍ୱରଙ୍କର କହିବା କଥା ହେଲା ମଜହବ ମା’ ଭଳି । ଏହାସହ ଲୋକଙ୍କ ଆସ୍ଥା ଯୋଡି ହୋଇ ରହିଛି । ଏହାସହ ଖେଳିବା ଉଚିତ ନୁହେଁ । କାହାକୁ ଏତେ ମାତ୍ରାରେ ଉସକାଇବା କଥା ନୁହେଁ ଯେ ଜଣେ ଅନ୍ୟ ଜଣଙ୍କର ହତ୍ୟା କରିଦେଇପାରେ । ମୁସଲମାନଙ୍କୁ ଚିଡାଇବା ପାଇଁ ଫ୍ରାନ୍ସରେ ଏଭଳି କାର୍ଟୁନ କରାଯାଇଛି ।