ଦୋହା,୨୬।୧୧ : କତାରରେ ଖେଳାଯାଉଥିବା ଫିଫା ବିଶ୍ୱକପ୍ର ପ୍ରଶଂସକ ଗ୍ରାମରେ ନିଆଁ ଲାଗିବାର ଘଟଣା ସାମ୍ନାକୁ ଆସିଛି। କତାରର ବିଶ୍ୱକପ ସିଟି ଲୁସେଲରେ ଏହି ଘଟଣା ଘଟିଥିବା ଜଣାଯାଇଛି। ଭିଡ଼ିଓ ଫୁଟେଜରେ ଅକାଶରେ ବହଳ କଳା ଧୂଆଁ ବ୍ୟାପିଥିବାର ଦେଖାଯାଉଛି।
କ୍ୱେଟଫାନ ଦ୍ୱୀପ ଉତ୍ତରରେ ଥିବା ପ୍ରଶଂସକ ଗ୍ରାମ ଉପରେ ଏହି କଳା ଧୂଆଁ ଦେଖାଯାଉଛି। ଗଣମାଧ୍ୟମ ସଂସ୍ଥା ଦି ସନ ଅନୁଯାୟୀ, ଫିଫା ଅଧିକାରୀମାନେ ନିର୍ମାଣାଧୀନ ଏକ କୋଠାରେ ଘଟିଥିବା ଅଗ୍ନିକାଣ୍ଡ ସମ୍ପର୍କରେ କହିଛନ୍ତି। ଏଥି ସହିତ, ସିଭିଲ ଡିଫେନ୍ସ୍ର ଲୋକମାନେ ସୂଚନା ପାଇବା ମାତ୍ରେ ଘଟଣାସ୍ଥଳରେ ପହଞ୍ଚିଥିଲେ। ତେବେ ହତାହତ ଅବା କ୍ଷୟକ୍ଷତିର କୌଣସି ସୂଚନା ମିଳି ନାହିଁ।
ଏହା ଉଲ୍ଲେଖନୀୟ ଯେ ଫୁଟବଲ ବିଶ୍ୱକପ ଆୟୋଜନ ପାଇଁ କତାର ପାଣି ପରି ଟଙ୍କା ଖର୍ଚ୍ଚ କରିଛି। ଏହା ସତ୍ତ୍ୱେ କାର୍ଯ୍ୟର ଗୁଣବତ୍ତାକୁ ନେଇ ଅନେକ ଅଭିଯୋଗ ଆସୁଛି। କତାର ପ୍ରାୟ ୧୮୫ ବିଲିୟନ ପାଉଣ୍ଡ ଖର୍ଚ୍ଚ କରିଛି। ଏହାର ଅଧିକାଂଶ ଖର୍ଚ୍ଚ ଲୁସେଲ ସିଟି ନିର୍ମାଣରେ ହୋଇଛି। ନିର୍ମାଣ କାର୍ଯ୍ୟରେ ସମସ୍ତ ପ୍ରକାର ଠକେଇ ହୋଇଥିବା ଅଭିଯୋଗ ହୋଇଛି।