ବେଙ୍ଗାଲୁରୁ,୧୦।୩: ବେଙ୍ଗାଲୁରୁରୁ ଏକ ବଡ଼ ଦୁଃଖଦ ଖବର ସାମ୍ନାକୁ ଆସିଛି। ଏକ ସରକାରୀ ବସ୍ରେ ହଠାତ୍ ନିଆଁ ଲାଗିଯାଇଛି। ଫଳରେ ବସ୍ ଭିତରେ ଶୋଇଥିବା କଣ୍ଡକ୍ଟରଙ୍କ ମୃତ୍ୟୁ ହୋଇଛି। ଏହି ଘଟଣା ବେଙ୍ଗାଲୁରୁର ମେଟ୍ରୋପଲିଟାନ୍ ଟ୍ରାନ୍ସପୋର୍ଟ କର୍ପୋରେସନ୍ (ବିଏମ୍ଟିସି) ବସ୍ଷ୍ଟାଣ୍ଡରେ ଘଟିଛି। ଏହି ଘଟଣା ସର୍ମ୍ପକରେ ପୋଲିସ ଶୁକ୍ରବାର ସୂଚନା ଦେଇଛି। ସୂଚନାଯୋଗ୍ୟ, ସୁମନହଲ୍ଲୀ ବସ୍ ଡିପୋର ବିଏମ୍ଟିସି ବସ୍ରେ ହଠାତ୍ ଅଗ୍ନିକାଣ୍ଡ ଘଟିଥିଲା ବୋଲି ଡିସିପି ଲକ୍ଷ୍ମଣ ବି ନିମ୍ବାର୍ଗୀ କହିଛନ୍ତି। ଶୁକ୍ରବାର ଭୋର ୪ଟା ୪୫ରେ ଏହି ଅଗ୍ନିକାଣ୍ଡ ଘଟିଥିବା ବେଳେ ଏହାକୁ ପ୍ରଥମେ ବସ୍ ଡ୍ରାଇଭର ପ୍ରକାଶ ଦେଖିଥିଲେ। ଏହାପରେ ସେ ପୋଲିସକୁ ଖବର ଦେଇଥିଲେ। ସେତିକିବେଳକୁ କଣ୍ଡକ୍ଟର ଜଣକ ୮୦ପ୍ରତିଶତ ଜଳିଯାଇଥିବା ବେଳେ ତାଙ୍କର ମୃତ୍ୟୁ ଘଟିଛି। ମୃତକ କଣ୍ଡକ୍ଟର ଜଣକ ମୁଥୈଆ ସ୍ବାମୀ ବୋଲି ଜଣାପଡ଼ିଛି। ତେବେ ଅଗ୍ନିକାଣ୍ଡର କାରଣ ଏବେ ବି ଅସ୍ପଷ୍ଟ ଥିବା ବେଳେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
