ମସ୍କୋ,୨୨ ।୨: ରୁଷିଆର ଜରୁରିକାଳୀନ ପରିସ୍ଥିତି ମନ୍ତ୍ରଣାଳୟ ମଙ୍ଗଳବାର ବିଳମ୍ବିତ ରାତିରେ ସୂଚନା ଦେଇଛି କି ମସ୍କୋର ଏକ ବହୁମହଲା ବିଶିଷ୍ଟ ହୋଟେଲରେ ଅଗ୍ନିକାଣ୍ଡ ଯୋଗୁ ୨ ଶିଶୁଙ୍କ ସମେତ ୬ ଜଣଙ୍କ ମୃତ୍ୟୁ ହୋଇଛି । ମନ୍ତ୍ରଣାଳୟ ଟେଲିଗ୍ରାମ ମେସେଜିଂ ପ୍ଲାଟଫର୍ମରେ କହିଛି ଯେ ଅଗ୍ନିକାଣ୍ଡରେ ୨ ଜଣ ଆହତ ହୋଇଛନ୍ତି ଏବଂ ପ୍ରାୟ ୨୦୦ରୁ ଅଧିକ ଲୋକଙ୍କୁ ବିଲଡିଂରୁ ସ୍ଥାନାନ୍ତର କରାଯାଇଛି ।
ରୁଷିଆର ଯାଞ୍ଚ ସମିତି ଟେଲିଗ୍ରାମରେ କହିଛି ଅଧା ରାତିର ଠିକ୍ ପୂର୍ବରୁ ନିଆଁକୁ ଲିଭାଇ ଦିଆଯାଇଥିଲା ଓ ପ୍ରତିଟି କୋଠରିର ନିରିକ୍ଷଣ କରାଯାଇଥିଲା । ଏହାସହ ବିଲଡିଂର ପଞ୍ଚମ ମହଲାରେ ଲାଗିଥିବା ନିଆଁର କାରଣ ଜାଣିବାକୁ ଏକ ଆପରାଧିକ ମାମଲା ଦାୟର କରାଯାଇ ଯାଞ୍ଚ ଆରମ୍ଭ କରାଯାଇଛି ।
ରୁଷିଆ ଏଜେନ୍ସି କହିଛି ମସ୍କୋର ତଗାଂସ୍କି ଜିଲାରେ ୪୧ ବର୍ଷ ପୁରୁଣା ବିଲଡିଂର ତଳ ମହଲାରେ ଏମକେଏମ ହୋଟେଲ ସହ ଉପର ଫ୍ଲୋରରେ ଆପାର୍ଟମେଣ୍ଟ ରହିଛି । ରୁଷିଆର ତାସ ଏଜେନ୍ସି ଏକ ଜରୁରିକାଳୀନ ସେବା ଅଧିକାରୀଙ୍କ ସୂଚନା ଆଧାରରେ କହିଛି କି ନିଆଁ ଲାଗିବାର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇ ନାହିଁ ।
