ଭୋପାଳ,୧୪।୪: କରୋନା ସଂକ୍ରମଣ ନେଇ ଦେଶରେ ଆତଙ୍କ ଦେଖାଦେଇଛି। ପ୍ରତିଦିନ ନୂଆ ଆକ୍ରାନ୍ତଙ୍କ ସଂଖ୍ୟା ବଢ଼ିବା ସହିତ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ମଧ୍ୟପ୍ରଦେଶର ଭୋପାଳରେ ମୃତକଙ୍କ ସଂଖ୍ୟା ସରକାର ଲୁଚାଉଥିବା ଅଭିଯୋଗ ହୋଇଛି। ସରକାରୀ ରିପୋର୍ଟରେ ମୃତ୍ୟୁ ସଂଖ୍ୟା ୪ ଥିବାବେଳେ ଶ୍ମଶାନ ଘାଟ ଏବଂ କବରସ୍ତାନରୁ ମିଳିଥିବା ତଥ୍ୟ ଅନୁସାରେ ମଙ୍ଗଳବାର ଏଠାରେ ମୃତ୍ୟୁ ସଂଖ୍ୟା ୮୪ ରହିଛି। ଭୋପାଳରେ ଥିବା ଭଦଭଦା, ସୁଭାଷନଗର ଆଦି ଶ୍ମଶାନଘାଟରେ ୩୦ରୁ ଅଧିକ ଚିତା ୪ ଦିନ ପୂର୍ବରୁ ପ୍ରସ୍ତୁତ କରି ରଖାଯାଇଛି। ଅପରପକ୍ଷରେ ୩୦ଟିର ପ୍ରସ୍ତୁତି ଆରମ୍ଭ ହୋଇଛି। ସେହିପରି ଝଦା କବରସ୍ତାନରେ ମଧ୍ୟ ସ୍ଥିତି ସଙ୍କଟ ଜନକ ସ୍ଥିତିରେ ପହଞ୍ଚିଛି। ଅଧିକ ସଂଖ୍ୟକ ମୃତଦେହ ପହଞ୍ଚୁଥିବାରୁ କବର ଦେବା କଷ୍ଟକର ହୋଇ ପଡ଼ୁଛି। ସେହିପରି ଶ୍ମଶାନରେ ଦିନରାତି ଜୁଇ ନିଆଁ ଲିଭୁନି। ଏଭଳି ସ୍ଥିତି ଗୁଜରାଟର ସୁରଟରେ ମଧ୍ୟ ସୃଷ୍ଟି ହୋଇଛି। ଶ୍ମଶାନ ଘାଟ ଏବଂ କବରସ୍ତାନ ଆଗରେ ମୃତକଙ୍କ ପରିବାର ଅନ୍ତିମ ସଂସ୍କାର ପାଇଁ ଘଣ୍ଟା ଘଣ୍ଟା ଅପେକ୍ଷା କରୁଛନ୍ତି।
