ବାରିପଦା ଅଫିସ, ୨୮।୨-ମୟୂରଭଞ୍ଜ ଜିଲାର ବିଭିନ୍ନ ଜଙ୍ଗଲରେ ଶନିବାର ନିଆଁ ଲାଗି ବ୍ୟାପକ କ୍ଷତି ହୋଇଛି। ଜଙ୍ଗଲ ସଂଲଗ୍ନ ଗ୍ରାମକୁ ନିଆଁ ବ୍ୟାପିବା ପରେ ଗ୍ରାମବାସୀ ଦମକଳ ବାହିନୀକୁ ଖବର ଦେଇଥିଲେ। ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ପୂର୍ବାହ୍ନ ୧୧ଟା ୨୦ରେ ଅଗ୍ନିଶମ ବାହିନୀର ଗୋଟିଏ ଦଳ ମୋରଡ଼ା ବ୍ଲକର ଦୁର୍ଗାପୁର ଜଙ୍ଗଲ ନିଆଁ ଲିଭାଇବାକୁ ଯାଇଥିଲେ। ୧୧ଟା ୩୩ରେ ବାରିପଦା ସହର ଉପକଣ୍ଠ ମୁନସୀବନ୍ଧ ନିକଟ ଜଙ୍ଗଲରେ ନିଆଁ ଲିଭାଇବାକୁ ଯାଇଥିଲେ ବିଭାଗର ଅନ ଏକ ଦଳ। ଏହାପରେ ଦମକଳ ବାହିନୀ ଖଙ୍ଖାଭଙ୍ଗା, କାଣିମହୁଲୀ, ବେତନଟୀର କୃଷ୍ଣଚନ୍ଦ୍ରପୁର, ବାଁସକାଣ୍ଟିଆ, ବୁଢିଖମାରୀ ଓ ପୁଣି ବୁଢ଼ିଖମାରୀ ଜଙ୍ଗଲରେ ନିଆଁ ଲିଭାଇଥିଲେ। ୪ ଘଣ୍ଟା ମଧ୍ୟରେ ୮ ସ୍ଥାନରେ ଲାଗିଥିବା ନିଆଁକୁ ଆୟତ୍ତ କରାଯାଇଥିଲା। ସେହିପରି ବେତନଟୀ, ମୋରଡା଼, ରାସଗୋବିନ୍ଦପୁର, ବାଙ୍ଗିରିପୋଷି, ବଡ଼ସାହି, ଖୁଣ୍ଟା ଓ ଗୋପବନ୍ଧୁନଗର ଦମକଳ କେନ୍ଦ୍ରରୁ ମଧ୍ୟ ଅଗ୍ନିଶମ ବାହିନୀ ଜଙ୍ଗଲ ନିଆଁ ଲିଭାଇବା କାର୍ଯ୍ୟରେ ନିୟୋଜିତ ହୋଇଥିଲେ।
ମହୁଲ ଫୁଲ ସଂଗ୍ରହକାରୀମାନେ ଜଙ୍ଗଲରେ ନିଆଁ ଲଗାଉଥିବା ବେଳେ ଏପରି ସମସ୍ୟା ଉପୁଜିଥିବା ସ୍ଥାନୀୟ ଗ୍ରାମବାସୀ ଆଶଙ୍କା କରିଛନ୍ତି। ତେବେ ଜଙ୍ଗଲରେ ନିଆଁ ନ ବ୍ୟାପିବା ପାଇଁ ଗ୍ରାମ୍ୟ ବନ ସୁରକ୍ଷା ବାହିନୀ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି। ଜଙ୍ଗଲ ମଧ୍ୟରେ ପଡ଼ିଥିବା ଶୁଖିଲା ପତ୍ରକୁ ଲାଇନିଂ ବା ମଝିରେ ମଝିରେ ପରିଷ୍କାର କରାଯାଇଥାଏ। ବନ ବିଭାଗ ପକ୍ଷରୁ ଏନେଇ ପ୍ରତିବର୍ଷ ପର୍ଯ୍ୟାପ୍ତ ଅନୁଦାନ ଆସୁଥିବା ବେଳେ କାଗଜପତ୍ରରେ ଏହା କାର୍ଯ୍ୟ ହୋଇଥିବା ଦର୍ଶାଯାଇଛି। ମାତ୍ର ଚଳିତବର୍ଷ ଜଙ୍ଗଲରେ ଲାଗୁଥିବା ନିଆଁ ଉକ୍ତ କାର୍ଯ୍ୟ ପ୍ରତିପାଦନ ଉପରେ ଅଞ୍ଚଳବାସୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି କରିଛି।